Read Ninia Yali BILANGAN 13 Bible Online

BILANGAN 13 - Ninia Yali bible

BILANGAN 13

¹TUHAN ele Musa fam hweag-utuk kwit,

²“Ap homi Israel on melal-enepuk on enesahalimu etman enunggul unuk hundomog enebe misig heg it melal-enepuk on neg kwenang o Kanaan An den it enunggul unuk Israel on og-esahukmu anyo inil o lowarik lowag ulug mon-enebin,” ulug hweag-etfag.

³Hweag-etfag ma At Allah ebag ale etano higitdoho Musa en o Paran lekma etma wereg lit mon-enepfag. Ap enebe eta abirangge re it ap homi Israel on enenggelegma melal-enepuk katfag on neg mon-enepfag: [Enunggul unuk] — [Melal-enepuk katfag on] Ruben on — Syamua hun Zakur amloho Simeon on — Safat hun Hori amloho Yehuda on — Kaleb hun Yefune amloho Isakhar on — Yigal hun Yusuf amloho Efraim on — Hosea hun Nun amloho Benyamin on — Palti hun Rafu amloho Zebulon on — Gadiel hun Sodi amloho Manasye on — Gadi hun Susi amloho Dan on — Amiel hun Gemali amloho Asyer on — Satur hun Mikhael amloho Naftali — on Nahbi hun Wofsi amloho Gad on — Guel hun Makhi amloho

¹⁶It ap at Musa en o ai inil o lowarik lowag ulug mon-enepfag on de enebe eta. Hosea hun Nun amloho aire Musa en unuk ahamdoho keron Yosua soalfag.

¹⁷At Musa en it ai lakiek ulug mingming-enepuk kwit de, it enobam wene diroho febag, “O il utara fil etma lahupdeg de, etman kwenang Kanaan fam en il selatan fil etma lakiyug, ai en de duk wereg fil etma lakiyug. Utara fil etma lahupdeg de, bekit lahupdeg o sili dom fene wirig kwe etma lakiyug.

¹⁸O kwenang ai nangginig laruhu e, furoho hinil o lowariyug. Ap homi re humdoho welamuhup ane dorangge a, ne it enebe enomamne deg lamuhup ane maben deg lamuhup ane ulug furoho esakiyug.

¹⁹Kumu hauk kwit de o kwenang etma fano deg a siag deg a ulug mel, ne ap homi re enebe o bumbuk dotdeg kwe wereg a, ite o kota elehet oko kwelabeg on ilonggoma wereg ane ulug mel, lowariyug.

²⁰Henenda hambuk debelug de kwenang de hesilig a ne e wilibig on humdoho wilibig a, ulug kumu hakiyug. E o etma wilibig on en anggen yihig eke walug waharuk ale henapeleg amuhup hayog,” ulug hweag-esebag. Ne, eta li em de anggur anggen yihiruk ale indip duruk li em.

²¹Airoho hweag-esebag ma re it ap anyo lebagdeg de utara fil etman de o kwenang anyo inil o lowatil de o Zin leimu en il selatan fil en de il emberim utara fil o kota Rehob huli, kobokwe o Hamat lauk on horogma etma huli lebag.

²²Keram-keram de it enebe o kwenang ai en il selatan fil etma lebagdeg de o kota Hebron ap homi Ahiman on mel, Sesai on mel, Talmai on mel, hun Enak ambiangma on etma wereg ma aik lebag. O Hebron aire o Zoan Mesir fam anyo owan wiruk eleg kweleg tahun sabiren atam witfag.

²³Lebagdeg de it anyo o Eskol[3] donggoma etma aik lebag. Etan de iren anggur omalo misig mun anggin anggolo on balfagdeg iren e fam ap biren en bearoho walug watfag. Iren de e delima anggen foma nim ara anggen foma nim oho walug watfag.

²⁴It ap Israel on en anggur anggen balug watfag ai en de o etare unuk Eskol uruk katfag.

²⁵O ai inil lowatuk kweleg neg nukoho 40 en debagdeg inil o lowarik lebag enap anyo sombandoho watfagdeg

²⁶Musa fam mel, Harun mel, ap homi Israel on abirangge o Kades en o Paran leimu kabogdeg wereg on etmano abirangge fam mel, hebag ale etmano dindilik watfag. Iren de inil hebag ale etmano dindilfagdeg e anggen walug watfag angge etmano mel unug-esebag.

²⁷Iren enele Musa fam uruk kwit de, “Nit de kwenang ai mundoho o lowatuhuk men de kwenang etma mundoho di angge su angge wereg neg, ne mun hesilig latsi, ne o etman anggen de dorangge dia.

²⁸Famen de ap homi o kwenang ai fam wereg on de enomamne hum enap neg. It enobam kota re humon, ne elehet oko kwelabeg on deg latsi. Ai en ap enowag hweise on enambiangma on etma wereg ma esauhuk.

²⁹It ap Amalek on de il selatan fil etma wereg ma esauhuk, ne it ap Het on mel, Amori on mel, Yebus on mel, etma re enobam duk kwe etma welatswa; ne it Kanaan enap neg de ik laut horog kwe ne Ik Yordan horog kwe etma welatswa,” ulug hweag-etfag.

³⁰Airoho hweag-etfag famen de at Kaleb en de it ap etman Musa fam enele nginog duruk katfag on etmano enenda hambuge febagdeg, at Kaleb en uruk kwit de, “O kwenang aire ketia neg niren bin kuldeg de nit hwelag kul, nit de it enalong elehapdoho fesouk ale fahet nenomamne deg lahe anggere,” ulug ebag.

³¹Airoho ebag famen de ap Kaleb inim sombandoho watfag on omano en uruk kwit de, “Eleg, it niren enowarik kwehe ha fug alereg. Ap homi o kwenang etma fam wereg on de nit nenebe maben deg kweleg it enomamne hum deg,” ulug ebag.

³²Airoho ebagdeg de iren wene seiale on iren inil ha lebag ale omano fahet ap homi Israel on enesahalimu etmano saharik lebag. Iren uruk kwit de, “O kwenang etma re mun nenamelmel deg, ne it ap homi enebe neg fam en oho namelmel neg. Ap niren esauhuk on etma re enebe hum enap neg.

³³ Ap nit en esauhuk on etma re enowag hweise enap, ap Enak ambiangma on etma esauhuk. It nim higit hehe ha man de nit de nenebe bulue hag, dik-demdoho angge re nit fahet iren oho airoho bouk alereg,” ulug ebag.