Read Ninia Yali BILANGAN 28 Bible Online

BILANGAN 28 - Ninia Yali bible

BILANGAN 28

¹TUHAN en Musa hweag-utuk kwit,

²ap homi enunggul unuk Israel fam hweag-esauk kwit de iren enenda fik-furebelug de li momaleg on etano fam de nauk angge on At TUHAN enda ahayeg hauk angge on omano obahet og-utuk kamuhup.

³Iren TUHAN obahet folug waroho og-utuk kamuhup anggere ebe su: Nukoho hundig-hundig fahet de domba omalik yohombuk biren angge ahapmale wereg fug on umur dua tahun deg on walug de,

⁴misig eke re hubet waroho og-utuk kamuhup on fahet, ne misig ekere hupmu waroho og-utuk kamuhup on fahet.

⁵Domba omalik eta nim seberoho og-utuk kamuhup anggere tepung satu kilogram no zaitun ahalue mun ebe on nim seberoho ininig angge nim.

⁶Aire waroho yalduk angge en keram on de Dom Sinai fam en waroho og-etfag anggere ai. Amben en de TUHAN endama healfag.

⁷Domba omalik ai nim seberoho re anggur ahaik satu liter inim mezbah emberim kwe hilili folug og-utuk kamuhup.

⁸Domba omalik anyo waroho hupmu yalduk kamuhup on ai oho re hubet fahet on waroho yalduk kwit duruk kamuhup ale etanoroho, anggur ahaik nim og-umuhup. Waroho yaluhup angge etma amben en de TUHAN endama healuhu.

⁹ Nukoho folfalik salim de domba yohombuk biren umur satu tahun deg on ne ahapmale mel eleg on mel, dua kilogram tepung mel, no zaitun ahalue nim hahambik deg ma re unuk wareg fahet ulug og-ereheg, ne anggur ahaik inim sapliroho og-ereheg, duruk kamuhup.

¹⁰Waroho yalduk kamuhup angge aire nukoho sabat salim hundig-hundig og-utuk kwit de, nukoho hundig og-utuk on anyo nim anggur ahaik og-utuk on anyo nim seberoho og-utuk kamuhup.

¹¹Bigalem ket indip duruk li etma di bigalem su bigalem fam de TUHAN obahet waroho yal-utuk kamuhup anggere sapi biren yohombuk ket sauwe on, mel, domba yohombuk misig nim, domba omalik yohombuk on ket sauwe atuk angge sabiren enebe domog de enahapmale eleg angge on nim, og-utuk kamuhup.

¹²Werako folug og-utuk angge on en de tepung zaitun ahalue nim sapliroho deg angge nim; ne sapi yohombuk on eta enebe hundomog de tepung tiga kilogram nim; ne domba yohombuk on fahet de dua kilogram tepung nim sapliroho yalduk kamuhup.

¹³Ne domba omalik yohombuk misig hundomog fahet tepung satu kilogram nim, seberoho foruk kamuhup. Werako foruk kamuhup angge aire nauk angge on deg ma re amben en TUHAN endama healduk karuhu.

¹⁴Waroho yalduk kamuhup angge ai inim seberoho re hiren anggur ahaik de sapi yohombuk on fahet dua liter en, ne domba omalik yohombuk on hundomog fahet de satu liter en og-utuk kamuhup. Tahun hundig-hundig etma fam bigalem hundig-handig tanggal satu aik waharuk em hiren waroho yale folug og-utuk kamuhup anggere ai

¹⁵Hiren nukoho hundig-hundig waroho yal-utuk angge nim ne anggur ahaik hwenanggoho og-utuk angge nim etma fam dopnoroho re hit henesiag apelehapdoho henobaharuk on fahet ulug kambing yohombuk on misig eke nim waroho yal-utuk kamuhup.

¹⁶ Bigalem misig fam tanggal empat belas on fam aire nukoho Paskah TUHAN obahet on wereg.

¹⁷ Nukoho ombolim tanggal lima belas fam de roti fituk angge ragi eleg angge nauk salim anyo fahet ebetuk ale indip duruk kamuhup, ne nukoho sabiren hunduko aire hiren roti fituk angge fam wirig on nauk kamuhup fug.

¹⁸Hiren nukoho ai ebetuk kamukoho duruk kwit nukoho keram on ai fam de hiren wene kabog-duruk kamuhuk en ulug henebe seberoho kabog-duruk kamuhup, ne yabuk anggin on eke duruk kamuhup fug.

¹⁹Hiren de TUHAN obahet waroho yalduk angge ulug sapi yohombuk ket sauwe on biren nim domba omalik yohombuk on misig eke nim, ne domba omalik ket sauwe on sabiren nim enebe domog de enahapmale eleg angge waroho yal-utuk kamuhup.

²⁰Hiren werako folug og-utuk angge, og-utuk kamag ulug wereg on omano, tepung zaitun ahalue nim sapliroho walug de; sapi yohombuk omano amu domog fahet de tepung tiga kilogram en ne domba yohombuk on fahet de dua kilogram en,

²¹ne, satu kilogram en de domba omalik yohombuk on etma hundomog fahet foruk kamuhup.

²²Kambing yohombuk on misig ekere hit henesiag apelehapdoho henobahaukwag ulug og-utuk kamuhup. Airoho duruk kamuhup ai fam de hiren ap homi enesiag elehapdoho foukwag ulug enobahat duruk kamuhup ai.

²³Hiren waroho yalduk kamuhup angge etma re hiren heneitogdoho hubet waroho yalduk kamuhup angge etmano fam dopno deberuk kamuhup on.

²⁴Eta ale higitdoho re hiren TUHAN obahet nukoho sabirenam ai waroho yalduk kamuhup. Hiren yal-utuk kamuhup angge etma re hiren nukoho hundig-hundig yaleheg, anggur ahaik hwenanggeg feheg duruk kamuhup on etmano fam dopno angge fahet. Hiren waroho yalduk kamuhup angge ai amben en de TUHAN endama healduk karuhu.

²⁵Nukoho sabit angge fam de hiren wene kabog-dul en ulug henebe seberoho kabog-duruk kamuhup, ne yabuk anggin on eke duruk kamuhup fug.

²⁶ Nukoho keram on fam Soni Anggen baleg fahet esetuk kwit, hari raya duruk on anyo fam en minggu sabiren fotogdoho re, hiren gandum ket baleg on walug TUHAN obahet og-irik waharuk li em de, hiren wene kabog-dul en ulug henebe seberoho kabog-duruk kamuhup, ne hiren yabuk anggin on eke duruk kamuhup fug.

²⁷Hiren TUHAN obahet waroho yal-utuk kwit de sapi yohombuk on biren nim, domba yohombuk ket sauwe on misig nim, domba omalik yohombuk on enebe umur satu tahun deg on sabiren angge, enebe fam hundomog enahapmale eleg on nim, og-utuk kamuhup. Waroho yalduk kamuhup angge ai amben en TUHAN endama healduk karuhu.

²⁸Werako folug yal-utuk angge hundig og-utuk kamag ulug wereg on anyo og-utuk kwit de, tepung zaitun ahalue mel sebereg angge re; sapi hundomog fahet de tiga kilogram en, ne domba yohombuk on fahet de dua kilogram en,

²⁹ne domba omalik omano enebe domog fahet de satu kilogram en ai deberuk kamuhup.

³⁰Kambing yohombuk on eke re hit henesiag apelehapdoho henobahaukwag ulug waroho yal-utuk kamuhup. Hiren airoho duruk kamuhup ai fam de ap homi enesiag anyo apelehapdoho henobahaukwag ulug duruk kamuhup.

³¹Waroho yalduk kamuhup angge etma mel, anggur ahaik hwenanggeg og-utuk kamuhup angge etma mel de hiren hundig-hundig waroho yalduk kamuhup on mel, werako folug yal-utuk kamuhup on mel, etmano fam dopno angge fahet.