Read Ninia Yali BILANGAN 2 Bible Online

BILANGAN 2 - Ninia Yali bible

BILANGAN 2

¹At TUHAN en Musa, Harun inim fam hweag-esauk kwit de,

²“Ap homi Israel on enobam sabo wit-dauk kwit halug de, it ap enebe hundomog en de it enunggul unuk on fahet wiyog sum boreg wereg on nim it ap homi enunggul unuk ebe on fahet bendera eneg angge wereg ale etaroho nim neg wit-dauk kamuhup. It enobam sabo etma re An Nobam sabo horogma etma wiruhup famen de, An nobam sabo ai fam en de horog il misig yatdoho hag wiruhup,” ulug hweag-esebag.

³Foma mo indip fil etma re it esan enunggul unuk Yehuda enap enewiyog sum apma wereg on de enebe lohwaleg ale anyo enowesi melal-enepuk ale domog wiruhup on baleg ale su: [Unggul unuk] — [Enowesi] — [Enebe wenako] Yehuda on — Nahason hun Aminadab amloho — 74.600 en Isakhar on — Netaneel hun Zuar amloho — 54.400 en Zebulon on — Eliab hun Helon amloho — 57.400 en Enebe seberoho re: — 186.400 en Esan it Yehuda fam lohwaleg on de it dag lauk kamuhup.

¹⁰Foma selatan fil etma re it esan enunggul unuk Ruben on enewiyog sum apma wereg on enebe lohwaleg ale anyo enowesi melal-enepuk ale domog wiruhup baleg alere su: [Unggul unuk] — [Enowesi] — [Enebe wenako] Ruben on — Elizur hun Syedeur amloho — 46.500 en Simeon on — Selumiel hun Zurisyadai amloho — 59.300 en Gad on — Elyasaf hun Rehuel amloho — 45.650 en Enebe seberoho re: — 151.450 en Esan it Ruben fam lohwaleg on de bireneg angge lauk kamuhup.

¹⁷Ai mundoho lil lauk em de, it Israel enap mundoho esan lohwaleg on sahalimu etma re it enunggul unuk Lewi on TUHAN Obam Sabo saleg anyo hamboholug lauk kamuhup. It enobam sabo wit-dalug ale etaroho re it enebe esan oho re it enawiyog sum deg aleroho lauk kamuhup.

¹⁸Mo obuk uruk fil it esan Efraim awiyog sum apma seberoho lohwaleg wereg on de enobam sabo wituk kwit de enowesi melal-enepuk on baleg su fam deg aleroho duruk kamuhup: [Enunggul unuk] — [Enowesi] — [Enebe wenako] Efraim on — Elisama hun Amihud amloho — 40.500 en Manasye on — Gamaliel hun Pedazur amloho — 32.200 en Benyamin on — Abidan hun Gideoni amloho — 35.400 en Enebe seberoho re: — 108.100 en It enunggul unuk Efraim on nim esan lohwaleg on aire it Lewi enap ai enambolma lauk kamuhup.

²⁵Il utara fil de esan it Dan awiyog sum apma seberoho lohwaleg wereg on de enobam sabo wituk kwit de enowesi melal-enepuk on baleg su fam deg aleroho duruk kamuhup: [Enunggul unuk] — [Enowesi] — [Enebe wenako] Dan on — Ahiezer hun Amisyadai amloho — 62.700 en Asyer on — Pagiel hun Okhran amloho — 41.500 en Naftali on — Ahira hun Enan amloho — 53.400 en Enebe seberoho re: — 157.600 en It enunggul unuk Dan on nim esan lohwaleg on aire mun fotog-fotogma lauk kamuhup.

³²It ap homi Israel on esan domog-domog enunuk baleg latfag on de enebe 603.550 en.

³³At TUHAN en Musa wene melaloho hweag-etfag ale higitdoho re it ap Lewi on de it ap homi Israel on fomane inim enunuk baleg latfag fug.

³⁴It ap homi Israel on en de at TUHAN en wene melaloho Musa en dukwag ulug hweag-esebag ale omanoroho debag. It enemu domog de it enawiyog sum deg aleroho maseroho enobam sabo salfagdeg de, lauk kwit oho re enunggul unuk deg ale domog nim ne enunggul unuk ahutdoho deg aleroho nim lauk katfag.