Read Ninia Yali BILANGAN 25 Bible Online

BILANGAN 25 - Ninia Yali bible

BILANGAN 25

¹Enunggul unuk Israel on anyo elamna o Sitim Donggoma etma wereg kweleg, it Israel on ap on en homi Moab on etma wereg on nim babi duruk ale indip debag.

²Homi omano en de it ap omano hondog-eneplug enenggembu ilah obahet waroho yalug mot-durukmu omano lakohon ulug mingming-enepuk katfag. Ne, ap Israel on oho re kembu omano mot-duruk kwit de, waroho yalduk angge etmano oho nauk kwit kembu ap Moab on en oho mot-duruk katfag.

³Ap Israel on Kembu Baal anyo o Peor etman mot-debag ma, TUHAN olok humon debagdeg Musa fam uruk kwit de,

⁴“An den ap homi enunggul unuk ai on fam nolok enebuhuk fug anggere, ap homi ai enobahet enowesi kepala wereg on etma sen-eneplug de, An nawene melaleg higitdoho it enebe mundoho ap homi mundoho enolohotma en binggi enowariyug,” ulug ebag.

⁵Ai hweag-itil lauk alere, Musa en it ap Israel on enawene bilinggoho kong-duruk enap omano fam hweag-esauk kwit de, “Hit henemu domog en de hit henunggul unuk sahalimu etman ap kembu Baal o Peor en apne wausa on etma mundoho binggi-enowaruhup,” ulug hweag-esebag.

⁶Airoho hweag-esebagdeg Musa mel ap homi abirangge nim o TUHAN Obam Sabo salegma sokolma etmano oba yatuk kwit, fu hauk men de ap Israel on misig eke en hwe Midian on eke walug obam saboma kurukmu fu hebag.

⁷At Pinehas hun Eleazar amloho Imam Harun omba anyo en debag ale anyo fahet il hebagdeg, at ebe feiyaloho inatlug de ap homi kabogdeg on anyo embeselug lebag. Inggisim misig eke oko re

⁸ap nim hwe nim etano mug-eneplug lebagdeg de o saboma anyo kwik lebag. Ap nim hwe nim biren angge etano inggisim en daloho enowatfag ma re, it Israel on enesahalimu anggin enobam aikoho nik-nak ale duruk katfag on anyo bal-atfag.

⁹Famen de Ai duruk kweleg ap homi waratfag on de enebe 24.000 en waratfag.

¹⁰Ai debag ma TUHAN ele Musa fam uruk kwit,

¹¹“At Penehas hun Eleazar amloho Imam Harun omba ai en amurururoho it Israel on enanggelegma etman An nalong welahi on anyo ili og-nabeheik ai fam An nolok sebel hihireg it enunggul unuk ai eke elehap debesehi fug.

¹²Anggere at Pinehas ai fam hweag-umuk, An nim at nim wene sali keron eke waruhuk anggere.

¹³At nim at ambiangma on nim de li mundoho-mundoho etma imam welamuhup. Aren de An akni Allah anyo nobahet amurururoho nili og-nabeheik ma, ne ap homi Israel enesiag fahet it inim An nim sebe nenepuk kwit hag deheik ai en,” ulug hweag-etfag.

¹⁴Ap Israel on hwe Midian on nim watfag on ai unuk de Zimri hun Salu amloho, it enunggul unuk Simeon on fam en enahain elekwe misig on fahet kepala unduhuk latfag on.

¹⁵Hwe aire unuk Kozbi at ebe hun eke it enunggul unuk ahutdoho Midian on fam en kepala unduhuk latfag on ahaloho.

¹⁶TUHAN en wene melaleg su Musa hweag-etfag,

¹⁷“Ap Midian on hinim weim yapuk kwit it enalong elehapdoho feseiyug.

¹⁸Aire iren siag ale o Peor fam en henebuhuk ulug melalswareg duswa ai fam, ne eke hwe Kozbi ap kepala Midian on ahaloho ai en mel disi ai fam diyug. Hwe Kozbi aire o Peor en anggin enobam aik waharuk li em ware febag ma waratfag on anyo,” ulug hweag-etfag.