Read Ninia Yali BILANGAN 14 Bible Online

BILANGAN 14 - Ninia Yali bible

BILANGAN 14

¹Hup hundig anyo re ap homi Israel on anyo enele ngaruruk kwit oba yatuk men neg debebag.

²Iren de enele mul-mul ale Musa nim Harun nim enobam uruk kwit diroho ebag, “Nit o Mesir etman warala man de mun fano neg. Ite, o lek ma suman oho fano neg! Nit de waramul aire fano!

³Nunggwe fahet At TUHAN en o kwenang ai fam nit og-neneplug lahu? Nit dog ambiangman waramuhukmu re nit nenohwesi mel, nenomaliki mel ap en het-eneplug feseik lahup. Nit de sombandoho o Mesir lahe ha ale aire mun fano neg!” ulug ebag.

⁴Airoho ebagdeg de it-it omano eke en eke fam enele matuk kwit de, “Nit de nenowe melal-nenepuk on eke momal dauldeg de sombandoho o Mesir lakohon!” ulug uruk katfag.

⁵Airoho uruk mu re, it Musa nim Harun nim ap homi enelohotma etano enorohole belabeg sahaun-debag.

⁶Yosua hun Nun amloho anyo ha Kaleb hun Yefune amloho anyo ha it ap inil hwalik lebag on etmano enesahalimu it biren etano re fong waroho re iren enesum miog-mayogdoho embesebag.

⁷Iren de enele ap homi abirangge omano fam uruk kwit de, “O niren ninil hwalik lauhukmu etma re mun fanik-fanoma.

⁸At TUHAN en nit fam enda ahayeg nesauk kwit halug de o kwenang ai fam Aren nit og-neneplug etma lahureg, o kwenang munangge-manangge mundoho wereg neg deg ma, kwenang mel mun hesiligmu etma re nit og-nesahu.

⁹ Hiren TUHAN ele sahalduk eleg, ne ap homi o ai fam wereg on etma fahet henekol enebeheg duk fug, niren de we seroho it enalong elehap debesehuk lit deg. It enalong baloho fahat-enusug on de it enobahalug lasi, ne TUHAN de nit nininim wereg anggere, henakol duk fug,” ulug ebag.

¹⁰Airoho ebagman de, ap homi etmano en helep hwik binggi enowatul ulug duruk li em de, fetagdoho etano ap homi omano en inil hauk men de TUHAN aseleg mun asinandi hag seleg humon At Obam Sabo emberimmu etmano enam atuk mu hebag.

¹¹TUHAN en Musa fam hweag-utuk kwit de, “Ap homi aire An nele sahale folug neg duruk men de kea huli welamlusa? Ke huli iren An nobam demdoho bouk eleg angge welamlusa? An den de it enesahalimu etman along on hum-ham ale duruk kweleg famen etma re?

¹²An den de ouk humon enobam da kete-ya kete lauk on mondorik waruhuk on fam mundoho elehap debesehuk. Famen hat neg de An den ap homi enunggul unuk humon ne enebe mel de it au maben deg kweleg enomamne humon eke enakniap hobahakuk!” ulug hweag-etfag.

¹³ Airoho hweag-etfag ma, Musa en TUHAN fam uruk kwit de, “TUHAN nakni, Haren homamne fam nit o Mesir en og-neneplug wilibik waharihin dehen, deg ma wene ai fahet de ap homi Mesir on en holuhup!

¹⁴Ne, iren de TUHAN Haren nit nininim wereg latihin ale anyo ap homi o kwenang su fam wereg on fam dindilswa ma enesanggo holuhup. Ne, iren holduk kwit oho re Hat hebe nit nenalukwema lauk kwit o nukoho anggulug unduhuk on fam ne hup anggo indok ambulbul fam og-neneplug lauk kwit hebe enam atuk katihin ale anyo enesanggo holswa.

¹⁵Haren homaliki su abirangge enowaruhun halug de, Hat handung-dang welahen ale ap homi enunggul unuk amu on en hol hausa on omano en uruk kwit de,

¹⁶Haren o kwenang abug og-esauihin mu etmano og-eneplug la fug alereg lit, Hat homaliki enebe o leimu en binggi enowatsi uhup.

¹⁷Aireg ma re TUHAN nakni, Hat homamne welahen ale anyo nit nenobam unug-neseheg, ne Haren sali irihin ale anyoroho deheg din ulug an den heng-hapuk kahi. Haren hele uruk kwit de,

¹⁸ An de TUHAN, deg lit folo-folo nolok atuk kahi fug. An den de nenda hundig enebeheg, dipdoho neg mun ha fugdoho duruk kahi ale unug-esauk karuhuk. Ap homi siag duruk on mel, An nele sahaloho duruk on mel de An den enesiag napelehapdoho feseruk karuhuk. Airoho deg famen de it enaknisi en siag duruk on de onggo it enomaliki nim enombasi nim, it enambiangma en henahan ohwan huli endag-amuhup on etma fam feseruk karuhuk, ulug irihin.

¹⁹Ketia re TUHAN nakni, Haren nit nenelaheg humon nenepuk kwit, Hat en hele sali wat-nesauihin on anyo dipdoho neg duruk kahen on deg ma re, ap homi su o Mesir embeselug wilibik wahausa liem enesiag hapelehapdoho feseruk katihin anyo hagdoho it enesiag hapelehapdoho fesein ulug an den heng-hapuk kahi,” ulug hweag-etfag.

²⁰Airoho heng debag ma TUHAN en onggo hweag-utuk kwit, “Fano, haren heng ehen ale airoho An den it enesiag napelehapdoho fesemin.

²¹ Famen de An nonggwareg fahetdoho, An noluk wereg lit o kwenangma suma nalong welahi on anyoroho sali watuk kahi ai,

²²Ap homi aure misig ulug oho eke oluk wereg lit kwenang An den og-hesahuk ulug, it enomba-enambu fam sali wat-esauihik mu ai kwik lahup mun eleg. Ite, An nambogbag mun seleg on anyo mundoho neeheg, An den along o Mesir en nim o lei kwe en nim durukmu inil neeheg, duruk katswareg en iren An nobam nele holoho duk fug angge, An nabut bal-napuk kwit neg welatswa anggere.

²³Mun eleg. It o kwenang ai fam kwik lahup fug. It on enesahalimu etman An nele sahale folug duruk katswa ma re ap misig on ulug oho eke kwenang ai fam eneyog sobit hahup fug.

²⁴ Famen de An Namingming angge Kaleb ai neg de ai duhu fug. At de An nobam dipdoho neg duruk on. Ai fam de at de An den walug lahukdeg de o kwenang kwik lasimu etma walug lahuk. Ketiare it ap homi Amalek on mel, Kanaan on mel, donggo ai fam etma wereg. Famen de o kwenangma etma re at Kaleb An Namingming angge ai en ondohoma on enangge amuhup. Sono re hit nikangge sombandoho re o Teluk Akaba wereg fil leimu etma lahup,” ebag.

²⁵

²⁶TUHAN en ele Musa nim Harun nim fam uruk kwit de,

²⁷“Li ke hwili it ap homi enebut mun siag on au en de An nobam enele ngul-ngul ale neg uruk kwit welamuhup? It abirangge en enele mulmul ale uruk on ai An mundoho holihi.

²⁸Hiren de it fam onggo hweag-esauk kwit de diroho iyug: TUHAN en uruk kwit de, An nonggwareg noluk welahi on nunuk hombuk bal-dauk kwit anggere, hit aire An nil hanim henele uruhup ale eta hag An den oho hit airoho henobahakuk. An, TUHAN, en nele mundoho ihi.

²⁹ Hiren An nil hanim henele ngul-ngul ale uruhup. Ai fahet de hit henebe waramuhup mu re henebe wareg angge ai leimu suma del-foldeg laruhu.

³⁰Kaleb nim Yosua nim halug neg de lahup, ne ap hit henesahalimen enebe umur dua puluh tahun emberim fil on de dem misig oho eke kwenang An den sali wat-hesauihik mu etma kuhup ale wereg fug.

³¹Hit en uruk kwit henomaliki re ap en sabu hetdoho og-enebuhup ulug uruhup. Famen de kwenang hiren domako embeseruhup mu etma re An den it ai hondog-eneplug kwik lahuk, ne o kwenang aire it enanggwenang on amuhup.

³²Ne, hit de lekma suman mundoho waramuhup ai.

³³ Henomaliki re 40 tahun anunuroho lek kwe suma leil watuk kamuhup. Hit henesugun siag ai fam de hit henomaliki ai anggolo-fanggolo ale neg hauk men neg de hit henesahalimu en henomaliki etma ap ambiang fotogdoho on waramuhup.

³⁴Hit henesiag ambiangma re, 40 tahun en ai hauk kamuhup. O kwenang ai nukoho 40 en fam hinil o lowarik kuruhupmu re, tahun misig fahet de nukoho misig ulug wenaharuk kamuhup! An den hit fam il henebuhukdeg henobam durukmu eta hiren oho unduk neg hahup.

³⁵Ap homi enele misig seberoho maho folug An nele sahale foruk on etma fam de ai An den demdoho debesehuk ulug nele hombuk balihi. O leimu suman de hit henebe abirangge waramuhup. An, TUHAN, en nele mundoho ihi eheik iyug,” ulug hweag-esebag.

³⁶Ap Musa en kwenang ai inil o lowarik lowag ulug mon-enepfag on omano sombandoho waharuk kwit de o etma fahet enele seiale laloho il watfag ma wene ai fam ap homi Israel on TUHAN fam enele siag on ngul-ngul ale ebag. Ai fam de TUHAN en it fam unggum og-esebag ma re it enebe ouk enobam atuk kwit mundoho waratil lebag.

³⁷

³⁸Ap nesanggo en eneko inil o lowarik lebag on etano en de we Kaleb nim Yosua nim neg enoluk welatfag.

³⁹TUHAN en iyug ulug ebag on anyo at Musa en hweag-esebag ma re it ap homi Israel on anyo enenda fu en belahi folug fong watfag.

⁴⁰Likia sekandoho hubet-habet de dom funumu fam lahaul en ulug fik-fouk duruk kwit it enele diroho ebag, “Demdoho nit de siag duruhuk. Famen de ketiare nit o kwenang TUHAN en unug-nesasimu ai laul en duruk kahe,” ebag.

⁴¹Famen de Musa en it hweag-esauk kwit de, “Nunggwe ulug hit de ketia TUHAN wene melaleg sahalduk kahep? Hiren ambiangma higitdoho duhup fug!

⁴²Lauk eleg! TUHAN de hit hinim wereg elegma anggere, it heneselei on en hit henalong elehapdoho sebele henobahauk kohoreg.

⁴³Hit de ap Amalek on mel Kanaan on mel hinim dog yapuk men de dog elma etman hit waramukohon lahep. Hit de TUHAN ele holoho duruk kahep fug mu re At hit henesahalimu wereg latmisi fug,” ulug hweag-esebag.

⁴⁴Famen de ap homi Israel on aire Musa mel Peti Sali wene wareg anyo mel o saboma etma embeselug la fug kweleg de it dom fam funumu lahaul ulug dung hauk katfag.

⁴⁵Airoho debag ma re it ap Amelek on mel Kanaan on mel o etma wereg on omano en de mug-esauk kwit de ap homi Israel on enalong elehapdoho fesebagdeg de sik-mug-eneplug de o Horma hwili etma feseik watfag.