Read Ninia Yali BILANGAN 12 Bible Online

BILANGAN 12 - Ninia Yali bible

BILANGAN 12

¹Hun Musa en de ohwe hwe o Kus on eke hwelebag ma, ai fahet Miryam nim Harun inim en Musa fahet enalitno debag. Iren bet-duruk kwit de enele diroho ebag:

²“TUHAN ele re we Musa nim neg matuk a? Nit fene en oho At ele matuk fug no a?” ulug ebag. Airoho urukmu TUHAN en esanggo holfag.

³Musa re at ap enda sebeleg on, ap kwenangma wereg on oma ha deg kweleg famen at de along deg latfag.

⁴Fetagdoho etano TUHAN ele Musa nim Harum nim Miryam nim hweag-esauk kwit de, “Hit henebe henahan eta An Nobam Saboma manu,” ulug hweag-esebag ma re, it etano ebag ma omano lebag

⁵ne TUHAN ebe anggulog anggelegma wambik watfag. TUHAN ebe Obam Sabo sokolma etano unduhuk lit de, Harun nim Miryam nim wol-enepfag. Wol-enepfag ma re it biren etano akit lebag,

⁶ne lebag ma TUHAN en hweag-esauk kwit de, An nele uruk kahi on su hit henesanggo holiek! Hit henesahalimu etma ap nabi on eke wereg la man de, “An nebe at akit ena og-hauk hag fam enam aheg, a fam at ninim nele mag-ereheg dihi ha alereg.

⁷ Famen de at namingming angge Musa nim de airoho duruk kahi fug. It ap homi An nomaliki etma enesahalimu en de at neg de mun dipdoho neg duruk on.

⁸An den de at ninim de nenerohole misigmu atlug mun enamegdoho nenele matuk kahe, ne we hwenaroho re fug. Ne, An nobabe oho re at mundoho neasi! Nunggwelug hiren An namingming angge henambong seroho henalitno duruk kahep?” ulug hweag-esebag.

⁹Ai ulug TUHAN en it biren ai fam mun olok hum fam bet-enepfagdeg, At ebe lebag.

¹⁰Anggulog anyo TUHAN Obam Saboma anyo en embeselug laharuk kweleg etano re, hwe Miryam anyo ebene yebil mun siag on saha ebag; ahap fenere kuron kapas hag deg latfag. At Harun hebeloho Miryam il fu hauk men de Miryam ebene mundoho yebil siag on saha ebag ma hebag.

¹¹Aireg ma hebagdeg aren Musa hweag-utuk kwit, “Nenowe, nit let-nenebin, nit nenenda sohou fam siag dehe on ai fam nit nenobam ouk-bouk ale etma enebukwag ulug embesouk fug.

¹²Embesemihin mu at ai omalik fou ket endag-atuk kwit wareg angge ino foma fil mun filik durukmu endag-atuk anyo hagdoho amag ulug embesouk fug,” ulug hweag-etfag.

¹³Hweag-etfag ma Musa en TUHAN fam hwiruruk kwit, “Nakni Allah, at Haren hilinggin ulug heng-hapuk kahi!” ulug hweag-etfag.

¹⁴ Hwirebag ma TUHAN en onggo hweag-utuk kwit de, “Akni en olohotma wasubag sup helepman de, nukoho sabiren eta fam at enggali en duruk kalep fug a? At ebe o sabo wirigmu etman nukoho sabiren amumu welamag ulug wilibi feiyek, ne ai mundoho debelug neg de at nikangge kwik waruhu fano!” ulug hweag-etfag.

¹⁵Airoho ebag ma re at Miryam anyo oko dagma nukoho sabiren feik lebag, ne it ap homi anyo re o etano en oko amumu la fug angge weregman neg de Miryam nikangge o saboma fano kwik watfag.

¹⁶Airoho dulug neg de it anyo o Hazerot embeselug de o Paran leimu etma enobam sabo wirik lebag.