Read Ninia Yali BILANGAN 29 Bible Online

BILANGAN 29 - Ninia Yali bible

BILANGAN 29

¹Tanggal satu bigalem sabit on fam de, hit abirangge wene kabog-dul en ulug henebe seberoho kabog-duruk kamuhup, ne yabuk anggin on eke duruk kamuhup fug. Nukoho ai salim de bohweap trompet etmano ele fururuk kamuhup.

²Hiren TUHAN obahet waroho yale folug og-utuk kamuhup anggere sapi yohombuk ket sauwe on misig eke nim domba yohombuk on misig eke mel, domba omalik yohombuk on sabiren angge enebe hundomog de umur satu tahun on ne enahapmale mel eleg on obahet folug og-utuk kamuhup. Waroho yale folug og-utuk kamuhup angge ai amben en de TUHAN endama healduk karuhu.

³Amep eleg angge on obahet foruk kwit de, tepung e zaitun ahalue nim sapliroho weraho on de tiga kilogram en ai sapi yohombuk on fahet, ne dua kilogram en de domba yohombuk on fahet,

⁴ne eke satu kilogram en de domba omalik etano ebe hundomog fahet.

⁵Eke kambing yohombuk on misig oho re ap homi enesiag apelehapdoho fesoukwag ulug waroho yalduk kamuhup. Hiren airoho duruk kamuhup ai fam de ap homi enesiag apelehapdoho fesoukwag ulug enobahet duruk kamuhup ai.

⁶Waroho yalduk kamuhup angge etma re re hiren werako folug bigalem hundig tanggal satu fam og-utuk kamuhup on etmano nim dopno deberuk kamuhup ai. Ne, ekere hiren nukoho hundig-hundig waroho yal-utuk kamuhup on etmano mel, ne anggur ahaik hwenanggoho og-utuk kamuhup on etmano mel fam dopnoroho og-utuk kamuhup. Hiren waroho yal-utuk kamuhup angge etma amben en de TUHAN endama healduk karuhu.

⁷ Tanggal sepuluh bigalem sabit on fam de hit henebe wene kabog-dul en ulug abirangge seberoho kabog-duruk kamuhup. Nukoho ai salim de hiren yabuk anggin on duk fug angge we henambilik hweang neg welamuhup.

⁸TUHAN obahet waroho folug yal-utuk kwit de, sapi yohombuk ket sauwe on eke nim, domba yohombuk on misig mel, domba omalik yohombuk on umur satu tahun deg on enebe sabit en angge enahapmale eleg on mel waroho yaluhup. Hiren waroho yaluhup angge etman de TUHAN endama healuhu.

⁹Hiren amep eleg on hundig yal-utuk kamag ulug on etmano en oho re, tepung zaitun ahalue nim hahambik deg angge tiga kilogram de sapi yohombuk misig on anyo fahet feheg, ne dua kilogram de domba yohombuk fahet feheg,

¹⁰ne, satu kilogram de domba omalik yohombuk on sabit en on enebe hundomog fahet feheg dulug yal-utuk kamuhup.

¹¹Kambing yohombuk on eke re ap homi ai enesiag apelehapdoho fesoukwag ulug waroho yalduk kamuhup, etare hiren henesiag elehap-nenebukwag waroho yalduk kamuhup on anyo mel, nukoho hundig-hundig fahet waroho yalduk kamuhup on anyo mel, amep eleg on folug yal-utuk kamuhup on anyo mel, ne anggur ahaik og-utuk kamuhup on anyo mel, nukoho ai salim fam og-utuk on ulug anyo wereg kweleg de nin etma duruk kamuhup.

¹² Tanggal lima belas bigalem sabit on fam de hit wene kabog-dul en ulug henebe seberoho kabog-duruk kamuhup. Ne, hiren yabuk anggin on ulug eke duruk kamuhup fug. Nukoho sabiren eta fam de hiren TUHAN nalong bolug leho nobaharuk kwit wene kabog-duruk kamuhup.

¹³Nukoho keram on fam de TUHAN obahet de waroho yal-utuk kwit de, sapi yohombuk ket sauwe on nouhwal en nim, ne domba omalik yohombuk on umur satu tahun deg on biren nim empat belas en angge enebe domog de enehapmale eleg on mel waroho og-utuk kamuhup. Hiren waroho og-utuk kamuhup angge ai amben en de TUHAN endama healduk karuhu.

¹⁴Hiren amep eleg angge hundig-hundig og-utuk kamag ulug wereg on etmano en de: tepung zaitun ahalue nim sapli debelug: tiga kilogram de sapi yohombuk misig heg fahet ne dua kilogram de domba yohombuk on hundomog fahet heheg debelug yale foruk kamuhup,

¹⁵ne satu kilogram de domba omalik omano domog fahet. Amep eleg on og-utuk angge ai nim seberoho re anggur ahaik oho enendama boruk aleroho nim yale foruk kamuhup.

¹⁶Eta wereg kweleg eke amu on kambing yohombuk on misig ap homi etma enesiag apelehapdoho fesoukwag ulug waroho yalduk kamuhup. Ai waroho yalduk kamuhup on aire nukoho hundig-hundig waroho yalduk kamuhup on etmano nim, weraho angge walug yalduk kamuhup on etmano nim anggur ahaik yalduk kamuhup on etmano nim dopno angge fahet.

¹⁷Nukoho bireneg salim de sapi yohombuk on nesanggo en ket sauwe on nim, domba yohombuk biren nim, domba omalik ebe umur satu tahun empat belas en, enebe domog enahapmale eleg on nim, og-utlug yalduk kamuhup.

¹⁸Ai waroho yal-utuk kwit, di angge su angge nukoho atam on fam waroho yalduk ale etano hagdoho yalduk kamuhup.

²⁰Nukoho henahaneg on fam de, sapi yohombuk ket sauwe on nanggolop en nim, domba yohombuk on biren nim, ne domba omalik yohombuk on umur satu tahun deg on empat belas en angge enebe enahapmale eleg on nim og-utuk kamuhup.

²¹Airoho waroho yal-utuk kwit, di angge su angge nukoho atam on fam waroho yalduk ale etano hagdoho yalduk kamuhup.

²³Nukoho ohwaneg anggere sapi yohombuk ket sauwe on numen angge nim, domba yohombuk biren nim, domba omalik enebe umur satu tahun deg on empat belas en angge, enebe enahapmale eleg on nim, og-utuk kamuhup.

²⁴Etanim seberoho re di angge su angge nukoho atam on fam waroho yalduk ale etano hagdoho yalduk kamuhup.

²⁶Nukoho foap on fam de, sapi yohombuk ket sauwe on soho en nim, domba yohombuk biren nim, domba omalik umur satu tahun deg on empat belas en angge enebe domog fene enahapmale eleg on nim waroho og-utuk kamuhup.

²⁷Etanim seberoho re di angge su angge nukoho atam on fam waroho yalduk ale etano hagdoho yalduk kamuhup.

²⁹Nukoho folfalik angge waroho yalduk kwit de, sapi yohombuk ket sauwe ligin en nim domba yohombuk biren inim, domba omalik umur satu tahun on empat belas en angge enebe hundomog enahapmale eleg on nim waroho yalduk kamuhup.

³⁰Etanim seberoho re di angge su angge nukoho atam on fam waroho yalduk ale etano hagdoho yalduk kamuhup.

³²Nukoho sabit anggere sapi yohombuk ket sauwe on sabiren nim domba yohombuk biren nim, domba omalik umur satu tahun deg empat belas en angge enebe domog enahapmale eleg on nim waroho yalduk kamuhup.

³³Etanim seberoho re di angge su angge nukoho atam on fam waroho yalduk ale etano hagdoho yalduk kamuhup.

³⁵Nukoho ligin on fam de, hit henebe wene kabog-dul en ulug seberoho kabog-duruk kamuhuhup. Ne, hiren yabuk anggin on eke duruk kamuhup fug.

³⁶Hiren TUHAN obahet waroho yalduk kwit de, sapi yohombuk ket sauwe on misig nim, domba yohombuk misig nim, domba omalik umur satu tahun on sabiren angge enebe domog enahapmale eleg on nim, waroho yalduk kamuhup. Hiren yalduk kamuhup angge ai en de TUHAN endama heladuk karuhu.

³⁷Etanim seberoho re di angge su angge nukoho atam on fam waroho yalduk ale etano hagdoho yalduk kamuhup.

³⁹Aire hiren nukoho humon eneg wereg on etano fam mot-duruk kwit, TUHAN obahet ulug waroho yalduk on yaleheg, amep wereg fug angge og-ereheg, anggur ahaik hwenanggeg og-ereheg, anggerang owam ulug waroho yaleheg, duruk kamuhup on. Hiren eta waroho yalduk kamuhup on etare, hiren henele diroho duhuk suroho duhuk ulug unduhuk folug duruk on anyo fahet mel, ne henenda fano en waroho yal-utuk on anyo mel fam dopno angge fahet.

⁴⁰At Musa en de TUHAN en di on su on duruk kamuhup ale ulug hweag-etfag on etmano abirangge ap homi Israel on fam hweag-esebag.