Read Ninia Yali OBAJA 1 Bible Online

OBAJA 1 - Ninia Yali bible

OBAJA 1

¹TUHAN Mun Leho wereg on anyo en, “Hit ap homi henunggul unuk Edom fahet diroho hweag-esakiyug isi,” ulug at Obaja en de wene diroho aruhu suroho aruhu ulug hweag-esauk katfag on de diroho: At TUHAN en de ayonggo angge ap homi di unggul unuk su unggul unuk fam mon-enepsimu wene iren walug hweag-nesa wahausa on de diroho uswa, “Nit de o Edom sok laroho enowarik kul en de, o Edom lakohon fik-fouk diek,” ulug hweag-esausa ale hweag-nesa wahausa.

²Ne, it Edom on fam TUHAN en hweag-esauk kwit de, “Hat de An den homamne elehapdoho hobahakukmu ap homi enunggul unuk mundoho en horogap hapuk kamuhup.

³Hat de hendama hawonog ai fam de honggwareg lal hapuk on fahet de, haren de nobam indip ibukota ohore helep unggul omamne on fam wirig, ne nebe welahimu ohore duk leho on fene welahi ulug ai boruk kahen ai fam de, hat hendaman boruk kwit de, ‘Ap sa hag angge en an sebeloho nobahauk alereg?’ Boruk kahen.

⁴Ai famen de hat hobam de suwe ik wesahup hag on rajawali en a mun koloma wirik laharuk ai hag wiruhun famen oho, ne bohol fam sohwalanggen mun koloma etlema wereg etma hagdoho wiruhun famen de, An den hat mun belabe hobahakuk.

⁵Ap yoholi angge wauk on en oho, ne huhul hwelauk on en ohore o hup anggo watlug de we at enda boruk angge etano on neg hwelauk. Ne, it ap homi yabukmu en anggur anggen dahanduk kwit ohore nin fomane lin-esauk. Famen de hat de it ap homi haselei on en mun feleleng heahup.

⁶Yaho hit ap homi hun Esau ambiangma on suma, ap homi en de hit henebe welahepma etma falik watlug de henangge mun hirik-herahoma fahat dalug lahep on oho mundoho hwelahup.

⁷Hat de it hinim sebe ulug duruk kahep on etmano en lal-healug de o hat hebe welahenma etman muko wilibi hobahakup. Hat de it hinim hundig lahep on etmano en halong elehapdoho hobahakeg, ne it hinim siburu misigmu nauk kahep on etmano en yoma hobahakeg, duhupdeg iren hat hebe fahet ap homi fam hein og-enepuk kwit de, “At fam mundoho oluk-boluk deg latsi on etmano ketia kema wereg?” Uruk kamuhup.

⁸Ne, nukoho An den o Edom enap mun elehapdoho fesehuk salim aire, ap homi enenda wenggeleg neg deg on mel, it fam mun enenda hebeleg fam neg duruk on etmano mundoho mel An den mundoho elehap debesehukmu eleg aruhureg obale eke welaruhu fug.

⁹It ap o Teman fam etman sehen anggen enap de enakol neg amuhup, ne it o Edom fam etma sehen foroho enap de mundoho wat heheg lahup.” Isi ulug hweag-esebag.

¹⁰Allah en uruk kwit de, “Haren de it hori-herekwi on[1] Yakub ambiangma on etmano fam mun holok fam-fam ale debeserihin mu re, ap homi en de li mundoho-mundoho etma fam siahap-biahapdoho hobahalug hebe elehapdoho hobaharuk kamuhup.

¹¹Ap homi selei on en o Yerusalem sok houwag esalug kuruk kwit, o kota ai sebeloho foruk li em de hat hebe yatma unduhuk wereg lit hil welatihin. Ne, iren o Yerusalem fam etma di angge su angge mundoho hwelalug lauk kwit it-it etmano yohwan-yohwan atuk kweleg de hele uk fug angge welatihin. Hat de it selei on etma enolok deg ale nim de dahan deg lahen fug mun higitdeg lahen.

¹²It ap homi Yehuda on fam wene siag on ai enobam aik waharuk kweleg inim, ne it hori ai enebe mundoho eleg ail waharuk li em nim hat hahayeg hauk kwit welatihin ale aire airoho duk fug alereg on famen. Ne, it enebe mun anggilik-anggoloroho hauk kweleg hat hele en werahap hauk katihin ale aire duk fug alereg on duruk katihin.

¹³It An nomaliki ouk-bouk hauk kweleg nim ne enangge nukoho mun siag on ai fam del-dauk kweleg inim eta hat hebe o kota fam kwik lauihindeg hamit-mit sup uruk kwit enangge huhul hweleheg duruk katihin on aire duk fug on dirihin!

¹⁴ Ne, hat hebe kwe elanma unduhuk wereg lit it ap selei on etmano enakol en heiye lauk on etmano kwe bal-enebeheg, ite it anggin-fanggin hauk kwit duruk kweleg haren seneko it ene weim on fam og-eseheg, duruk katihin ale aire duk fug on duruk katihin.” Isi ulug hweag-esebag.

¹⁵Allah en eke uruk kwit de, “An TUHAN en ap homi di enunggul unuk su enunggul unuk enawene bilinggoho ayo wit-enebuhuk salim anyo dik-demdoho mun horog aik waha. Ne, at Edom en duruk katsi on etma re aren disi onggo at fam oho airoho debehuk. Aren ap homi amu on fam debeserukmu hauk katswa eta hag de at oho airoho hahu.

¹⁶An nandom mun eneg[2] on fam de An nomaliki en ik unggum enobam fesehuk on anyo ahut ilitdeg nausa. Famen de ik it ap homi enunggul unuk di obam su obam kwenangma suma wereg fahet de mun asig anggolo on nahup. Mu re unggum enobam waruhu on aire it eke enebe ohwal amuhup fug. It enebe abirangge en ik asig on ai mun miroho nahupdeg, it enebe enobale eleg angge mundoho eleg amuhup.” Isi ebag.

¹⁷Allah en eke uruk kwit de, “Airoho duhup famen de Dom Sion fam etma re it fomane enahap wendat aruhu, ne dom ai fam de An nobahet obale mun eneg on aruhu. Ai fam de it hun Yakub ambiangma en ondoho on etma re enanggwenang it enonggwareg en on etmano nikangge hwelahup.

¹⁸An nomaliki Israel on de indok hag amuhupdeg, yabukmu enggelangge harep nauk ai hag it Esau ambiangma on etmano mundoho han yal enebuhup. It Esau ambiangma on etma re dem misig ulug oho eke lil amuhup fug ulug, An TUHAN en nele ihi!

¹⁹It ap homi o Yehuda en il apma selatan fil wereg on de o Edom fam etma sebelik kuhupdeg welamuhup. Ne, it ap homi dom-dom kwe il barat mo obuk ik lauk fil etma wereg on en de wilayah ap homi Filistin on etma sebeloho fohup. Ne, it enunggul unuk Benyamin on en de o Gilead sebelik kuhupdeg welamuhup. Ne, it An nomaliki Israel on en de o Efraim fam inim Samaria fam inim sebeleg welamuhup.

²⁰It ap homi Israel enap il emberim utara fil etmano re enebe sabu hetdoho hwik-enebik lausa ma etmano en wamuhupdeg o Fenisia fam en de o Zarfat huli etma welamuhup. Ne, it ap homi Yerusalem on o Sardis sabu het-eneplug feseik lausa on etmano re wamuhupdeg o Yehuda fam en il apma selatan fil kota etma hwelahupdeg welamuhup.

²¹It ap homi o Yerusalem fam mun enomamne atlug welamuhup on en de o Edom sok laroho enowarik kuhupdeg de mun sebeloho fesehup. Ai fam de An TUHAN Nebe raja wereg lit melal-enepuk karuhuk,” ulug hweag-esebag. 1