Read Ninia Yali BILANGAN 17 Bible Online

BILANGAN 17 - Ninia Yali bible

BILANGAN 17

¹TUHAN ele Musa hweag-utuk kwit de,

²“Ap homi Israel on en domuk nesanggo en ne unggul unuk misig on en de domuk misig heg, it enunggul unuk deg aleroho melal-enepuk on etmano en hat og-homagdoho ulug hweag-esakin. It enowesi melal-enepuk on etman enunuk domog de domuk etma fene bale feiyug.

³It enunggul unuk Lewi on enandomuk fam de Harun unuk bale feiyug. It enunggul unuk domog etma melal-enepuk on fahet de domuk misig heg welaruhu.

⁴Airoho debelug de domuk etma walug An Nobam Saboma Peti Sali wene wareg weregma olohotma An nim hat nim hundig ambi atuk kahema etano feik manu.

⁵Domuk ap An den enetihik on andomuk ai asimit wilibuhu. Ai duhuk fam de it ap homi en hundig-hundig hat hil hanim ngururuk kwit enele mul-mul ale neg uruk on etma bale fohup,” ulug ebag.

⁶Wene ai ebag ale anyo Musa en ap homi Israel on fam hweag-esebag. Ma re it enunggul unuk domog melal-enepuk on etmano en de domuk it enowesi melal-enepuk on enobahetdoho at og-etfag. Abirangge re nesanggo welatfag ne at Harun andomuk anyo oho iren sahalimu etmano welatfag.

⁷Airoho febag ma re at Musa en domuk omano oko TUHAN Obam Sabo wirigmu Peti Sali wene wareg on anyo wereg ma alukwema etmano feik kwebag.

⁸ Likia hubetdoho Musa TUHAN Obam Saboma kuruk men de, domuk Harun en on it enunggul unuk Lewi on en anyo asimit wilibig latfag. Wilibigmu re domuk ai owil mumung deg lit owil yiko anggen de e ketapang anggen mun wirik atfag angge yihig latfag!

⁹Musa en de domuk abirangge etma webagdeg ap homi Israel on inil hanim unuhik lebag. Iren atfag ale anyo inil hebagdeg de it enowesi melal-enepuk on etmano en enendomuk domog hwelebag.

¹⁰Ai en TUHAN ele Musa fam uruk kwit, “Harun andomuk ai re nikangge Peti Sali wareg wereg ma alukwema eta feik kwin. Domuk aire ap homi enele ngul-ngul ale neg uruk kwit wene sahalduk on ai, iren duruk ale ai bale fohup fug halug de waratuk kamuhup ulug enenda ebet angge welaruhu en,” ulug hweag-etfag.

¹¹Hweag-etfag ma re Musa re TUHAN en hweag-etfag ale etano higitdoho debag.

¹²Ai debag ma it ap homi Israel on en Musa fam enele diroho ebag, “Ai halug de nit de elehap-nenebuhu anggere nenamelmeldoho welamul hehe!

¹³Ap TUHAN Obam Sabo horogma laukmu waratuk kamuhup halug de, nit fahet neneluk welamuhuk ale eke wereg fug!” ebag.