Read Ninia Yali BILANGAN 23 Bible Online

BILANGAN 23 - Ninia Yali bible

BILANGAN 23

¹Bileam ele Balak fam uruk kwit de, “Dia an nobahet mezbah sabiren witmihin, eiya neg sapi yohombuk on sabit en domba yohombuk on sabit en foukdoho fein,” ulug hweag-etfag.

²Airoho hweag-etfag ma re Balak anyo Bileam en hweag-etfag ale higitdoho debag. Yalduk angge mezbah emberim kwe aire misig domog-domog de sapi yohombuk on misig domba yohombuk on misig feil lebag.

³Airoho debebagdeg Bileam en Balak diroho hweag-etfag, “Nakni haren waroho yale fehen angge etma aluluk unduhuk lamin. Hat airoho wereg kweleg de, TUHAN an ninim ambi amul a, eleg a ulug an ha lamin. Fobik de At TUHAN en di ale su ale fahet an hweag-nitmisi on etma an den hat hweag-hitmin,” ulug hweag-etfag. Airoho ebagdeg de at Bileam anyo amu neg duk misig eke funumu lebag,

⁴etma Allah at akit watfag. Watfag ma Bileam en Allah fam uruk kwit, “An den de mezbah yalduk angge sabiren mundoho wiri fehireg, ebe hundomog sapi yohombuk misig nim domba yohombuk misig heheg nim fehi.”

⁵Airoho ebag ma TUHAN en Bileam en wene keroho uhu ale etano hweag-utuk kwit at ebe nikangge sombandoho Balak akit lalug TUHAN en wene eheik alere diroho ulug hweag-irik lakiyug ulug hweag-etfag.

⁶Hweag-etfag ma Bileam sombandoho waharuk men de Balak anyo waroho yaldukmu mezbah aluluk etano ap Moab on enowesi melal-enepuk on etmano nim seberoho unduhuk mu watfag.

⁷Watfagdeg Bileam en wene fobik aruhu ale husumbi su ebag, “O Aram etman domma timur fil lumu en, Balak raja Moab on en an wol-napuk kwit diroho eheik, Watmihindeg an nobahet hele ikma. It enunggul unuk Israel on ai hururung enebin! isi.

⁸Allah en hururung-enepuk eleg kweleg an den hururung enebihi ha alereg a? TUHAN en unggum enobam fesouk eleg kweleg an den unggum enobam fesehi ha alereg a?

⁹Dom-dom funumu etman it enebe an nil fu-esauk kahi; duk-duk etman it yet-esauk kahi. Esakiek, ap homi enunggul unuk enemu on ap enunggul unuk amu on nim sebereg fug on.

¹⁰Yakub en ondoho on ambiangma on aire ololo ahe hag deg ma wenahauk fug alereg; enunggul unuk Israel on aire hum-hamdoho ha fug alereg. An de ap bekitdoho on deg lit wararuhuk lamag. An noluk de ap ai on eleg atuk hagdoho eleg aruhuk lamag,” ebag.

¹¹Airoho ebag ma Balak en Bileam fam uruk kwit, “Haren an nobahet nangginig on duruk kahen? An den hat suma og-haplug waharihik aire it naselei on ai hururung enebukwag ulug. Famen de haren de it fanoap-enepuk kahen aire,” ulug hweag-etfag.

¹²Airoho ebag ma re Bileam en onggo uruk kwit, “An de we TUHAN en diroho iyug ulug hweag-nutuk on neg uruk katmin,” ebag.

¹³Airoho ebagdeg Balak en Bileam fam hweag-utuk kwit, “Nit nambieg obale ekema lakohon ma; etman de ap homi enunggul unuk Israel on ai enambiang foma neg hil hamihin deg etan it hururung-enebiyug,” ulug hweag-etfag.

¹⁴Ai ebagdeg de Balak en Bileam hondoholug o Zofim lekma, Dom Pisga funumu etma lebag. Etman oho re aren mezbah sabit en wiri febagdeg sapi yohombuk misig domba yohombuk misig waroho mezbah enebe ilitdoho emberim kwe feil lebag.

¹⁵Bileam ele Balak fam hweag-utuk kwit, “Nakni hat waroho yale fehen ma eiya wereg kweleg an lamindeg etma TUHAN nim ambi atmin deg watmin,” ebag.

¹⁶TUHAN Bileam nim ambi atfagdeg, aren ele imisi ale ulug etano neg hweag-etfagdeg, TUHAN en hweag-etfag ale anyo Balak akit hweag-omag ulug monde-febag.

¹⁷Monde febag ma re Bileam anyo sombandoho waharuk men de Balak de mezbah horogma etano ap o Moab on enowesi melal-enepuk nim unduhukmu hweag-enebik watfag. Ma Balak en, “TUHAN keroho hweag-hereheik,” ulug hein og-hebag ma,

¹⁸Bileam en fobik aruhu ale ulug husumbi diroho ebag su, “Balak Zipor amloho su nakit ma, An den uruk katmin ale etma neg holduk kamin.

¹⁹Allah re ap homi on hag deg lit we seroho ahummu siag heheg, seiale eheg duruk fug. Allah en sali watuk halug de Aren dipdoho neg duruk! At ele matuk ale halug de uruk ale mundoho neg atuk!

²⁰An den denele fam fanoap-enebiyug ulug hweag-nitsi; ne Allah en fanoap debeseruk kweleg de, an den lisoho wihi ha fug alereg.

²¹Yakub fam de siag ale hag eke hauk fug; Israel fam de anggolo siag deg ale eke wereg fug. TUHAN, Allah it enakni anyo it ininim neg wereg. It enahayeg en enanggiluk duruk kwit: At neg Raja! uruk.

²²It ai Allah en o Mesir en og-eneplug wilibik wahasi on; no banteng maro on en hag it enobahet weim yapuk katsi.

²³Yakub obam de ap enele hwal yiko ulug uk on oho, ne hominanggon en hagdoho debesouk ale eke wereg fug. It Israel on inil hanim de enele hururung fouk fug alereg. It enunggul unuk ai fahet ap en uruk kwit de, Allah en along ale enepuk on etma hakiek! uruk.

²⁴Enunggul unuk ai on aire singa duhum on en hag inatuk hag, ne unduhuk alere singa yohombuk on bekitdoho unduhuk hag unduhuk. Aren aselei angge etmano elehapdoho bil-esa fug angge nim, ne di angge su angge senggelduk angge anyo amep na fug angge nim de ying-atuk fug,” ulug ebag.

²⁵Ai ebag ma Balak ele Bileam hweag-utuk kwit, “Haren it enunggul unuk Israel on ai hururung-enepuk ale herim halug ai, embesein; famen de haren fanoap debesimin ulug oho duk fug!” ulug hweag-etfag.

²⁶Hweag-etfag ma Bileam en onggo hweag-utuk kwit de, “An den nakni hat fam hweag-hutuk kwit, an de TUHAN en diroho in ulug melale nobaharuk ale neg dimin ulug mundoho hweag-hirihi fug men a?” ulug hweag-etfag.

²⁷Ai ebag ma Balak en onggo uruk kwit, “Ma nit obale amumu eke lakohon. Etman At Allah en an nobahet it enunggul unuk ai hururung-enebukwag ulug hobahauk angge fahet dehe ha no re,” ulug ebag.

²⁸Ai ebagdeg de Bileam anyo walug Dom Peor foma fil de lei wereg ma etma lahabag.

²⁹Lahabagdeg Bileam en Balak fam hweag-utuk kwit, “Suma mezbah sabit en wiri femihin deg sapi yohombuk sabit en nim, domba yohombuk sabit en nim foukdoho fein,” ulug hweag-etfag.

³⁰Airoho hweag-etfag ma Balak en de Bileam ele ebag ale etanoroho neg fouk debag. Aren de mezbah misig emberimmu hundomog sapi yohombuk misig nim domba yohombuk misig heg nim feil lebag.