Read Ninia Yali BILANGAN 22 Bible Online

BILANGAN 22 - Ninia Yali bible

BILANGAN 22

¹Ap homi enunggul unuk Israel on anyo wilip atlug lebagdeg de o Moab donggoma Ik Yordan dahaloho foma fil kota Yerikho horogdoho etma o sabo salik lebag.

²At raja Moab on unuk Balak hun Zipor amloho, anyo en hol-hauk men de ap Israel on en raja Amori on fam debag ale omano holfag, ne ap homi enunggul unuk Israel on ai enebe oho mun esan hum kag deg ma at inim ap homi abirangge inim enowag elek debag.

⁴Airoho debagdeg it Moab enap en de ap Midian melal-enepuk on fam uruk kwit de, “We horog il misig eiya fam ap huhul angge waharuhuk on etman sapi en enggelangge melelang hauk hag nit welahema suma melelang esakohoreg,” ulug ebag. Ai ebag ma re Raja Balak

⁵ en Bileam hun Beor amloho anyo o kota Petor Ik Efrat horogma o Amau etma folo-folo wamagdoho wol dik lowag ulug yonggo mon-enepfag. It mon-enepuk kwit de Balak en wene su walug Bileam hweag-irik lowag ulug mon-enepfag, “Ap unggul unuk eke o Mesir en waharuk angge re hat holuk amag; ap homi enebe re di kwe su kwe saha buroho waharuk kwit de, nit nenobam suma nenowarik wamukoho waharuk.

⁶It de nit hag fug enomamne humdeg. Anggere hat hebe watlug, an nobahet hururung enebik ma! Niren it sebele fesehuk deg o nit nenobam suma en muko wilip-enebuhuk ane boruk kahi. An den boruk kwit de ap homi haren fanoap debeseruk kahen on etma fanoap atuk, ne ap homi haren hururung debeseruk kahen on etma hururung deg wereg ale ai demdoho boruk kahimu anggere,” ulug mondotfag.

⁷Airoho ebag ma re it ap Moab on enowe melal-enepuk on mel Midian on melal-enepuk on mel at Bileam en ap homi Israel on hururung-enebukwag ulug onggo Bileam obahet walug lebag. It anyo Bileam wereg ma aik lebagdeg de at Raja Balak en ebag ale omano at hweag-etfag.

⁸At Bileam en it fam hweag-esauk kwit, “Hit suma noho iek. Sono neg de an den TUHAN en hweag-nuruhu ale etma hit hweag-hesahuk,” ulug ebag ma re it Moab enap melal-enepuk on anyo re Bileam wereg ma etma welatfag.

⁹Airoho wereg ma Allah Bileam akit watfagdeg hein og-hauk kwit, “Bileam, ap etma sa mel hat hobam wahesareg wereg?” ebag.

¹⁰Hein og-hebag ma, Bileam en onggo hweag-utuk kwit, “It aire at Raja Balak o Moab on en de

¹¹ap enunggul unuk misig on eke o Mesir en waharuk kwit di kwe su kwe saharil waharuk en an hweag-nomag ulug mon-enebik wahama wahesa. Raja Balak en an nobam wene mondorik waharuk kwit de it ai aren enowaroho mug-magdoho wilibi fesehu en de at obahet hururung-enebukwag ulug heng-nabeheikma wahesa,” ulug ebag.

¹²Allah ele Bileam fam uruk kwit, “Ap etma ininim la fug ne, ap homi enunggul unuk ai on de hururung-enebuk fug, it aire An den fanoap debeserihik anggere,” ulug hweag-etfag.

¹³Hubet de at Bileam en ap Balak en mon-enepfag on omano hweag-esauk kwit, “TUHAN en de an hit hininim la fug ulug hweag-nereheik anggere hit henobam lakiek,” ulug hweag-esebag.

¹⁴Airoho ebag ma it anyo sombandoho Balak akit lebagdeg Bileam en hininim lauk ale nerim ulug ebag ale omano hweag-irik lebag.

¹⁵Ai ebagman de at Balak en ap foma humdoho atam watfag on anyo sebeleg kweleg yabuk leho on duruk enap neg at akit mondorik watfag.

¹⁶Balak en wene obam mondotfag on iren walug Bileam hweag-irik lebag alere su, “An den de nele abirangge manu ulug heng-hapuk kahi angge re, nerim ulug embesouk fug.

¹⁷An den onggo mun hum-hamdoho og-hiruhuk, ne haren nunggwe ale uhun on etma re an den duhuk neg. Anggere watlug ap homi enunggul unuk ai an nobahet hururung enebik ma,” ulug mondotfag.

¹⁸Famen de, Bileam en onggo uruk kwit, “Emas mel perak mel o hun Raja Balak ebe wereg ma etman abirangge an onggo og-nuruhun famen oho re, an den nakni TUHAN Allah apne wauk kahi on ai awene melaleg ai sahaloho fehi ha fug alereg. Wene dorale fahet ulug famen oho re an den ele sahalihi fug ha alereg.

¹⁹Famen de it yonggo atam wahausa on duswa hagdoho hit suma noholuhup fano. At TUHAN en an nobam hweag-nitmisi ale eke wereg ane, ulug atam noluk atmisi,” ulug ebag.

²⁰Hup ai salim de Allah Bileam akit watfagdeg hweag-utuk kwit, “Ap etma re hat it ininim laul ulug mingming-habik wahesa. Anggere ininim lamihin en fik-fouk din. Famen de haren din ulug mingming-hapuk ale neg diyug,” ulug hweag-etfag.

²¹Likia hubet de Bileam en keledai fam huratuk angge anyo bug debebagdeg de it ap Moab enap melal-enepuk on anyo nim lebag.

²²Famen de Bileam lauk kweleg Allah olok humon debag. Bileam at keledai fam lahabagdeg laukmu amingming angge biren nim eiyogmuroho lauk kweleg, TUHAN ayonggo malaikat kobokwema kwe balmin ulug kwe bulmu unduhuk latfag.

²³Malaikat anyo karog fangdoho kwema unduhukmu hebagdeg keledai anyo kobokwe anyo embeselug yabuk yaho fil etma kwaniroho wilibik lebag. Wilibik lebag ma re Bileam en keledai yeik waroho nikangge walug kwema kwik watfag.

²⁴Ai en malaikat TUHAN anyo kobokwe onggog deg ma, anggur yabuk foma foma yahoma, ne helep il foma-foma unduhukmu etma unduhuk latfag.

²⁵Aireg ma keledai anyo en malaikat TUHAN anyo il hebagdeg de at hihiloho elanma lauk men de Bileam eyog hahambisig helep il fam hembit esebag. Ma Bileam en keledai ai yeik eke nim ware febag.

²⁶Airoho watfag ma, malaikat TUHAN anyo hihiloho mun kelog-kelogma ohwaloho bekit fil oho hware fil oho la fug alereg ma inaik lebag.

²⁷Keledai ai en malaikat TUHAN anyo il hebagdeg kwenangma ying-atfag. Airoho debag ma Bileam mun olok atfagdeg keledai anyo domuk fam fukdoho watfag.

²⁸Airoho debag ma TUHAN en keledai anyo ele ukwag ulug debebag ma, keledai anyo en ele Bileam hweag-utuk kwit, “An den nakni hat hobam siag kereg on dihimu nakni haren an henggik henahanam huli ai yeik nowarehen?” ulug hweag-etfag.

²⁹At Bileam en onggo hweag-utuk kwit, “Nunggwe ulug haren an lal-fal neauk kahen! An nenggikmu karog hag welalepman de mundoho binggi howatle!” ulug ebag.

³⁰Ebag ma keledai ai en onggo uruk kwit, “An aure nakni hat howam keledai o endam et angge nambolowag fam og-haplug noruk kahi anyo eleg a? An den nakni hat hele sahaloho dirihik on eke wereg a?” ulug ebag. Ai ebag ma at Bileam en onggo uruk kwit de, “Eleg,” ebag.

³¹Airoho debagdeg TUHAN en Bileam malaikat TUHAN karog fangdoho unduhuk on anyo il howag ulug debebag ma, folo-folo etano Bileam en orohole belabeg kwenangma sahaun uruk kwit apne webag.

³²Malaikat TUHAN anyo en Bileam hein og-hauk kwit de, “Nunggwe fahet keledai yeik watuk men neg henggik henahanam huli aha? An den boruk kwit de hat lauk kahen ale aire siag behireg hat kwe bal-hapuk katmin ulug wahi.

³³Keledai haren on ai an unduhukmu il neeheik deg de henahanam hihil aha ai. Airoho delep fugmen de an den hat binggi howatle lit deg. Ne, keledai ai en neg de ahap wendatle,” ulug ebag.

³⁴Ai ebag ma at Bileam en onggo hweag-utuk kwit, “An mundoho siag dihi, Nakni. Hat kwema an kwe bal-nabikoho kobokwe bul unduhuk on fahet hea fug angge dihi. Famen ketia nakni haren an lauk kahi ale ai fahet lauk siag behen halug de an sombandoho nobam lamin,” ulug hweag-etfag.

³⁵Famen de malaikat TUHAN anyo en uruk kwit de, “Ap wahesa on etma ininim lakin. Famen haren hele re An den hat diroho in uruk on ai neg uruk katmihin,” ulug ebag ma, Bileam anyo ap Balak en mon-enebik watfag on omano nim lebag.

³⁶Balak en hol-hauk men Bileam waharuk urukmu holfagdeg de at Bileam olohotma o kota Moab Ik Arnon aegma o Moab inim huli-hulimu etma lebag.

³⁷Lebagdeg Balak en Bileam fam uruk kwit de, “Keram wol-hapihik on fam ai nunggwe ulug waharihin fug? Haren boruk kwit de an den onggo higitdoho og-hom fug alereg berihindeg dirihin a?” ulug ebag.

³⁸Ai ebag ma Bileam en onggo uruk kwit, “Yu, ketia an mundoho wahi. Famen de an den nendaman wenggele folug di ale su ale ihi ha fug alereg, At Allah en su on in ulug hweag-nutuk eleg kweleg de,” ulug hweag-etfag.

³⁹Ai ebagdeg de Bileam nim Balak inim lebagdeg o kota Huzot lebag.

⁴⁰Etman at Balak en de sapi foma nim domba foma nim watfag. Wam omano ino fomane re aren Bileam nim ap homi melal-enepuk on at inim lebag on etmano nim og-esebag.

⁴¹Likia sekandoho re Balak en Bileam hondoholug duk Bamot Baal fam lahabag. Etman de Bileam en ap homi Israel on ambiang foma il esebag.