Read Ninia Yali BILANGAN 18 Bible Online

BILANGAN 18 - Ninia Yali bible

BILANGAN 18

¹TUHAN ele Harun hweag-utuk kwit, “Hat hebe mel, hat homaliki mel, ap Lewi on mel de An Nobam Saboma en kwasikdoho atsi on etma onggo re hiren duhup, famen de we hat nim hat homaliki nim neg it imam on yabuk duruk men kwasikdoho ale duruk kamuhup on etma ambiangma wauk kamuhup.

²It hori enunggul unuk Lewi on de, hat yabuk durukmu nim it homaliki en yabuk durukmu etma let-henepuk kamuhup en kwelabe fesehun.

³Unggul unuk Lewi on de iren hat hobahet dukwag ulug wereg on etma deheg it eneyabuk An Nobam Sabo wirigmu etman dukwag ulug wereg on etmano deheg duruk kamuhup, famen de iren mezbah horogma waharuk ale oho ite di on su on duruk angge mun eneg horeg angge Ambe Enegma wereg angge etma oho sen hahup hayog. Iren ai dahandoho duhup halug de hat oho it oho waramuhup.

⁴Ite yabuk hit hinim seberoho duruk kwit, yabuk An Nobam Saboma etma duruk on neg duruk kamuhup famen de it akniroho dukwag ulug wereg fug on de hit nim yabuk seberoho duruk kamuhup hayog.

⁵An den ap homi Israel on fam eke nim nolok fesehi ha no re yabuk Ambe Enegma mel ne mezbah fam etma mel de, we hat Harun mel, it homaliki mel en neg duruk kamuhup.

⁶Dik demdoho An den henori Lewi on ai hit henunggul unuk Israel on henesahalimen hat hobahet eneko hobaharihik. It An Nobam Saboma etma An nobahet duruk kamag ulug eneko feserihik.

⁷Famen de yabuk mezbah fam etman duruk on mel ne o Ambe Mun Amu Enegma anyo fam wereg angge fahet mel de we hat nim it homaliki nim en neg yabuk imam on ai wereg lit duruk kamuhup. An den hat fam yabuk imam on ai duruk kamag ulug hobaharihik mu re, haren akniroho deg lit duruk kamuhup on de ai. Ap homi it ai fam etma duruk kamag ulug wereg fug on fam en di angge su angge mun eneg horeg wereg on ai fam horogma aik lauk halug de unggum enobam feselug binggi enowaruhup,” ulug hweag-esebag.

⁸TUHAN ele Harun fam hweag-utuk kwit, “An nobahet eneko folug og-nutuk angge etman abirangge indok yalduk fug on etma re hat hobahet on. Aire li mundoho-mundoho etma hat hangge on atuk karuhu ulug wereg on. Aire hat inim haren ondohoma on nim An den og-hesauk karuhuk.

⁹An nobahet foruk angge mun eneg horeg on mezbah emberimmu yalduk eleg on etman hat hangge atuk karuhu on de ebe su: An nobahet amep eleg angge og-nutuk on mel, enesiag elehap nenebukwag ulug foruk on nim, ap enengge alema re folug obalma foruk on mel. Abirangge etma re mun eneg horeg on ulug foruk angge fam en hat nim it homaliki nim henobahet wereg laruhu on.

¹⁰Aire hat hobahet mun eneg horeg on wereg ma re o obale mun eneg on fam etman neg nauk kamuhup. We ap angge on en neg nauk kamuhup.

¹¹Munangge-manangge ap homi Israel on en An nobahet eneko feik waharuk angge etma oho re hat hobahet neg wereg. An den hat nim hat homaliki ap on nim hwelani on nim henobahet og-hesauihik. Ne, wene melaleg aire li mundoho etma airoho neg welaruhu. It hat hahain elekwe en enebe emereg eleg on de etma nauk kamuhup fano.

¹²Ap homi Israel on en tahun hundig-hundig etma An nobahet ulug zaitun ahalue mel, anggur ahaik mel, gandum mel og-nirik waharuk angge on etman keram dahanduk on en anggen baleg mun ibik-ebe on etma re An den hat og-hutuk karuhuk.

¹³Abirangge etma re hat hobahet angge neg wereg ma angge re hat homaliki heyog indip kwe on etman enebe emereg eleg on de etma nauk kamuhup fano.

¹⁴ Di angge su angge kwenang Israel on fam en An nobahet eneko folug wereg ma wereg angge etma re hat hobahet neg wereg.

¹⁵Ap omalik mel wam omalik mel en atam ondoho on ap homi Israel on en An nobahet feik waharuk on etma hat hobahet neg wereg. Famen de hit henomaliki wandeba on mel, wam saliog angge on omalik keram ondoho on etma enonggo baluhup

¹⁶Omaliki de enebe umur bigalem misig deg li eta enonggo balduk kamuhup. Onggo ai fahet femdoho wereg on de uang perak on foaben fam, onggo ai An Nobam Sabo man deg aleroho balduk kamuhup.

¹⁷Famen de sapi, domba, kambing keram ondoho on halug de onggo baluhup fug. Wam etma re An nobahet on deg ma re waroho foruk kamuhup. Amep de mezbah anyo ebene hilil-esalug de aseire waroho yalduk angge on ulug yalduk kamuhup. Ai amben en de An nendama healduk karuhu.

¹⁸Ino re Nobahet unug nealug foruk kwit duruk anyo hag amig mel eyog bekit fil mel de hit henobahet.

¹⁹Li mundoho-mundoho etma, ap homi Israel on en foruk angge walug An og-nirik waharuk halug, An den hat nim homaliki ap angge nim hwelani angge nim og-hesauk karuhuk. Wene melaleg aire li mundoho-mundoho fam etma wereg ma re wene sali An nim haren ondohoma on nim wareg ma suhwi deberuk fug on welaruhu,” ulug hweag-etfag.

²⁰TUHAN en ele eke Harun hweag-utuk kwit, “Hit henengge eke henabinggi angge hagdoho hwelahup fug. O kwenang An den abug og-hesauihik mu ai en oho re hit fahet kwenang hwili misig oho eke hwelahup fug. An TUHAN, ai hit henangge henabinggi angge hag hwelahup on fahet welahi,” ebag.

²¹ TUHAN ele Harun fam hweag-utuk kwit, “It ap homi Israel on en numen on abirangge An nobahet foruk on aire An den it ap Lewi on og-esauk karuhuk. Aire iren An nobahet An Nobam Saboma etma yabuk duruk kamuhup on fahet enangge enabinggi angge hwelauk kamuhup on ai og-esauihik.

²²Ap homi Israel amu on etma re An Nobam Sabo horogma waharuk men iren siag dalug it enobam unggum waratuk on hwelanore horogma waharuk kamuhup fug.

²³Ketia hwili en de it ap Lewi on neg An Nobam Saboma neyabuk duruk kwit it akniroho duruk kamuhup. Wene melaleg aire hit henomaliki henambiangman endag-amuhup on etman oho airoho neg duruk kwit mundoho-mundoho welamuhup ale fahet. Ap Lewi on de it ap homi Israel on wereg ma etma enangge enabinggi angge eke wereg fug,

²⁴it fahet enabinggi angge on de An Nobahet ap homi Israel on en An nobahet eneko folug og-nutuk on etman num on etma re it og-esauihik angge re. Ai fam de it ap Lewi on enobahet An den uruk kwit ap homi Israel on fam etman it enabinggi angge eke hwelauk kamuhup fug irihik ai,” ulug hweag-etfag.

²⁵TUHAN en Musa fam mingming-duruk kwit,

²⁶wene melaleg su ap Lewi on fam hweag-esakin: Ap homi Israel on en num on og-nutuk mu TUHAN en hit-henengge on amag ulug og-hesauk halug de, hiren anyo en num on An nobahet eneko folug og-nutuk kamuhup

²⁷Hiren An nobahet eneko foruk kamuhup angge aire gandum anggen keram balug foruk on mel, anggur ahaik keram on hwenanggeg foruk on mel anyo hag foruk kamuhup.

²⁸Airoho duruk fam de hiren oho re it ap homi Israel on en num on feik waharuk on etmano en fomane re TUHAN obahet on ulug eneko foruk kamuhup ai. Hiren eneko foruk kamuhup angge aire hun Imam Harun anyo og-utuk kamuhup.

²⁹Hiren hwelauk kamuhup angge etman mun finik-fano on neg og-utuk kamuk.

³⁰Hiren ai on mundoho og-utlug neg de ando etma hit hwelauk kamuhup, aire ap yabuk wituk enap en An nobahet og-nutuk on dag walug watlug ando it hwelauk anyo hag duruk kamuhup.

³¹Dindik atuk on etma re hit nim it heneyog indip kwe on nim en o ekeman fam en oho nauk kamuhup, aire hiren yabuk An Nobam Saboma duruk kamuhup on ai onggo.

³²Hit nauk kamuhup on aire siag fug, famen de atam mun finik-fano on omano TUHAN fahet mundoho fohup deg neg airoho duruk kamuhup fano. Ap homi Israel on en TUHAN fahet ousaroho eneko foruk angge etman TUHAN fahet fano angge on eneko fouk eleg lit en, foruk angge nahupmu emere fohup hayog. Hiren wene melaleg su sahale folug duhup halug de hit waramuhup.