Read Ninia Yali YUNUS 4 Bible Online

YUNUS 4 - Ninia Yali bible

YUNUS 4

¹Allah en ap homi etmano enobam unggum fesouk fug angge suhuloho embesebag ai fam de Yunus endama mun siag bebagdeg ahumo olok debag.

² Airoho bebagdeg aren somban uruk kwit de, “TUHAN nakni, an nobam en wiliplug wam fug kweleg de Haren airoho duhun a? Ulug de an de irihik fug men a? An de irihik boruk kahi. Hat de Allah mun enelaheg beheg, ap homi henda-enusug lit welaheg, henda sakoreg fam deheg, hobabut fetagdoho duk fug angge wereg lit ap homi siag duruk on enowaruhuk ulug enebug baldihin dehen, fobik aham deheg duruk kahen ai an mun noluk deg lit, ai fam an heiye o Spanyol lamin ulug lauihik ai.

³ Mu re TUHAN nakni, an nebe noluk welam alere mun nerim, nebe warale boruk kahi. Mu re nebe og-nabin,” ulug hweag-etfag.

⁴Ai ebag ma TUHAN en onggo hweag-utuk kwit de, “Hat de holok duk fug on famen holok duruk kahen,” ulug hweag-etfag.

⁵Airoho hweag-etfag ma at Yunus o kota en wilibik lebagdeg mo indip lahabik waharuk fil etma lebagdeg etma hwerieg latfag. Aren de o sabo eke witfagdeg de ilonggoma kwebagdeg hwerieg wereg lit de, ap homi kota Niniwe on enobam keroho atmisi ulug nangno hauk kwit il welatfag.

⁶Airoho wereg ma re, At TUHAN Allah en de at Yunus fanoroho kunmu welamag ulug hobut eke wilibi febag. Airoho wilibi fesebag ma re at Yunus ebe endama ahayeg hebagdeg kunmu welatfag.

⁷Famen de likia hubet o hil yingguruk kweleg de Allah en imbalo eke mondorik lebag ma re sabu hag angge anyo aeg en balfag ma sawet atfag.

⁸Airoho debag ma, Allah en de hol ahanhan wereg on o mo lahabik waharuk fil etman fun ha wamag ulug mondorik watfag ma, mo ahanhan en de Yunus unggul owag han na hag ale duruk kwit de Yunus ebe ape moruk ale debag. Airoho debag ma re enda mun si atfagdeg de aren uruk kwit de, “An nebe noluk wereg ale nerim, warale fano ahi!” bebag.

⁹Famen de Allah en at Yunus fam uruk kwit de, “Hat de sabu ai fahet hendama holok bouk fug on famen duruk kahen!” Ulug hweag-etfag. Ma at Yunus en onggo uruk kwit de, “An de nahummu nolok duk aleroho at dihimu re nebe waratuk ale halug oho fano neg,” ulug hweag-etfag.

¹⁰Ai ebag ma TUHAN en hweag-utuk kwit de, “Sabu aire hup misig fam neg wilipsireg de nukoho ombolim on fam de sawet atsi. Ne, sabu ebe hat henggik fam en yatihin on fug, ne hohol yiko amug kwelapuk katihin on fug. Famen de sawet aha on ai fahet nunggwelug hat henda wat-dauk kahen.

¹¹Haren sabu ai fahet famen ohore hendama mun siag aha ai. Ne, An den de ap homi o Niniwe kota lohon ai fam ap homi enomaliki siag duruk ale mel fano duruk ale mel eneg deg ale furoho enoluk deg fug on enebe 120.000 en mel, enowam hum-hamdoho mel, de nenda-enebuk fug alereg behen a? Nenda-enepuk kahi,” ulug hweag-etfag.