Read Ninia Yali YUNUS 1 Bible Online

YUNUS 1 - Ninia Yali bible

YUNUS 1

¹ Nukoho eke salim de TUHAN en hun Amatai amloho Yunus anyo fam hweag-utuk kwit de,

²“Hat hebe re o Niniwe kota humon ai fam lakin. Lamihindeg de it ap homi etma wereg on en siag neg duruk ale ai An mundoho noluk atihikdeg welahi anggere, TUHAN en elehap henobahaku ulug hele ningdoho hweag-esa lakiyug,” ulug hweag-etfag.

³Airoho hweag-etfag famen de at Yunus endama en boruk kwit de, TUHAN embeselug ohwareroho amu kwe lamin ulug lebag. Lebagdeg de o Yope lauk men de ap homi kapal fam o Spanyol laul ulug durukmu aik lebag. Lebagdeg de kapal fam lauk on fahet onggo febagdeg de, kapal anyo ilonggoma kwik lebagdeg de it ap kapal walug lauk on nim de TUHAN embeselug lamin ulug o Spanyol yatma lebag.

⁴Airoho lauk kwit de at Yunus anyo ambe mun apma on anyo fam wambebagdeg etmano ying-atfagdeg, noho mun homogdoho nohobag. Airoho nohoruk kweleg de TUHAN en hol sielu ik laut fene mondorik watfag. Hol anyo humdoho warik waharuk kwit de ik ahum humdoho funag-lenggag angge duruk kwit kapal anyo erap duk ale debag. Airebag ma re it ap kapal walug katfag enap etmano enakol hum atfag. Enekol atfagdeg it enanggembu dewa etmano domog en let-nenebukwag ulug wol deheg, ne kapal anyo se amag ulug[1] de di angge su angge kapal ahummu kwelabeg[2] latfag on etmano ik ahummu hwik-eseheg, debag.

⁶Ne, it ap kapal walug lauk katfag on enowe anyo kapal ilonggoman ambe apma on anyo fam wambik lebagdeg duruk men de at Yunus anyo etmano nohorukmu hweahabag. Hebagdeg Yunus fam uruk kwit de, “Diroho atuk kweleg hat nohoruk kwit welahen au a? Holuk inamin. Inatlug de hat hakni apne wauk kahen on ai en nit enda nenepmisireg, nit nenebe alemat am no ulug del-nenebuk alereg lam no re ayonggo fein,” ulug hweag-etfag.

⁷Airoho hweag-etfagdeg inim lahaik watfag hag de it ap kapal walug lauk katfag on etmano en it-it uruk kwit de, “Indip san deheik fam nit nenebe alemat ahe ha ale aik waha, ulug nenenggik wal hakohon.” Ebagdeg enenggik wal hauk men de at Yunus fam dip ebag.

⁸Airoho atfag ma iren at Yunus fam uruk kwit de, “Demdoho haren siag dehen fam nit anggin on nenobam aha a? Folo-folo hweag-nesakin? Hat de nunggwelug suma lauk kahen? Hat de hunggul unuk ke on? Ne, hebe keman wahen?” Ulug hweag-etfag.

⁹Ai ebag ma at Yunus en onggo uruk kwit de, “An de nebe ap Ibrani on. An de nakni TUHAN Allah bohol fam wereg on, ik laut mel, kwenang ambue mel wal-debag on anyo apne wauk kahi on,” ulug hweag-esebag.

¹⁰Airoho hweag-esebagdeg de aren ekenim dindil esauk kwit de, “An den airoho apne wauk kahi on famen de, an den TUHAN ele sahale folug ohwaloho at embeselug yatma lamin ulug waharuk kahi au,” ulug hweag-esebag. Ai ebag ma it etmano en holfagdeg de mun ebenaheg enakol hum atfagdeg, at fam uruk kwit[3] de, “Hat de mun kwasikdoho dehen,” ulug betdebag.

¹¹Airoho uruk kweleg etano re ik sielu en haglabuk mun omamneroho warik watfag. Airoho durukmu re it etmano en Yunus fam uruk kwit de, “Ik ahum funag-lenggag angge duruk on au en nit nenowaruk no ulug de ik ahum hambuk ukwagdoho re niren hat keroho hobahaul” ulug hweag-etfag ma,

¹²at Yunus en uruk kwit de, “Indip an den dihi fam ik ahum funag-lenggag angge duruk kwit hit henowaruk ale aha ai an mundoho noluk aha. Ma re an nebe hamboko ik laut ahummu hwik-nealuhupmu re hol aplohok ai bok atmisi,” ulug hweag-esebag.

¹³Airoho hweag-esebag famen de it ap kapal walug lauk enap etmano en de enomamne hasimeg kapal ai ik ahum biatil ik elanma walug feik wamul ulug debag. Famen de ik sielu en haklabuk hum ale watuk kwit de ebenaheg sebel-enebuk ale atfag ma re wam fug ale atfag.

¹⁴Airoho atfag ai fam de iren TUHAN fam enele hwiruruk kwit de, “TUHAN nenakni, Hat henda hahayeg boruk kahen aleroho neg nenepuk kahen ai en de, ap su en nit fam siag ale eke nenobahakeik fug famen de ik ahummu hwik-esaul ai en de, at amep unggulmu nit nenobam folug siahap nenebehen hano ulug, hweag-hutuk kahe, nenakni,” ulug hweag-etfag.

¹⁵Airoho hweag-utlug de Yunus anyo hi-hambognalere ik laut ahummu hwik-esa wambebag ma, ik sielu en haklabuk waroho sebel-enebuk ale duruk katfag on anyo mundoho bok atfag.

¹⁶Airoho debag ma re it ap kapal fam lauk katfag on etmano TUHAN fam enakol atfagdeg de it enebe ik elanma aik lebagdeg TUHAN obahet waroho og-ereheg, niren di on su on duruk kamuhuk, ulug sali waroho TUHAN hweag-ereheg, debag.

¹⁷ It airoho duruk kweleg de TUHAN en ikan humon misig eke mondorik watfag ma re Yunus ebe ikan anyo ahummu bil-esebag. Bil-esebag ma re at Yunus anyo ikan ahummu etma nukoho henahan, hup henahan welatfag.