Read Ninia Yali BILANGAN 11 Bible Online

BILANGAN 11 - Ninia Yali bible

BILANGAN 11

¹Nukoho eke salim de it ap homi omano en anggin-fanggin hauk katfag ale anyo fahet TUHAN fam ngururuk ale indip debag. Airoho ngururuk katfag ale anyo holfagdeg TUHAN mun olokdoho re indok it enobam mondorik watfag. Indok anyo it enesahali kwe omano sep hun nauk kwit de it enobam sabo fomane han nebag.

²Ai duruk en de ap homi etma on Musa fam let-nenebin o ulug ngaruruk katfag. Nggaruruk en de Musa en TUHAN fam somban ebag ma re, indok anyo nahul atfag.

³Airoho atfag ale ai fahet de, o eta unuk de Tabera,[2] soalfag aire etman TUHAN ahaindok it enenggelegma kulung ik watfag ma ulug soalfag.

⁴Ap homi Israel on kwe fam laukmu etma re ap bog on oho ininim lauk katfag. Ma re it ai en de ino angge on nela aho ulug enenda boruk katfag, ne it ap homi Israel on oho re TUHAN fam ngururuk ale indip debag. Indip debagdeg iren uruk kwit de, “Yehei! Nit nenobahet ino angge on welalep e!

⁵Nit de o Mesir en ikan mel, kuluk mel, hobut mel, bawang kuron mel, bawang mebon mel, bawang putih on mel we onggo eleg angge nauk katuhuk ale fahet ebet hauk kahereg ahi!

⁶Ketia re nit nauk angge amu on elegma we manna amu neg kumu hauk kwit nenomamne mundoho eleg atuk,” ulug uruk katfag.

⁷ Manna ai orohole re anggen ilonggoma on dot-dot angge on hag ebe kut deg man de sel nim deg angge.

⁸ O hup anggo re manna ai lil nim mangnoroho o sabo saleg sahali kwe wambik waharuk katfag. Ne, hubet-habet de ap homi lag-wag uruk kwit ondol dalug kwik waharuk katfag, airoho ondol dalug de iren kwaniruruk angge fam damuleheg, berelduk angge fam bereleheg, durukmu tepung atuk katfag, ai en de iren kue abung-abang on fam en sap-sabel deg angge wutuk katfag. Unduk de kue no zaitun ahalue nim areroho weratuk on unduk hag duruk katfag.

¹⁰Ap homi Israel on omano enoban sabo sokole kwe etma kabog-kabog heg unduhuk lit de enele mul-mul ale uruk on Musa esanggo holfag. Ai en de TUHAN olok ahe enobam laharuk ale en de Musa ahummu siag atfag.

¹¹Airoho debagdeg de aren TUHAN fam hweag-utuk kwit de, “Nunggwelug Haren an nobam anggolomireg ale oma nobaharuk kahen? Haren an nobam hahayeg boruk kahen fug ane? Ap homi ai enobahet nunggwelug an nobam neg akniap atlug welamag ulug nobam ferihin?

¹²An den it au nahummu enepihikdeg endag enepihik a? Nunggwelug Haren an omalik hwalduk on en omalik walinggoho foroho hag amin ulug miming-napihin mu, ai fam an den it enebe o kwenang Haren it enambu-enombasi fam abug og-esauihin mu etmano og-eneplug lauk kwit hundig-handig hwal-enepil lauk katmin?

¹³Hakin, iren hundig-handig ino angge on heng neg uruk su. Ne, an den it ap homi abirangge su enobahet ino angge on kema herarik lamin?

¹⁴Anggin hum ale aire an den neg harihi ha fug alereg; An den de yabuk aire mun anggin hum deg!

¹⁵TUHAN Haren hundig-handig anggin aireg ale on neg an nobam airoho nobaharuk karuhun halug de, an Henda neakin; an de anggin fanggin aireg ale au eke hauk karuhuk fug anggere Haren nebe binggi nowatmihin fano,” ulug hweag-etfag.

¹⁶Ai ebag ma TUHAN en Musa hweag-utuk kwit, “Ap homi enunggul unuk Israel on enesahalimu en ap enowesi log-lohon enebe tujuh puluh en it enebe ap homi enunggul unuk etma melal-enepuk kam alereg ulug boruk on neg kabog-debesein. Kabog-debeselug de it enebe hondog-eneplug An nolohotma an Nobam Sabo salegman ilonggoma etma watlug de, it enebe etma hat haluluk unduhuk lamag ulug hweag-esakiyug.

¹⁷An Nebe wambik watlug de etan Hat hinim nele marik wambik waruhuk, ne An nomamne foma hat og-hitihik on anyo, it oho An den og-esahuk. Ai fam de iren hat letdoho anggin-fanggin ap homi au enobahet hauk kahen on etma let-heauk kamuhup, ne hat hamu neg akniap atuk karuhun fug.

¹⁸Ketia re it ap homi enunggul unuk ai on fam wene su on hweag-esakin: Sono hit ino angge on nahup anggere, henebe henonggwareg en ho-dakiek! Hiren ino angge on nela ulug oba yareheg, ngureheg, duruk kahep on etma re TUHAN mundoho holsi, ne hit ai fam ambiangma hahup alere o Mesir en etma re siag famen de mun fano ale on hahup. Ketia re TUHAN ino angge on og-hesamisimu re hit nahup.

¹⁹Hit nahup ale aire, we nukoho misiham birenam neg de fug, ite nukoho foaben ane, numen ane, dua puluh en ane neg de fug,

²⁰ite bigalem misig hunduko hit nauk kamuhupmu, ai fam hit henebe ouk henebeheg, me wireheg, duhup. Wene ai aruhu ale aire hiren TUHAN At henenggelegma wereg on anyo domako embeseruhup ai fam hahup. Ne, eke hiren At olohotman oba yareheg, ne o kwenang Mesir omano embeselug waharuhuk ulug ngureheg, duruhup ai fam hahup ulug hweag-esakin,” ulug hweag-etfag.

²¹Ai ulug hweag-etfag ma Musa en TUHAN fam hweag-utuk kwit, “Ap homi enunggul unuk enap an den og-eneplug lauk kahi on sure enebe seberoho re 600.000 en degman re Haren ino angge on bigalem misig fahet higitdoho og-esauk karuhuk ulug ehen ane?

²²It enebe homoroho nowag ulug sapi mel domba mel de kema wereg angge oko senggeluk alereg? Ikan laut ahummu wereg on etman it ilitdoho nowag ulug og-esa alereg a?” ulug ebag.

²³Airoho ebag ma TUHAN en onggo hweag-utuk kwit, “An Nalong welahi on aire huli-huli wereg a? An den ihi ale ai demdoho aruhu ane, eleg a ulug hat hil hahun men!” ulug ebag.

²⁴Ai hweag-etfag ma, at Musa anyo wilip atfagdeg TUHAN en Musa fam ebag ale omano it ap homi anyo fam hweag-esa lebag. At Musa en it ap melal-enepuk on enebe tujuh puluh en kabog-debesabegdeg de O Sabo TUHAN obam oluluk etano walinggoho inaik wamag ulug hweag-esebag.

²⁵Airoho hweag-esebag ma re TUHAN ebe anggulog anggelegma wambik watfagdeg Musa nim ele matfag. TUHAN en de At along Musa og-etfag on anyo fomane oko re it ap melal-enepuk on enebe tujuh puluh en anyo og-esebag. Ne, TUHAN Aheime anyo it enemberimmu wambik waharuk li em de, iren nabi en uruk katfag hagdoho enele ebag famen de we elamna hagdoho neg ebag.

²⁶Ap melal-enepuk on tujuh puluh eta on enesahalimen enebe biren on, eke Eldad nim, Medad nim eta TUHAN Obam Saboma la fug angge enobam saboma bok atfagdeg welatfag. Wereg ma TUHAN Aheime anyo it ap biren etano enobam wambik watfag ma enele nabi on enele hag uruk katfag.

²⁷Airoho duruk ale en de, nimi sauwe on eke wilibik lebagdeg buroho it ap biren Eldad nim Medad nim en duruk ale anyo Musa hweag-irik lebag.

²⁸Hweag-irik lebag ma at Yosua hun Nun amloho sauweman angge Musa let duruk katfag on anyo en, Musa fam hweag-utuk kwit de, “Nakni it ai bale foukwag ulug hweag-esakin abi!” ulug hweag-etfag.

²⁹Hweag-etfag ma Musa en onggo hweag-utuk kwit de, “Haren nunggwe ulug an fahet airoho wenggel-hauk kahen? An den de it ap homi enunggul unuk au abirangge At Aheime og-eselep, ne it enebe au abirangge re nabi neg alep aho ulug boruk kahi!” ulug hweag-etfag.

³⁰Airoho ebagdeg at Musa anyo ap homi Israel on melal-enepuk on enebe tujuh puluh en etano nim o saboma sombandoho watfag.

³¹Fetagdoho etano TUHAN en hol sielu laut fil etman mondorik watfag ma; waharuk kwit suwe yomalmal hag on puyuh anyo humdoho horog kwe daril walug watfag ma re enebe kwenang emberimmu re we satu meter en neg daruruk katfag. Suwe omano re ap homi enobam sabo wereg kwe omano daril noruk kwit de we etan yatdoho hagdoho hag fug we il misig hagdoho etma daril watfag.

³²Nukoho anyo hundig, hup hundig nukoho ombolim on hundig de ap homi omano en suwe ai enahayegdoho sen dauk katfag. Ap homi enemu domog en de we sebeloho hag de seribu kilogram en hag neg sen dauk katfag. Suwe etmano re iring omag ulug enobam sabo walinggoho etma foruk katfag.

³³It nauk kwit ino dindik on humdoho wereg ma re TUHAN en it enunggul unuk ai on fam olok enepuk kwit de ouk mun siag on it enesahalimu mondorik watfag.

³⁴Ai fam de o etare unuk Ap Sibogle On salegma soalfag. Aire o etan ap homi sibogle on waratfag ma sal-enepfagdeg soalfag.

³⁵Etman de it ap homi enunggul unuk ai on anyo o oko re o Hazerot lebagdeg o etma enobam sabo witfag.