Read Ninia Yali BILANGAN 21 Bible Online

BILANGAN 21 - Ninia Yali bible

BILANGAN 21

¹ O Arad aire kota o Kanaan en selatan fil etma welatfag on. At raja o kota ai on en holduk men de it ap homi Israel on kwe o Atarim kwe en lauk urukmu holfagdeg de, aren it huk-enebik lebagdeg it Israel on enesahalimu omano en ap foma seneko het-eneplug watfag.

²Airoho debag ma re ap homi Israel on en de enele TUHAN fam unduhuk foruk kwit de, diroho unduhuk febag, “Haren mondabi nit nenobam ap homi enunggul unuk ai on fam en nenalongap nenobahamihin halug de, it enebe nim it enobam kota-kota nim de niren mun fun-fandoho eleho fesoul,” ulug ebag.

³Ai ebag ma re TUHAN en de iren heng ebag on anyo webagdeg ap homi Kanaan on ai enalong elehap debesoukwag ulug let-enepfag. Ai fam de ap Israel on en de it Kanaan enap ai mel, enobam kota-kota mel mun elehapdoho fesebagdeg, obale etma re unuk Horma[5] soalfag.

⁴ Ai en ap homi Israel on anyo Dom Hor embeselug de, o Edom kwe etmano mase-mase lakoho re kwe Teluk Akaba lakoho lauk on kwe en lebag. Famen de kwe bulmu etmano en de ap homi anyo hambuk ha fug ale atfagdeg,

⁵ Allah nim Musa nim fam enele mul-mul uruk katfag. Iren uruk kwit de, “Nunggwelug Haren nit o Mesir og-neneplug wilibik waharihin? Nit o leimu oman binggi nenowatmin ulug a? Suma re nauk on mel ik mel mundoho eleg oma. Nit de nauk angge unduk mel neg ha fug angge oma neg de mun me nenepe-nenepuk,” ulug ebag.

⁶Ai ebag ma TUHAN en de kisu aeg olok wereg on it enesahali mu etmano mondorik watfag. Kisu omano en ap homi etmano senggel-enepfag ma re ap homi humdoho waratfag.

⁷Airoho duruk en ap homi omano Musa akit lebagdeg hweag-utuk kwit, “Nit de hat nim TUHAN obam nim nenele mul-mul ale uruhuk fam siag duruhuk. Kisu oma nit fam en yatma deboukwag ulug somban in,” ulug hweag-etfag. Ai ebag ma re Musa en ap homi enunggul unuk anyo enobahet somban ebag.

⁸Airoho debagdeg TUHAN en Musa fam de, “Kisu logam tembaga on fam eke wiri folug de e unduhuk on misig emberimmu fohunmu, Ap homi enebe domog kisu en senggel enepukmu re kisu logam on ai inil fu hauk halug de fano hiling atuk kamuhup en wirin,” ulug miming-debag.

⁹ Airoho ebag ma re at Musa en kisu tembaga on fam eke wiri febagdeg de e unduhuk on fam febag. Ap homi enebe domog kisu aeg en senggel-enepukmu kisu tembaga on anyo fu hauk halug de fano hiling atuk katfag.

¹⁰Ap homi Israel on anyo nikangge lebagdeg de, o kota Obot fam etma o sabo salik lebag.

¹¹O etma embeselug lebagdeg de o Moab fam en timur fil leimu en o Abarim obale buhulfag ma etma o sabo salik lebag.

¹²Ai en de it anyo o Zered Donggoma o sabo salik lebag.

¹³Etman de it anyo lebagdeg de Ik Arnon foma fil ap homi Amori on enobam fil lei mundoho wiriligmu etma o sabo salik lebag. Ik Arnon aire ap homi Moab on enobam nim Amori on enobam nim huli-huli baleg latfag on.

¹⁴Ai fam de buku TUHAN en dog-yapuk on ulug ai fam de diroho baleg latfag: “... Desa Waheb, o Sufa en donggo-donggo etma; Ik Arnon

¹⁵mel alo bengdeg on donggo-donggo o Desa Ar huli wangdeg on mel ai en dil-dil ap homi Moab on enobam nim huli-hulimu etma,” ulug baleg latfag.

¹⁶Etman de it anyo o unuk Beer urukmu etma lebag, aire ik bohwe ulug uruk katfag. Etman de TUHAN en Musa fam uruk kwit de, “Ap homi etma kabog-dukwagdoho hweag-esakin, An den it enobam ik og-esamin en,” ulug hweag-etfag ma.

¹⁷Eta li em de ap homi Israel on en suni su wilipfag, “Ik bohwe suma ik fulohomdoho lahabik ma, niren de suni yiko og-hapul en.

¹⁸Ik bohwe ap yain-kain en habuligmu ne it ap homi enunggul unuk on melal-enepuk on en enendomuk melal-enepuk kwit seneg on anyo fam en habulig on ne domuk it enalong wereg ulug eneg ale anyo fam en habulig on,” ulug ebag. O leimu etman de it anyo hihiloho re o Matana lebag,

¹⁹etan de o Nahaliel lebagdeg, o Bamot lebag,

²⁰ai en de it ap homi Moab on enobam donggoma Dom Pisga anyo funu apma alukwe lei fil deg ma etma lebag.

²¹Ai en de ap homi Israel on anyo en yonggo angge hun Sihon, raja Amori on fam wene su mondotfag,

²²“Nenakni hat hobam hanggwenang kwe etma nit laul en fano lakiek ulug hweag-nesakin. Nit nenebe nim nenowam nim de kweman dahandoho wilibik lalug yabukmu inim ne anggur yabuk yahoma inim kwik laheg, ik bohwe habuligmu nenggeg dul fug. Nit de kwe ebe on fam en dahandoho wilibik la fug angge neg lauk men de nenakni hat hanggwenangma etman wilibik laul,” ulug mondotfag.

²³Famen de at raja anyo en de ap homi Israel on at anggwenang kwe lowag ulug hweag-esebag fug. Aren de autsi dog yapuk on esan lohwal-esebagdeg de o Yahas en leimu etma lebagdeg it ap homi Israel on hukdoho enowarik lebag.

²⁴Famen de weim yapfag on ai fam en de it tentara Amon on Israel enap en humdoho enowatfag. Airoho enowatfagdeg de it Israel on o Arnon fam en de Ik Yabok huli it Amon enap nim huli-hulimu etma sebelik kwebag, huli-hulimu etma re ap kahaleg wereg on de mun enomamne hum deg latfag ma atlug debag.

²⁵Airoho debag ai fam de ap homi Israel on en de ap homi Amori on enobam kota mel, o Hesybon mel, o kota dot-doron alulukwe welatfag on mel del debagdeg de, it anyo o etma yugdoho welatfag.

²⁶O Hesybon aire Raja Sihon en bumbuk lohon ibukota. Aren de raja Moab nim weim yapfagdeg obam sili del dauk kwit de Ik Arnon en yatdoho huli etma delfag.

²⁷Ai fam de it suni felalduk enap en de diroho enele unggut hagdoho ebag, “O Hesybon, Raja Sihon on obam kota fam etma manik. Niren de o kota au nikangge kerap dulug obalma wituk mu hahuk nenenda.

²⁸ Eke salim o kota su fam en duswa ale re, it Sihon autsi esan de indok en hagdoho lausa. O Moab en kota Ar anyo luluhun esausareg, ne, duk-duk o Arnon huli anyo mundoho sebelswa.

²⁹Yaho yei ap hinunggul unuk Moab on, hat mundoho alemat ahen! Hat Kamos apne wauk kahen on anyo mun eleg ahen! Hat de hakni Allah en hobahakeikma re ap o oko lauk on hag ahen, Kamos apne wauk kahen on anyo hat mundoho eleg ahen! Hat de hakni Allah en fotog heheikma re ap dag watil lauk on ahen, hahwelani re raja Amori en sen-enebeheikma at apma ahesa.

³⁰Famen de ketia it enambiangma on omano mundoho eleg ahesa. Kwe o Hesybon en Dibon lauk on fene omano, o Nasyim en de o Nofah on fene omano, o Medeba horogma lauk on fene omano,” ulug ebag.

³¹Airoho debagdeg de it ap homi Israel on anyo o ap homi Amori en on fam etma yugdoho welatfag.

³²Ai en Musa en ap mon-enepuk kwit o kota Yaezer ai kwe kemane en enowarik kuhuk ulug kwe herarik lowag ulug mon-enepfag. Airoho debagdeg ap Israel on en de kota anyo nim ne foma kota dot-doron aluluk kwe wereg on nim sebelik kwebagdeg de ap homi Amori on o etma wereg on omano muko wilibi fesebag.

³³Ai mundoho dulug de ap homi Israel on anyo kwe hwaninggoho re kwe o Basan lauk on fene en lebag. Laukmu re Raja Og obam Basan ahun anyo re autsi sehen foroho on esan lohwal-esebagdeg de ap homi Israel on enowatmin ulug o kota Edrei etma watfag.

³⁴TUHAN en Musa fam uruk kwit de, “At fam hakol bouk fug. An den hat halongap hobahamin. Haren de at along elehap debemihindeg de at omaliki holduk on mel obam anggwenang mel enalong elehap debemihin neg. At aire haren Raja Sihon ap homi Hesybon on melal-enepukmu deberihin anyo hagdoho at fam oho debeiyug,” ulug hweag-etfag.

³⁵Ai fam de ap Israel on en de Raja Og anyo along elehapdoho febagdeg de ebe nim, omaliki nim, ap homi aren melal-enepuk katfag on abirangge nim abirangge binggi enowatfag. Misig eke lil atfag fug. Airoho debagdeg de it anyo o kwenang anyo fam hwelag kwebag.