Read Ninia Yali YUNUS 3 Bible Online

YUNUS 3 - Ninia Yali bible

YUNUS 3

¹Airoho at Yunus ebe wilibi feik watfag ma, TUHAN en Yunus hweag-etfag higitdoho eke bireneg on fam hweag-utuk kwit de,

²diroho hweag-etfag, “Yunus, o Niniwe kota lohon ai fam lalug ap homi etma wereg on fam de wene An den hobam fehi on ai hweag-esa lakiyug,” ulug hweag-etfag.

³Airoho ebag ma re at Yunus en de TUHAN ele holoho re o Niniwe kota lohon ai fam lebag. O kota aire mun humon deg ma re o ebe bumbuk kwe lauk kweleg neg de nukoho henahan duk alereg.

⁴ Famen de at Yunus ebe o kota ai fam mundoho aik lebagdeg, nukoho hunduko lauk katfagdeg, aren wene hweag-esauk kwit de, “Nukoho 40 en welatlug, o kota Niniwe welahepma suma bin langgoroho henowarikohoreg a!” ulug hweag-esebag.

⁵Airoho hweag-esaukmu re it ap homi o Niniwe on etmano en de furebebagdeg de enenda wene Allah en hweag-esebag on ai fam dip-debebag. Airoho debagdeg iren uruk kwit de, “Ap homi abirangge siburu na fug angge nenambilik hweang welamul,” ulug ebagdeg it enebe enesiag fahet enenda wat-dauk kwit wereg ulug enegdoho re, ap homi en belahi debelug wereg hag de it ap lohon mel doron mel sum karung on wan-debagdeg welatfag.

⁶Airoho duruk ale anyo raja Niniwe on anyo esanggo holfagdeg de at ebe raja wereg lit hwerieg latfag ma etmano en fol-folo wambik watfagdeg de asum kain on wereg lit wandeg latfag on anyo nonggoloho folug de karung on lahapfagdeg de ul fam huratfag.

⁷Airoho hwerieg wereg lit autsi nim en wene katukdoho ebagdeg de ap homi o kota Niniwe fam welatfag on etmano fam wene leho on wilipuk kwit de, “Hit ap homi henebe abirangge mel, wam sapi, domba mel wam amu on mel de ik, siburu mel, na fug angge welamek.

⁸Na fug angge wereg lit ap homi et wam et sum karung on lahaplug de, ap homi enebe domog en enenda wat-dauk kwit, it eke en enenda esa fug angge siahap enepuk ale ai embeselug de, enele ebenaheg omamneroho Allah fam ayonggo foukwag.

⁹Airoho duruk men, At Allah ahummu olok nit fam fesireg nenowaruhuk ulug fouk deg wereg on ai embeselug enda nenebuhu hwea?” Ulug wene leho on wilipfag.

¹⁰Airoho debag ma re Allah en il esebagdeg, “It ai enobabut mun siag neg duruk katswa on anyo embesehesa,” ulug de atam unggum enobam feselug enowaruhuk ulug ebag on anyo suhuloho embesebag.