Read Ninia Yali BILANGAN 16 Bible Online

BILANGAN 16 - Ninia Yali bible

BILANGAN 16

¹ Korah hun Yizhar amloho Kehat on, unggul unuk Lewi on anyo en Musa il hanim suahal ebag. At urukmu it ap henahan on enunggul unuk Ruben enap inim letdoho ebag on de hun Eliab omaliki nimi Datan ha Abiram ha ne hun Pelet amloho On ha it ap homi melal-enepuk on enebe 250 en ap homi holduk on en momaloho fesebag on ha en let debag.

³It enebe abirangge seberoho Musa mel Harun nim wereg ma enekit lebagdeg iren enele uruk kwit, “Musa! Aire mundoho, ap homi Israel on mundoho re TUHAN obahet eneko fahat-dasi. Ne, TUHAN omaliki enegdeg de nit abirangge oma welahe. Famen de ap homi oma enesahalimu en hat nunggwelug honggwareg en an neg eneko fahat-dulug welahi boruk kahen?” ulug hweag-etfag.

⁴Wene airoho urukmu Musa esanggo holfagdeg de kwenangma alukwe belabeg sahaun-debelug TUHAN fam somban ebag.

⁵Airoho debagdeg aren Korah mel it autsi ombolim lebag on mel fam uruk kwit, “Sono hubet de At TUHAN en ap At angge on de sa ne, Aren sa eneko fahat-dasi ulug nit nenobam unug-nesaukmu nenoluk aruhu. Ap Aren eneko fahat-dasi on de At ebe horogma waharuk kamag ulug hweag-itsi.

⁶Sono hubet de hat nim hori hombolim lauk on nim de, indok yalduk angge obale walug indok aro hukdoho mel, amben fano angge dupa mel olog angge fam olog dulug mezbah fam etma walug wamuhup. Walug wamuhupmu re nit nenesahalimu etman ap sa TUHAN en eneko fesi ai kumu hahuk. Hit ap Lewi on su neg de mundoho fahat-dauk kahep ahi!” ulug ebag.

⁷

⁸Ai en Musa en Korah hweag-utuk kwit, “Ap Lewi on su henesanggo holiek!

⁹Hit ap Israel on enesahalimen At horogma wereg lit, At Obam Saboma etmano yabuk deheg, it ap homi Israel on enobahet yabuk deheg, enengge deheg, duruk kamuhup en ulug ap homi Israel on enakni Allah en en-henepsi aire dotdeg hag boruk kahep a?

¹⁰Hat Korah nim ap Lewi on abirangge nim TUHAN en leho henobahasi ai. Ne, ketia hiren nit imam on amul ulug heng-duruk kahep ai!

¹¹Hat nim hori hat mug-haplug lauk on nim en Harun il hanim henele mul-mul uruk kahep on ai ebe demdoho re TUHAN ele sahalduk kahep ai!” ulug hweag-etfag.

¹²Airoho ulug Musa en Datan nim Abiram nim wol-enebukwag ulug hweag-esebag famen, iren uruk kwit de, “Nit de waharuk ale nenerim!

¹³Haren o Mesir kwenang mun fano hesilig mu etman nit og-neneplug o leimu suman nenowarikoho og-neneplug wilibik waharihin aire higit deg eleg en a? Nit haren neg melal-nenepuk kwit neg welaruhun a?

¹⁴Dik demdoho re haren nit og-neneplug kwenang fano hesiligmu wahirihin fug, ite neneyabuk amig fanoma ne neneyabuk anggur yahoma nit nenengge on amag ulug og-neneplug waharihin fug! Ketia haren nit seiale lal-nenepuk kwit uruk kahen! Eleg, nit de waharuk ale mun nenerim!” ulug ebag.

¹⁵Airoho ebag ma at Musa olok humon atfagdeg TUHAN fam ele uruk kwit de, “TUHAN iren waroho og-hirik waharuk angge etma re wa fug. An den ap homi iron en misig ulug oho eke it enenggelegman alema re feserihik on eke wereg fug; keledai iren on misig oho eke wauihik fug,” ebag.

¹⁶Ai ebagdeg Musa en ele Korah hweag-utuk kwit, “Sono hubet de TUHAN Obam Sabo wirigmu etma hori enebe 250 en omano hinim manu. Ne, at Harun oho etma welaruhu. Hiren de henahaindok obale etmano hundomog hwelalug wamuhup. Ne, amben angge dupa ilonggoma fohup deg, TUHAN og-umuhup,” ebag.

¹⁷

¹⁸Airoho ebag ma re iren enahaindok obale omano hundomog webagdeg iren indok anggen mel amben angge dupa mel yohwatfagdeg de TUHAN Obam Sabo sokolma etma Musa mel Harun mel wereg ma enalukwe kwelabeg deg lit unduhuk latfag.

¹⁹Ai en de at Korah en ori andog-enepfagdeg TUHAN Obam Sabo sokolma etmano Musa nim Harun nim it nim enorohole kwelabeg deg lit unduhuk latfag. Airoho unduhuk men de fetagdoho etano ap homi inil hauk men TUHAN aseleg helag-felag angge debag.

²⁰Ai duruk kwit, TUHAN ele Musa nim Harun nim hweag-esauk kwit de,

²¹“It ap ai wereg ma etman hit henemumu hihil amek; ketia neg it ap homi ai An den elehap debeseikohon lahi,” ebag.

²²Airoho ebag famen Musa nim Harun nim enorohole belabeg kwenangma sahaun-duruk kwit enele diroho ebag, “Allah nenakni, Haren neg abirangge enoluk wereg on anyo enoluk og-esauk kahen. Ap misig en neg siag duruk fam de ap homi abirangge fam Haren holok fesehen hale deg a?” ebag.

²³Ebag ma TUHAN ele Musa fam uruk kwit,

²⁴“Ap homi etma it Korah mel Datan mel Abiram mel enobam saboma etman embeselug hihiloho lowag ulug hweag-esakin” ebag.

²⁵Ai ebag ma Musa en ap homi Israel on melal-enepuk on etmano eiyogmuroho re Datan mel Abiram mel wereg ma lebag.

²⁶Musa en ele ap homi Israel on fam hweag-esauk kwit, “Ap enolok mun siag enap au enobam saboman embeselug lakiek! It enengge amu angge oho henenggik sen ha fug. Hit wene su higitdoho duluhup fug halug de it enesiag fam hinim ambine eleg amluhup,” ulug hweag-esebag.

²⁷Airoho ebag ma re it ap homi Israel on anyo it Korah, Datan, Abiram mel, enobam saboma omano embeselug hihil atfag. Datan nim Abram nim de wilip atfagdeg enobam sabo hundomog sokolma enohwesi enomalik inim unduhuk welatfag.

²⁸Ai en Musa ele uruk kwit, “Su fam de TUHAN en de di on su on etma dukwag ulug an mon-nabik wahasi ai, ne an namu nendan bolug waharihik fug ai hit heneluk amluhup.

²⁹It ap homi etma ap homi eneitogdoho waratuk ale hag waramlusa, ne Allah en oho unggum it enobam di ale su ale oho eke enebuk eleg angge waramlusa halug de, ai an TUHAN en mon-nabik wahasi fug anyo ai fam heneluk amluhup.

³⁰Famen de TUHAN en hit o endamet angge holduk kahep fug ale eke, ne kwenang heal-esalug it enebe nim enengge et it eneluk kengge kwenang elma ap homi waratlug laukmu wamburukmu esaluhup deg halug de, ai it ap homi su en TUHAN ele sahalswa ulug henoluk amluhup,” ulug hweag-esebag.

³¹Musa en wene airoho ebagdeg ele fotog hauk kweleg etano kwenang it eneyog unduhuk latfag ma etano kahalfag,

³²ne it nim it eneyog indip kwe on nim at Korah mutlug lebag on etmano abirangge nim enengge munangge-manangge nim obuk ebag.

³³Ai fam de it enebe enoluk kengge nim enangge abirangge nim kwenangma ap homi waratlug laukmu etma obuk ebag. Kwenang healeg latfag on anyo abit atfag ma re it anyo kwenang apma sebel-enepfag.

³⁴It ap homi Israel on etma welatfag on etmano en hol-hauk men de, “Buroho lakiek! Nit kwenang en bil-nesarohoreg!” urukmu enesanggo holfagdeg iroho buhuloho longgo ebag.

³⁵Airoho debagdeg it ap enebe 250 en anyo en TUHAN obahet amben angge dupa yaloho og-utuk katfag on anyo TUHAN en indok mondorik watfag ma han yal-enepfag.

³⁶Ai debelug TUHAN ele Musa hweag-utuk kwit,

³⁷“Eleazar hun Imam Harun amloho ai en indok obale nim indok on nasireg fesi angge etma nim ne indok asing mel ul mel de, obale eta mun eneg horeg on deg ma angge re amumu hililik lowag. Di angge su angge etma re it ap homi enesiag onggo unggum enobam feselug warahesa on ai enangge foruk angge etma. Di on su on etma re iren TUHAN obahet olohotman og-utswa ma re mun eneg horeg on ai halug de no etma sahal-fahal debelug de sap-sabel angge atil lauk em de mezbah ahap dag kwe dopnoruhup. Ai duhup on aire it ap homi Israel on enenda ebereg angge fahet deg laruhu,” ulug hweag-umuk ulug hweag-etfag.

³⁸

³⁹Airoho hweag-etfag ma re at Imam Eleazar en de indok obale etmano webagdeg ap en sap-sabel angge sahale folug mezbah ahap dag fil dopno-dukwag ulug hweag-esebag.

⁴⁰Aire ap Israel on en enenda ebereg wereg lit we it Harun ambiangma on neg de TUHAN obahet amben angge dupa yalduk kamuhup ap amu on de eke yalik waharuk kamuhup fug ulug ebereg welamag ulug debag. Ap homi wene melaleg ai sahale folug duruk on de it Korah nim autsi at ombolim lauk katfag on nim elehap debesebag hag elehap debesehup. Mundoho aire TUHAN en wene melaloho Musa fene en Eleazar hweag-etfag ale higitdoho neg debag.

⁴¹Ai debag ma likiare it ap homi Israel on abirangge omano en Musa nim Harun nim fam suahal bet-enepuk katfag. Iren uruk kwit de, “Hiren TUHAN omaliki binggi enowatuhup,” ulug hweag-esebag.

⁴²It anyo kabog-duruk kwit Musa nim Harun nim fam neg suahal uruk kwit it enorohole endenoho TUHAN Obam Sabo wereg fil etmano fu hauk men de anggulog o anyo salduk men de ombagbag TUHAN wereg ale anyo enam atuk mu hebag.

⁴³Hebagdeg de Musa nim Harun nim TUHAN Obam Sabo sokole fil etmano lebag,

⁴⁴man de, TUHAN ele Musa fam hweag-utuk kwit de,

⁴⁵“Ap homi ai eneluluk en hihil amin. An den it ai enebe wereg ma etan elehap debeseikohon lahi!” ulug ebag. Airoho ebag ma re it biren anyo kwenangma enelukwe belabeg sahaun-debagdeg,

⁴⁶Musa ele Harun hweag-utuk kwit, “Hat hahaindok obale anyo wamihin deg mezbah famen indok anggen oko yohware folug de amben angge dupa emberimmu fein. Folug de folo-folo it ap homi ai enesiag elehapdoho fesoukwag ulug enobahet din. Folo-foloroho! TUHAN olok ahe mun lahakeik ne ouk obam dag on mun indip deheik,” ulug hweag-etfag.

⁴⁷Airoho ebag ma re Musa en hweag-etfag ale etano Harun en higitdoho neg debag. At ebe buroho ap homi kabogdeg ma, it enebene ouk obam on enobam aikoho indip duruk li em etano lebag. Ai fam de at Harun en dupa anyo indok anggen emberimmu etano febagdeg, ap homi enesiag apelehapdoho fesoukwag ulug debag.

⁴⁸Ouk obam dag on anyo bal-atfag ma re, at Harun ebe it ap homi waratfag on mel, it enoluk wereg on mel dulug bul etano welatfag.

⁴⁹Ai salim ap homi waratfag on wenako re 14.700 en waratfag, etare it hun Korah autsi nim wene sahaloho folug debag ma waratfag on etano et de fug.

⁵⁰Ouk obam dag on anyo bal atfag ma neg de at Harun anyo nikangge sombandoho Musa akit TUHAN Obam Sabo wereg ma etmano lebag.