Read Ninia Yali BILANGAN 20 Bible Online

BILANGAN 20 - Ninia Yali bible

BILANGAN 20

¹Bigalem misig angge re ap homi Israel abirangge o Zin lekma etma aik watfagdeg de o Kades etma femdoho welatfag. Miryam etman waratfag ma etma sale febag.

² Nukoho eke salim de it enobam saboma etma enahaik eleg latfag. Ma re it ap omano watfagdeg Musa nim Harun nim wereg ma kabog-dik watfagdeg

³enele sahalduk kwit, “Nit nenori nim seberoho TUHAN il hanim etma seberoho warala re fano!

⁴Nunggwe ulug hiren nit og-neneplug o leimu suma waharuhup? Hiren nit nenowam inim suman waramag ulug og-neneplug waharuhup a?

⁵Nunggwe ulug hiren nit o Mesir en og-neneplug wilibik waharuhup deg leimu di angge su angge yaruk fug alereg ma oma nenobahaik waharuhup? Suma re gandum wereg fug, anggur indip mel, e ara indip mel delima mel wereg fug. Ik nauk on oho wereg fug oma re!” ulug enele sahalfag.

⁶Airoho ebag ma Musa, Harun nim ap etmano embeselug enemumu TUHAN Obam Sabo sokole horogma etma lebagdeg unduhuk latfag. It enerohole belabeg sahaundeg lit wereg ma TUHAN seleg enobam fisarik watfag.

⁷TUHAN ele Musa fam hweag-utuk kwit,

⁸“Domuk Peti Sali wene wareg anyo olohotma wereg angge ai wamihindeg de ap homi abirangge ai kabog-enebiyug. It inil hanim etma haren helep unggul ai fam en ik houwaloho wilibik wamag ulug hele hweag-umuk. Airoho haren ik wilibi feik watmihin mu re it ap homi ai enebe nim enowam inim naluswa,” ulug hweag-etfag.

⁹Airoho hweag-etfag ma re at Musa anyo TUHAN en mingming-debag ale etano higitdoho domuk anyo wag-lebag.

¹⁰Musa, Harun inim en de ap homi abirangge omano helep unggul anyo indipmu etano andog debesebagdeg, Musa ele uruk kwit de, “Ap homi wene sahalni su yei holiek! Niren helep unggul su fam en hit fahet ik wilibi feik wamul a?” ebag.

¹¹Airoho ebagdeg Musa en domuk anyo leg hebagdeg helep unggul anyo fam enggik birenam fukdoho watfag. Watfag ma re ik il omamneroho fulohom dulug wilibik watfag ma, it ap homi nim enowam inim nebag.

¹²Famen de TUHAN en Musa nim Harun nim bet-enepuk kwit diroho ebag, “Hiren ap homi Israel on su inil hanim An nomamne mun eneg welahi ale ename foukwag ulug henenda An nobam omamneroho dip debouk fug angge dehepma re, hiren it ap homi su melal-eneplug o kwenang An den it enobam abug og-esauihik mu etma kwik lahup fug,” ulug hweag-esebag.

¹³Aire ik eleruk Meriba[4] ai. O etman ap homi Israel on en TUHAN fam enele mul-mul ale ebag, ne etman neg TUHAN en At omamne mun eneg on anyo enam-esebag.

¹⁴Ai en o Kades etman Musa en ap yonggo ap raja Edom on hweag-irik lowag ulug mon-enepfag. Mon-enepfag ma iren uruk kwit de, “Nit de nenunggul unuk Israel nenap, nenowe hat ninim indipdoho deg lahe on. Nenowe haren de nit nenobam anggin-fanggin atuk katsi ale mun holuk deg ane.

¹⁵Nit nenembu-nenomba o Mesir etma lausareg tahun-tahun angge etma welatswa. Wereg lit nit nim it nenambu-nenombasi nim fam ap homi Mesir on en siag-biag ale nenobaharuk katswa ma,

¹⁶niren de TUHAN fam let-nenebin ulug hwiruruhuk mu, holsireg Aren malaikat misig eke mondorik wahasi. Mu re malaikat ai en nit o Mesir en og-neneplug wilibik wahasi. Ne, ketiare nit nenebe o Kades kota misig eke o wilayah nenakni haren on fam etma welahe.

¹⁷Niren de nenakni haren o kwenang su kwe lakiek ulug hweag-nesamihin en heng-hapuk kahe. Nit nenebe nim nenowam inim de kwe fam dahandoho eke wilibik lahuk fug, ne yabukmu oho, anggur yaho on fam oho eke kwik lahuk fug. Nenakni hat hahaik bohwe fam en oho niren ik eke nahuk fug. Nit de we kobokwe bekit neg lahukdeg nenakni hat hanggwenangman wilibik lahuk,” ulug hweag-etfag.

¹⁸Airoho ebag famen de, ap homi Edom on en onggo uruk kwit de, “Hit de niren nenobam wilayah fene au laluhup ulug hweag-hesaul fug. Hiren henebi angge lauk halug de niren hukdoho henowaruhuk!” ulug ebag.

¹⁹Ap Israel on en enele uruk kwit, “Nit de we kwe obalowag on fene neg lahuk. Ne, niren ane ite nenowam en ane ik hiren on eke nahuk halug de nit onggo fohuk. Nit de we kwe lahuk ale fahet neg,” ulug ebag.

²⁰Ebag ma it ap Edom on omano en eke nim enele uruk kwit, “Eleg kwe au wamuhup fug!” Ebagdeg it enebe tentara enomamne on nim wilipuk kwit ap homi enunggul unuk Israel on anyo huk-enebik wamul ulug debag.

²¹Airoho ebag ma re it ap homi Israel on anyo ap homi Edom on en it enenggwenang fene lowag ulug fano hweag-esebag fug mu, kobokwe amu kwe herarebag.

²²Ap homi Israel on abirangge anyo o Kades embeselug o Dom Hor fam o Edom nim hwili-hwili mu etma aik lebag. Etman TUHAN ele Musa nim Harun inim fam hweag-esauk kwit,

²⁴“Harun de o kwenang An den it enunggul unuk Israel on fam sali wat-esauihik mu etma kwik lahu fug; hit biren en ik Meriba elerukmu etmano en An nele sahale folug duruhup mu re at etman wararuhu.

²⁵Harun amloho Eleazar inim hondog-eneplug de Dom Hor fam lahaik manu.

²⁶Harun de etan wararuhu angge re asum ai nonggoloho re amloho Eleazar wan-debeiyug,” ulug hweag-esebag.

²⁷Hweag-esebag ma re, Musa en TUHAN en melal-etfag ale etano higitdoho debag. Musa nim Harun nim Eleazar mel de Dom Hor anyo fam ap homi omano en inil fu-enesug kweleg lahabag.

²⁸ Lahabagdeg de, Musa en Harun asum anyo nonggoloho re Eleazar fam wan-debebag. Dom ai funu fam en Harun waratfag ma, Musa nim Eleazar inim neg sombandoho wambik watfag.

²⁹Ap homi abirangge anyo en Harun waraha ulug ebag ma hole febagdeg it mundoho oba yatuk kwit fong watuk men neg de nukoho 30 en debag.