Read Ninia Yali YUNUS 2 Bible Online

YUNUS 2 - Ninia Yali bible

YUNUS 2

¹At Yunus ebe ikan ahummu wereg lit de akni TUHAN, Allah fam somban uruk kwit de diroho ebag,

²“TUHAN nakni, an nebe siagdoho wereg lit nele hum fam hayonggo fehimu, nele hesanggo holehen. Ap homi waratlug wambik waharukmu suma wereg lit let-nabin ulug hayonggo fehimu, hesanggo holehendeg fu nobahaken.

³Ik laut ahum apma, mun yit-yatma erahamu Haren hwik-nea wahen. Hwik-neehenma etma wereg kweleg, il omamne en an waling-nusug wereg laha. Ne, ik ahe sabuk en mel, ne ahum funag lenggag angge duruk on en mel an sal-nabik waharuk kaha.

⁴Airoho durukmu wereg lit, an nendama en de: Nakni TUHAN en At olohotma etmano en muko nobahaik waha. Ma re Hat hebe welahenma hobam mun eneg wereg etma, an nil hahuk fug ane behi.

⁵Airoho behimen de ik nambilik hwili aik lahaik waheg, ik laut yenggeleg on en maseroho kwelap nusug laheg, ne ik il apmane enggelangge wereg on etman nunggul fam hit-het nobahakeg, deheik.

⁶An de dom ik ahummu wereg on etma indipmu mag erahamu wambik wahi, sokole kelok mun hambuk-lele wareg ma wilibuk fug aleroho deg ma, mundoho-mundoho welaruhu hagma[4] etma wambik wahi. An nendaman de mundoho waratmin behireg, an den Hat hebe fam ebet healug wol-habihi. Mu re Hat hebe honggwareg hobam mun eneg on wirigmu wereg lit, an nele ihi on anyo hakit aik waha ma hol-nabehen. Nakni TUHAN, Allah! airoho hol-nabehendeg de Haren ik laut ahummu en oko lahabe nobahaik wahen.

⁸It ap kembu alemaroho apne wauk on etmano en Hat hobam enenda dipdeg lit, duruk kam famen duruk fug.

⁹Famen de an neg de Hat suni fam mit-mot habeheg, ne hobahet wam waroho og-hereheg, duhuk. Nenakni TUHAN Haren neg nit del-nenepuk kahenma re, An den diroho duhuk ulug sali wat-hirihi on aire mun dipdoho neg duhuk,” ulug somban ebag.

¹⁰Airoho ebag ma re, TUHAN en ikan anyo fam hweag-etfag ale higitdoho re, ikan anyo en Yunus ebe luko ik elanma wilibi feseik watfag.