Read Ninia Yali BILANGAN 27 Bible Online

BILANGAN 27 - Ninia Yali bible

BILANGAN 27

¹Hun Zelafehad aire ahwelani enebe foaben welatfag, enebe re, hwele Mahla, Noa, Hogla, Milka ha Tirza ha. Hun Zelafehad ai akni re hun Hefer, ne hun Hefer akni re hun Gilead. Gilead akni re hun Makhir, ne hun Makhir akni re hun Manasye ne Manasye akni re hun Yusuf.

²Hun Zelafehad ahwelani foaben etano hun Musa nim Imam Eleazar anyo nim ne it ap homi enunggul unuk ai on melal-enepuk on etmano nim de o TUHAN Obam Sabo salegma sokole kwik laukmu etma kabogdeg wereg ma kwik lebagdeg, iren uruk kwit de,

³“Nit nenakni re o lekma etmano en waratsi famen de at omalik ap angge eke endetsi fug. At ebe re hun Korah nim en enele mul-mul uswareg wene sahalswa on anyo nim disi on fug. Nit nenakni aire at onggwareg asiag fam waratsi.

⁴Famen de we at omalik ap angge eleg ai fam nunggwelug at unuk ai ap homi Israel on enesahalimu oman eleg aruhu? Nit de kwenang etma nit nenengge on amag ulug it nenakni ori autsi etma nim seberoho og-nesakiek,” ulug hweag-esebag.

⁵Airoho ebag ma re wene iren walug watfag on anyo at Musa en TUHAN akit walug hweag-etfag ma,

⁶ne TUHAN en Musa fam uruk kwit de,

⁷ “Hun Zelafehad ahwelani en ehesa on aire iren uk alereg oho ehesa. Anggere it fam it enengge on amag ulug it enakni ori-autsi etma nim seberoho enengge og-esakin. At Zelafehad abinggi angge aire at ahwelani etma fam belabeg laruhu fano.

⁸Haren ap homi enunggul unuk Israel on fam hweag-esauk kwit de, ap misig eke omaliki ap angge ondoho eleg angge waratuk halug de, at angge anggwenang anyo re omaliki hwelani on fam belabe feseruk karuhu.

⁹Ne, at ai lahe ahwelani oho wereg fug halug de, kwenang at angge on aire at ori-autsi ap on fam belabe feseruk karuhu.

¹⁰At are ap on oho eke eleg halug de, kwenang aire hun akni are ap on fam belabe foruk karuhu.

¹¹Ne, hun ai lahe ori autsi oho, akni are oho wereg eleg halug de, kwenang aire ap at unggul unuk on etma fam en at indip on fam en horogdeg on angge atuk karuhu eheik iyug,” ulug hweag-etfag. Wene melaleg aire deg on aire ap homi Israel on en wene melaleg TUHAN en Musa fene en og-itsi on ulug holoho duruk katfag.

¹² TUHAN en ele Musa fam hweag-utuk kwit, “Dom Abarim fam lahaik lalug, etan de o kwenang An den ap homi Israel on fam og-esahukmu etmano fu ha lakiyug.

¹³Hat airoho mundoho fu hahunmu re howe Harun, disi hagdoho hat oho airoho wararuhun,

¹⁴ai indip de o Zin leimu etmano hit biren en An nawene melaleg anyo sahale folug duruhup ai fam. Hit o Meriba en de ap homi abirangge anyo en An nobam enele mul-mul ale uruk em, hiren An nalong welahi ale anyo ik ai fam en ename foruhup fug mu,” ulug hweag-etfag. (Wene aire ik Meriba eleruk mu o Kades en, o Zin leimu etman atfag on.)

¹⁵Airoho ebag ma re Musa en somban uruk kwit de,

¹⁶“TUHAN Allah nakni, Haren di angge su angge enoluk wereg on fam enoluk og-esauk kahen on, ap homi enunggul unuk au melal-enepuk on fahet eke Haren unug-nesakin ulug an den heng-hapuk kahi.

¹⁷ Ap ai ebe re weim yapuk li em panglima sehen foroho on enowe atlug duruk karuhu on. Hat homaliki su domba uluk deg on ap enowe hwal-enepuk on gembala eleg angge hagdoho embesouk fug,” ulug somban ebag.

¹⁸ Ai ebag ma TUHAN en Musa fam uruk kwit de, “Yosua hun Nun amloho ai wol-din. At aire di ale su ale duruk ale fahet mun ape hebeleg. Anggere at unggulmu henggik sebele feiyug.

¹⁹At ebere at Imam Eleazar nim ap homi holduk on ai mundoho nim enolohotma etma inamag ulug hweag-umuk. Ne, it ai enelohotma etman de at sure an nobalmangge inaha ulug eneluge feiyug.

²⁰Ap homi Israel on ai en at ele holoho duruk kamag ulug de hat halong anyo foma minggiroho at og-umuk.

²¹ At Yosua en de keroho dimin ulug Imam Eleazar fam hein og-haukmu re at Eleazar en de An Nenda boruk kahi ale oluk amag ulug de no Urim nim Tumim [6] nim etano fam hein og-napuk karuhu. Airoho duruk kamuhup ai fam de at Eleazar en de, Yosua nim ap homi Israel on nim enawene di wene su wene bilingguruk mu melalduk karuhu,” ulug hweag-etfag.

²²Airoho hweag-etfag ma re Musa en de TUHAN en ebag ale etano higitdoho neg debag. Aren de Yosua anyo Imam Eleazar nim ap homi anyo nim enelohotma etano inaik wamag ulug hweag-etfag.

²³ Inaik watfag ma aren Yosua unggulmu enggik sebele folug de, TUHAN en ebag ale higitdoho re Yosua an nobalmangge su ulug ele unduhuk febag.