Read Ninia Yali BILANGAN 19 Bible Online

BILANGAN 19 - Ninia Yali bible

BILANGAN 19

¹TUHAN en Musa nim Harun nim en

²wene melaleg su ap homi Israel on hweag-esakiek ulug mingming-enepuk kwit de: Sapi duhum mebon eke obam ale eleg on anggin angge haruruk ale owan deg on eke walug

³sapi ai Imam Eleazar og-irik manu. Feik waharuk angge aire o sabo wirig men walug dagma wilip atlug, imam enolohotman ware foruk kamuhup.

⁴Airoho debelug de Imam Eleazar en sapi ai amep dorangge oko walug TUHAN Obam Sabo fil etma sabirenam kwete hauk karuhu.

⁵Sapi ai abirangge, ahap mel, ino mel, alot mel, amep mel, abirangge re imam olohotma etma indok yale foruk kamuhup.

⁶Ai en de imam en e lak aras dorangge nim, hisop enggik kesilig mel, hekel mebon soaleg misig mel walug de indok sapi yaleg on naukmu ai hwik-esa kuhu.

⁷Ai debelug, de imam anyo asum horeheg kume wareheg, duhu. Airoho debelug neg de aren o saboma etma kuhu famen de at ebe emereg weregman neg de mo obuk uhu.

⁸Ap sapi ai yalduk ahun ai oho re asum ho deheg kume wareheg duhu; at oho re ebe emereg wereg kweleg neg mo obuk ik lauk karuhu.

⁹ Ai en ap misig eke emereg eleg on en ul sapi alkan etmano andogdoho walug balohoma o sabo dag fil etma foruk karuhu. Ne,ul aire etma foukdoho foroho lit it ap homi Israel on enesiag ho-enebukwag ulug duruk kwit ik nim ho-enepuk on fahet duruk kamuhup en fohup.

¹⁰Ap sapi ul ai andog duruk karuhu on ai asum horuruk karuhu famen de, ebe neg de emereg wereg kweleg mo obuk ik lauk huli atuk karuhu. Wene melaleg ai ap homi Israel on mel ap bog on hinim femdoho welaruhu on fahet mel mundoho-mundoho welaruhu.

¹¹Ap eke en ap wareg on enggik bal hauk halug de ap ai ebe emereg weregman neg nukoho sabit en welaruhu.

¹²Nukoho henahaneg on fam nim nukoho sabit on fam nim etare at ebe emereg wereg lit ebe ik buhun-debelug ho-enepuk on anyo fam ho dahu. Famen de nukoho henahaneg on fam nim nukoho sabit on fam nim eta at ebe ho da fug angge neg welaruhu halug de at ebe emereg at welaruhu.

¹³Ap wareg senetsireg en at ebe ho dauk eleg halug de at ebe ho amag ulug ik ebe fam hililduk on anyo fam hililig elegma re at ebe emereg at welaruhu. Aren o TUHAN Obam Sabo anyo emere fohu ai fam de at Allah omaliki on wereg bohup fug.

¹⁴Ap homi eke o sabo misig eke ilonggoma waratuk halug, ap o sabo ai ilonggoma welaruhu on mel, o ai fam kuhu on mel ai wareg en sebel enebuhumu nukoho sabit en enebe emereg welamuhup.

¹⁵Ikwag kendi mel waruk periyug mel etma oho aplit lareg eleg angge wereg laruhu on oho emet aruhu.

¹⁶Ap oho homi oho ap en binggi wareg on halug oho, amu yabuk men wararuhu on halug oho, etma fam bal hahu halug de at ebe emeregman neg nukoho sabit en welamuhup. Ai hag de ap waratuk on enowag seneruhup on oho wareg salegma seneruhup on ohore emereg neg welamuhup.

¹⁷Ap emereg on anyo enebe horukoho lit de, ul sapi duhum mebon ap homi enesiag ho-enepuk on fahet ulug yaluhup on anyo dorangge lohon walug, ul ai waruk misig eke elma kwelabe folug, ik wirig atuk on hwenanggoho wereg on anyo fam hililoho kwelabe fohup.

¹⁸Wene keram on de, ap waratuk on o sabo ilonggoman waratuk halug, ap emereg eleg on en hisop omalo misig eke walug ik anyo fam yuhul halug, de o sabo ai mel di angge su angge o saboma etma wereg angge etma mel horuhup, ne ap etma wereg on oho ho-enebuhup. Wene bireneg on de, ap eke ap wareg on mel, ap wareg owag siling mel, sal-enepukmu mel senetuk halug de it ap emereg eleg on en atam on fahet duhup ale anyo higitdoho ho-enebuhup.

¹⁹Aren de ik anyo nukoho henahaneg on nim nukoho sabit on nim fam kwesal-enepuk karuhu. Nukoho sabit on ai fam de aren ap emereg on ho enepuk ale ai fotogdoho duruk karuhu. Ap aire asum ho deheg, ebe nim kume wat-deheg duhu. Ne, mo obuk ik lauk li eta at mundoho ho atuk karuhu.

²⁰Ap ebe emet aruhu on en onggwareg ebe ho nabukwag ulug duhu fug halug, ap ik ho enepuk kwit hilil-enepuk on anyo fam horuhup fug mu ap ai ebe emereg lit welaruhu. Aren TUHAN Obam wirigmu anyo emere fohu ai fam de Allah omaliki on wereg boruk kamuhup fug.

²¹Wene melaleg aire li mundoho-mundoho etma welaruhu. Ap ik fam ap fene kwete esahu ahun ai oho asum ho dahu, ne ap ik ai en bal-hahu on aire at ebe emereg weregman neg mo obuk uruk karuhu.

²²Di angge su angge ap emereg on en sen hahu angge halug de etma abirangge emet atuk karuhu, ne ap amu on en sen hahup on oho re emereg weregman mo obuk ik lauk karuhu.