Read Ninia Yali BILANGAN 24 Bible Online

BILANGAN 24 - Ninia Yali bible

BILANGAN 24

¹Debag ma re etano li em Bileam en de, TUHAN enda boruk kwit ap homi Israel on fanoap debesoukwag ulug boruk ulug oluk atfag. Ai fam de aren atam debag higitdoho eneg angge herarik lebag fug. At Bileam en il o lei fil omano fu hauk men de,

²it enunggul unuk Israel on anyo o lekma etma o sabo wit dauk kwit, enunggul unuk hundomog esan kabogdeg wereg ale etanoroho neg wit dauk mu esebag. Airoho esebagman de Allah Aheime en Bileam omamneap debebag ma,

³aren fobik aruhu ale ulug wene husumbi ebag on de su, “Wene hun Bileam Peor amloho ap fobik aruhu ale ulug il hauk ahun en, wene isi ale re su,

⁴Allah ele uruk ale mundoho holsi ahun At mundoho Omamne Humon wereg on anyo enam atuk ale il hasireg, ebe waroho yinggig lit en famen de il fenggenoho isi on.

⁵Yakub omaliki henobam sabore mun ilmu buhundeg, hat hebe welahen kwe mel, Israel yei!

⁶Donggo ape eleg on en doaleg hag deg lahen, It de yaho angge ik aegma yaho on hag deg lahen; e gaharu TUHAN en yaho angge hag deg lahen, it de e lak ik aegma wilibig on hag deg lahen.

⁷It de ik osit ahaik on selelangdoho wamburukmu hwelauk, Anggen a yatuk on fam ik humdoho hwelauk. It enowe raja unduhuk lit melal-enepukmu etma re at Agag, sebeleg kweleg mun along wereg on welaruhu At wene melaldukmu mun leg aruhu.

⁸Allah en it o Mesir en og-eneplug wilibik wahasi, banteng maro on en foruruk hag At en it enobahet weim yapil waharuk katsi. Ap homi enunggul unuk enunggul unuk angge re At aselei on omano Aren bil esaukmu mun eleg amuhup, it enowag aren mun lilibug-lalabag debesehu, it enendog angge re mun simbi-sombo esahu.

⁹ It enunggul unuk ai on de mene singa yohombuk on mel singa hwe on mel hag deg lit, lobo-lobo lalug sahaun deg wereg ma, sa ambong se angge en elele fouk alereg? Ap homi en enele fam hat fanoap hobahaukwag ulug uruk on etma it enobam fanoapdeg welamag, ne ap homi hat hururung hapuk on etma it enobam hururung deg welamag,” ebag.

¹⁰Airoho ebag ma Balak anyo olok en inggik holum Bileam mum hauk kwit, “An den de it naselei on ai haren hururung debesoukwag ulug hayonggo hobaharihik, famen de henahanam hwili ai haren hele fam it fanoap debesoukwag ulug uruk kahen.

¹¹Ketia re hat sombandoho hobam olma lakin! An den onggo og-huruhuk ulug abug hweag-hitihik famen de onggo ai hat hwelowag ulug TUHAN en fano hweag-hereheik fug ai,” ebag.

¹²Ai ebag ma Bileam en onggo hweag-utuk kwit, “An den de nakni haren ap mon-enepihin on etmano fam irihik fug men a?

¹³Nakni haren hobam olma perak mel emas mel wereg angge etma mundoho an og-nuruhun mu hwelahuk men oho re TUHAN wene melaleg sahaloho folug an nendaman bolug ale dihi ha fug alereg irihik fug men a? An de TUHAN en diroho in uruk ale ai neg uruk kahi,” ebag.

¹⁴Bileam ele Balak fam uruk kwit, “Ketia re an oho nunggul unuk on wereg ma enekit lamin. Famen de it enunggul unuk Israel on ai en nakni hat hunggul unuk on fam fobik henobahakup ale fahet hweag-hirik.”

¹⁵Ebagdeg Bileam en fobik diroho aruhu ulug ebag on de su, “Bileam hun Beor amloho en eheik alere su; ap fobik aruhu ale ulug il hauk on en

¹⁶Allah ele uruk on mundoho holsireg, ne Mun Leho wereg on anyo oluk deg on; Omamne Humon anyo enam atuk mu nebe waroho yinggig lit en de nil fenggeneg lit en hauihik on anyo en.

¹⁷An de At nil hauihik ai ketiare fug; an den At nil fu hauihik famen de we yatman fu hauihik. Ap raja misig eke obam indip de Israel on, sohwalanggen dilelduk hag enam aik waruhu. Moab enap melal-enepuk on etma mun hondoroho fesehu enunggul unuk Set on de al berel-enebuhu.

¹⁸Kwenang Edom ai fam ap eneselei on hweria aik kuhup, famen de enunggul unuk Israel on en de mun alongdeg ale neg duhup.

¹⁹At Yakub fam en ap along wereg on eke enam aik waruhu reg, at aselei on mundoho elehap debesehu,” ebag.

²⁰Ai en de enam atuk on ai fam de at Bileam il hauk men de ap homi Amelek on il esebagdeg aren fobik aruhu ale su ebag: “Ap di enunggul unuk su enunggul unuk o kwenangma wereg on en de, Amelek neg de omamne humon. Famen de it enunggul unuk aire ahae fotogdoho etma mundoho-mundoho fahet elehapdoho fesehup,” ulug ebag.

²¹Ai li em enam atuk on ai fam Bileam en Kain ombasi esebagdeg fobik aruhu ale fahet ebag on de su, “Hobale hat welahenma re demdoho hambuk lele wareg, suwe a helep unggulmu wirik laharuk hag.

²²Famen de Hit ap Keni on henebe elehapdoho henobahakup, We horog il misig eiya at Asyur en hat hebe amingming angge ondoho hele wat-haplug lahu,” ulug ebag.

²³Ai en Bileam en fobik aruhu ale ulug eke su oho ebag, “Allah en wene ai duruk kweleg ap homi sa mel enoluk welamuhup no? Mun namelmel deg!

²⁴Famen de o Siprus en fobik ap kapal fam lahalug weim yabik lauk on hag wamuhup, iren de Asyur mel Heber mel sebele fesehup deg, kapal ai oho elehap aruhu,” ebag.

²⁵Ai ulug de Bileam obam sombandoho lamin ulug fouk duruk kweleg Balak oho obam lebag.