Read Ninia Yali BILANGAN 15 Bible Online

BILANGAN 15 - Ninia Yali bible

BILANGAN 15

¹TUHAN en Musa fam

²wene melaleg sure it ap homi Israel on en o kwenang TUHAN en og-esahumu etma kwik lalug duruk kamuhup en ulug og-etfag.

³Hiren TUHAN obahet on waroho yalduk on mel, enele unduhuk foruk on onggo mel, ite enendaman bolug waroho yalduk on mel, nukoho we on fahet ulug duruk kwit waroho yalduk on mel fam yalduk kwit de: sapi yohombuk on mel, domba yohombuk on mel, domba halug oho kambing halug oho waroho yaliyug. Hiren waroho yaluhup angge ai amben de TUHAN endama ahayeg hauk karuhu.

⁴Ap eke en domba ane, kambing ane folug TUHAN fahet waroho yalmin ulug walug waharuk kwit halug de, wam eta domog nim de tepung satu kilogram zaitun ahalue satu liter nim muninig angge werako foruk on fahet seberoho walug manu, ne anggur ahaik de satu liter en walug manu.

⁶Hiren waroho walug wamuhup angge ai lahe domba yohombuk misig watuk kwit halug de hiren tepung dua kilogram nim de zaitun ahalue setengah liter nim muninoho walug waharuk kwit de amep eleg on foruk on fahet nim walug og-irik waharuk kamuk,

⁷ne anggur ahaik de setengah liter nim. Waroho yaluhup angge aire amben TUHAN endama healduk karuhu.

⁸Waroho yalduk angge ai lahe sapi yohombuk misig on waroho yalduk on fahet ane, enele unduhuk foruk on fahet onggo ane, ite anggerang owam seberuruk on fahet ane,

⁹eta fahet watlug halug de hiren tepung tiga kilogram nim zaitun ahalue dua liter nim munini folug de amep eleg on foruk ulug walug feiyug.

¹⁰Ne anggur ahaik de dua liter en. Waroho yaluhup angge aire amben TUHAN endama healuhu.

¹¹Aire hiren sapi yohombuk on mel, domba yohombuk on mel domba mel kambing mel waroho yalduk kwit foruk kamuhup on.

¹²Waroho yalduk kwit ai lahe wam biren hagdoho waroho yalduk kwit ohore tepung mel zaitun ahalue mel anggur ahaik mel aire wam deg laruhu ale etanoroho eke nim dopnoruhup.

¹³Wene aire it ap homi Israel on enebe hundomog en waroho foruk kwit etma duruk kamuhup on. Waroho yaluhup angge aire amben TUHAN endama healuhu.

¹⁴Ap bog on misig hit henesahalimu wereg on halug, elamna wereg on oho femdoho wereg on en ohore nauk angge etma ambendoho yalduk halug ohore wene melaleg ai higitdoho durukmu re amben anyo en de TUHAN endama healduk karuhu.

¹⁵ Wene melaleg abirangge mel diroho airoho diyug wene mel etma re re hit mel de ap bog on hit henesahali mu wereg on enobahet mel, hit et, it et angge TUHAN olohotma re higitdeg lahep angge re. Ne, wene aire li mundoho-mundoho etma airoho neg welaruhu.

¹⁷Wene melaleg su re TUHAN en Musa fam

¹⁸it ap homi enunggul unuk Israel on en o kwenang TUHAN en it fobik og-esahumu etman duruk kamuhup en ulug og-etfag.

¹⁹Hiren lahe o kwenang ai fam anggen yihig omano nauk ale indip dulug halug de foma re hiren TUHAN og-utuk on ulug amu eneko foruk kamuhup

²⁰Hit en roti gandum anggen keram balduk on en weratuk kwit halug de roti aire hiren TUHAN obahet eneko foruk on ulug og-utuk kamuhup. Obahet foruk alere hiren gandum anggen keram on sahaleg angge foruk kamuhup ai hagdoho.

²¹Hundig-hundig li mundoho etma fam de roti gandum keram on balug wituk on etma re hiren TUHAN og-utuk on fahet ulug amu eneko foruk kamuhup.

²²Wene melaleg TUHAN en Musa fam fesi awene etma misig eke hiren henapenendoho fug men we fetagdoho sahaloho fohup deg halug de, nukoho At TUHAN en wene melaleg og-hesasi huli ai en angge fobik mundoho-mundoho welamuhup hwili etma, ne iren siag duhup on aire it ap homi etma wene melaleg wereg on ai enapelegdoho duhup, halug de it ap homi holduk on omano mundoho en de sapi yohombuk on misig eke waroho yalduk on ulug fohup. Ai inim seberoho re amep wereg eleg on foruk on ulug mel ne anggur ahaik foruk kamuhup ale ulug huli-huli wereg ale fam mel foruk kamuhup. Hiren waroho foruk kamuhup angge ai fam de TUHAN endama healduk karuhu. Ai folug en de eke hit henesiag apelehapdoho henobahaukwag ulug de domba yohombuk on misig eke waroho foruk kamuhup.

²⁵Airoho dulug de at imam en de ap homi enesiag elehapdoho fesoukwag ulug enobahet duhu. Ai fam de iren duhup on ai enendan wenggele folug duhup fug mu ne iren nenesiag elehapdoho nenobahaukwag ulug, TUHAN obahet yalduk on wam walug wamuhup ai fam de ap homi ai enesiag apelehapdoho fesehu.

²⁶It ap homi Israel on abirangge mel ne it ap bohon it enesahali kwe wereg on mel, iren siag enapenendoho fugmen duhup on ai fahet de enesiag mundoho apelehapdoho feseruk karuhu.

²⁷ We ap misig eke en neg apelegdoho siag duruk halug, at asiag elehapdoho foruk on fahet de kambing hwe on misig eke umur tahun misig deg on waroho foruk karuhu.

²⁸Airoho forukmu re it imam en de ap anyo TUHAN olohotman asiag apelehapdoho foukwag ulug de obahet duruk karuhu.

²⁹Wene melaleg aire ap sa en siag endaman dimin ulug wenggele folug fugmen duhup on halug de wene melaleg aire it Israel on fahet nim it ap bohon it enesahali kwe wereg on fahet nim higitdoho welaruhu.

³⁰Famen de ap homi Israel on misig en ane, ne ap bog on misig en ane eneluk deg lit en siag duruk halug, aren de TUHAN mabenapdoho fohu. Ap aire unggum ebe binggi waruhup,

³¹aire aren TUHAN ele sahaleheg, ne oluk deg lit en TUHAN wene melaleg dahandoho deheg, duhu ai fam. Ap aire onggwareg siag elekwe wararuhu.

³²It ap homi Israel on o lekma etma wereg li re, ap misig eke e olmahan nukoho sabat salim undoldukmu hweaho folug,

³³de ap ai walug it Musa nim Harun nim ne ap homi abirangge nim wereg ma walug waharuk katswa.

³⁴Walug watlug de ap anyo en duruk katsi on anyo indip fubireg fug en de ebe seneko foroho lit de at fam amu ale eke deberuk katswa fug.

³⁵TUHAN en Musa fam hweag-utuk kwit de, “Ap aire ebe binggi waruhup. At ebe re walug o sabo wirig on omano dag fil wilibik lalug de it ap homi anyo en de helep hwik obagdoho binggi waruhup mu wararuhu,” ulug hweag-etfag.

³⁶Ai fam de it ap homi abirangge anyo en at obam saboman lisoho wilibik lalug de At TUHAN en wene melaloho hweag-esebag aleroho re ap anyo helep en obagdoho ware forukmu re waratuk katfag.

³⁷TUHAN en Musa mingming-duruk kwit,

³⁸ it ap homi Israel on fam hweag-esowag ulug hweag-utuk kwit de, “Hit henesum atog kwe mendako boruruk kwit de ai ebe hundomog fam de hekel il bohol on ililiyug. Aire hiren di li su li etma duruk-wauk kwit neg welamuhup.

³⁹Hekel mendako lilduk kamuhup angge aire enenda wenggel angge fahet: Hundig-hundig hiren kumu halug de, hiren An nawene melaleg omano ebet halug higitdoho duruk kamuhup. Ai fam de hiren An henapeleg atlug hit henendaman boruk ale neg duruk kamuhup fug.

⁴⁰Hekele mendako ililduk kamuhup angge ai en de hiren An nawene melaleg omano mundoho holoho duruk kamag ulug ebet hesauk karuhu mu re hit dik-demdoho An nonggwareg nangge on amuhup.

⁴¹An de hit henakni TUHAN Allah; An nebe hit henakni Allah welaruhuk ulug An den hit henebe o Mesir en og-heneplug wilibik waharihik, TUHAN de An ulug hweag-esakiyug,” ulug mingming-debag.