Read Ninia Yali BILANGAN 10 Bible Online

BILANGAN 10 - Ninia Yali bible

BILANGAN 10

¹TUHAN ele Musa fam hweag-utuk kwit,

²“Bohweap trompet biren angge no perak sahaloho ebe on fam neg hilingguhup on etare ap homi kabog-dik wamag ulug wol-enebeheg, wilibik lowag ulug mingming-enebeheg, duruk on fahet hilinggiyug.

³Birenet angge eta fam ele yatdoho fururuk karuhun halug de, ap homi re enebe hat haluluk maseroho An Nobam Sabo sokolma etma kabog-dik waharuk kamuhup.

⁴Ne, we misig neg fururuk karuhun halug aire it ap enowesi kaindeg on omano neg hat hebe maseroho kabog-dik waharuk kamuhup.

⁵Ne, bohweap trompet lahe hirik-horogdoho fururuk halug de, it ap suku mo indip fil o sabo saloho wereg on etma wiliplug lowag ulug duruk karuhun.

⁶Ne, bireneg angge hirik-horogdoho fururuk halug de it ap suku selatan fil wereg on wiliplug lowag ulug. Anggere ele horog-horog uruk on etma re it ap homi holduk on wiliplug lowag ulug,

⁷ne ele yatdoho fururuk halug de ap homi abirangge kabog-duruk kamag ulug.

⁸Bohweap trompet etma fururuk kamuhup on de it imam, hun Harun omaliki etmano en neg fururuk kamuhup. Aire wene melaleg hiren higitdoho duruk kwit neg mundoho-mundoho welamuhup on.

⁹Ne, hit en henanggwenang fam wereg ma it henaselei on en hinim weim yabik waharukmu hiren henanggwenang along baloho weim yapuk kwit de bohweap trompet etma fururuk kamuhup. Airoho duruk fam de An henakni TUHAN Allah anyo en heneselei on enenggikmen let-henebeg, del-henebeheg duruk karuhuk.

¹⁰Ai en eke nukoho hit henahayeg en duruk salim inim, Bigalem Keron fam soni esereheg, ne nukoho amu-amu on omano mot-deheg, duruk kwit etma nim, hiren wam waroho yal-nirik waharuk kwit inim, ne anggerang owam walug yal-nutuk kwit inim de bohweap trompet aire fu-neg duruk nu. Ai fam de An den hit let-henepuk karuhuk. Hit henakni TUHAN Allah re we An neg,” ulug hweag-etfag.

¹¹Tahun bireneg on fam it ap homi enunggul unuk Israel on o Mesir embeselug wilibik watfagdeg de, bigalem bireneg on fam tanggal dua puluh wereg kweleg de anggulog anyo o TUHAN Obam Sabo emberimmu en lahabag.

¹²Airoho lahabag ma re it ap homi Israel on enebe deg aleroho keram on en de fotogdoho on huli lauk kwit de o Sinai leimu etmano embeselug lebag, ne anggulog anyo re it ap homi enebe o Paran leimu aik watfagdeg duruk men de etma bok aik watfag.

¹³TUHAN en wene melaloho Musa fene en hweag-esebag ale muko keram on wiliplug lebag on de ai.

¹⁴Atamdam de it esan Yehuda awiyog sum apma sebereg wereg on, lohwal eke laheg eke laheg lebag: Hun Aminadab amloho Nahason aire it enunggul unuk Yehuda esan lohwaleg on melal-enepuk katfag,

¹⁵ne hun Zuar amloho Netaneel en de it enunggul unuk Isakhar fam lohwaleg on melal-enepuk katfag.

¹⁶At hun Helon amloho Eliab ai en de it enunggul unuk Zebulon on fam lohwaleg on hwal-enebil lauk katfag.

¹⁷Ai en TUHAN Obam Sabo anyo meiyale folug de, it enunggul unuk Gerson on nim, Merari on nim en O Sabo anyo harulug lauk katfag.

¹⁸Ai en enombolim de it esan Ruben awiyog sum apma sebereg wereg on, lohwal eke laheg, eke laheg lebag: ne hun Syedeur amloho Elizur en de it enunggul unuk Ruben fam on lohwaleg wereg on melal-enebil lauk katfag.

¹⁹Hun Zurisyadai amloho Selumiel ai en de it enunggul unuk Simeon on lohwaleg anyo melal-enebil lauk katfag,

²⁰ne hun Rehuel amloho Elyasaf ai en de it enunggul unuk Gad on lohwaleg anyo melal-enebil lauk katfag.

²¹Ai mundoho lil lauk em de it ap Kehat on de munangge manangge ousa on horeg welatfag on etmano harulug lauk katfag enap ai lebag. It o sabo fobik ekema wiroho welamukoho halug de o TUHAN Obam Sabo anyo dam wiri feil lauk em etmano aik lauk katfag.

²²Ai en it enombolim de it esan Efraim awiyog sum apma sebereg wereg on anyo esan eke laheg, eke laheg lebag: hun Amihud amloho Elisama ai en de it enunggul unuk Efraim on lohwaleg anyo melal-enebil lauk katfag,

²³ne hun Pedazur amloho Gamaliel anyo en de it enunggul unuk Manasye on lohwaleg anyo melal-enebil lauk katfag,

²⁴ne hun Gideoni amloho Abidan en de it enunggul unuk Benyamin on lohwaleg anyo melal-enebil lauk katfag.

²⁵Ahaema fotogdoho re it esan Dan awiyog sum apma sebereg wereg on lebag. It aire it esan fomane sebereg wereg on anyo enambol fil kahal-enusug lit lauk katfag on. It enebe re esan eke laheg, eke laheg lauk katfag: Hun Amisyadai amloho Ahiezer ai en de it Dan on esan lohwaleg ai melal-enebil lauk katfag.

²⁶Ne hun Okhran amloho Pegiel ai en de it enunggul unuk Asyer on lohwaleg anyo melal-enebil lauk katfag,

²⁷ne hun Enan amloho Ahira ai en de it en unggul unuk Naftali on esan lohwaleg ai melal-enebil lauk katfag.

²⁸It ap homi Israel on esan lohwaloho atam dam en ahaebog huli lebag ale re ai, it enebe o oko ekema lauk kwit de esan eke laheg, eke laheg lauk katfag.

²⁹Musa en ombarik Hobab hun Rehuel amloho ap Midian on anyo fam uruk kwit, “Nit de kwenang At TUHAN en uruk kwit de hit-og-hesahuk isimu etma lahuk. TUHAN en de it ap homi Israel on fahet mun fano angge neg abug hweag-esasi. Anggere ninim lakohon, niren hat hobam fano ale neg hobahakuk,” ulug hweag-etfag.

³⁰Airoho ebag ma at Hobab en onggo uruk kwit de, “Nombarik fano hweag-nerehen famen de, an de nobam indipmu sombandoho lamin,” ebag.

³¹Ai ebag ma at Musa en de, “Hat nit nenobahalug lamihin fug, hat o leimu suma niren o sabo witil lama re mun holuk deg ma angge re, hat nit fahet kwe hweag-nesauk on aruhun.

³²Hat ninim lahun halug, TUHAN en mun ale man ale fano ale nit fahet duruk karuhu on etma re, niren hat fahet oho fano ale duruk kamuhuk,” ulug hweag-etfag.

³³It enunggul unuk Israel o Sinai Dom TUHAN weregma etma embeselug wiliplug lebagdeg de nukoho henahan hunduko lebag. Lauk kwit Peti Sali wene wareg angge yohwareg on anyo re it enalukwema walug laukmu it enebe enobam sabo saldukmu ulug heraril lauk katfag.

³⁴It o saboman wilip atlug lauk kweleg, Anggulog TUHAN en on anyo re nukoho angge hundig it enemberimmu wereg latfag.

³⁵ Hundig-hundig Peti Sali wene wareg anyo harul ulug duruk li em de, Musa en uruk kwit de, “TUHAN nenakni Hebe inamin! Haren it haselei on del-fol esaukmu ap homi Hat enerim hapuk on de heiye wilipuk kamuhup,” ulug uruk katfag.

³⁶Ne, hundig-hundig Peti Sali wene wareg anyo walug lalug bok aik laukmu etano aik laukmu re, Musa en uruk kwit, “TUHAN nenakni! Sombandoho watlug it ap homi Israel on enebe enahain elekwe hum-hamdoho wenahauk fug on au enobam aik ma,” ulug uruk katfag.