Read Ninia Yali BILANGAN 3 Bible Online

BILANGAN 3 - Ninia Yali bible

BILANGAN 3

¹Sure At TUHAN en Dom Sinai fam en Musa fam eleg hweag-etfag li em at Harun nim Musa nim enomaliki enahain elekwe deg latfag on.

² Harun omalikisi re ap enebe ohwan welatfag, enebe re: Nadab ai wandeba on ombolim Abihu ombolim Eleazar ombolim Itamar welatfag.

³It enebe re imam on wereg lit duruk kamag ulug ahalue enenggulmu hililoho unduhuk fesebag.

⁴ Famen de Nadab nim Abihu nim de o Sinai leimu en iren TUHAN olohotman obahet duruk kwit omano indok fano on yalfag fug mu waratfag. It enebe birenet de enomaliki ondoho welatfag fug. Mu re at Harun oluk welatfag lien de it Itamar nim Eleazar nim de enebe imam wereg lit duruk katfag.

⁵TUHAN en Musa fam uruk kwit de,

⁶“It enunggul unuk Lewi on aire holohotma wamagdoho hweag-esalug de, iren Harun obahet eyabuk duruk kamag ulug hweag-esakin.

⁷Ite yabuk o An Nobam saboma etma yabuk duruk kwit de iren it imam enobahet nim, ap homi enobahet nim An Nobam saboma etma duruk kamuhup.

⁸It eneyabuk de An nobam Saboma etma duruk angge wereg on etma hwaleheg, ne it ap homi Israel on enobalma angge An Nobam Saboma etma yabuk deheg, duruk kamuhup.

⁹It enunggul unuk Israel on fam en de we enunggul unuk Lewi on neg de at Harun inim aren ondohoma on inim eneyabuk duruk kamag ulug unduhuk feserihik ai.

¹⁰Famen de Harun mel, at omaliki mel de iren yabuk imam on duruk kamag ulug haren unduhuk fesehun. It ai neg duruk kamuhup famen, it fomane eke en yabuk ai on dul ulug duruk halug de ebe binggi waruhup,” ulug hweag-etfag.

¹¹TUHAN en ele Musa fam hweag-utuk kwit,

¹² “Ketia re it ap Lewi on ai An nonggwareg nangge on welamag ulug eneko fesehi. An den it ap homi Mesir on enomaliki wandeba on binggi enowatuk li em etano, it ap homi Israel on enomalik wandeba on nim, ne it enowam omalik keram endetuk on nim de, An den nonggwareg fahet eneko fahat dauihik. It ap homi Israel on enomaliki wandeba on etma enobalma angge re, it Lewi on ai An den hwelauihik; it aire An nangge on amuhup. An TUHAN en ihi,” ulug hweag-etfag.

¹³

¹⁴O Sinai lekma etman TUHAN en Musa fam de

¹⁵ap Lewi on enebe deg aleroho, enomaliki hundomog enenuk lisu balukwag ulug hweag-etfag; it enomalik enebe umur bigalem misig emberim fil deg on halug de mundoho ininuk lisu balukwag ulug hweag-etfag.

¹⁶Airoho hweag-etfag ma at Musa en de TUHAN en hweag-etfag ale anyo higitdoho debag.

¹⁷Lewi omaliki re ap enebe henahan welatfag, enebe re: Gerson mel, Kehat mel, Merari mel. It aire ap homi enombawi enunggul unuk ahut on etma enombasi. At Gerson de omaliki ap enebe biren angge welatfag on de: Libni ha, Simei ha. At Kehat de omaliki ap enebe ohwan angge welatfag on de: Amram ha, Yizhar ha, Hebron ha, Uziel ha. At Merari re omaliki ap enebe biren welatfag on de: Mahli ha, Musi ha. It ap aire ap homi enahain elekwe domog enunggul unuk yig-heg welatfag on etma enombawi.

¹⁸

¹⁹

²⁰

²¹It enunggul unuk Gerson on de at Libni ahain elekwe on nim de at Simei ahain elekwe on nim.

²²It Gerson unggul unuk fene on en enomaliki enebe umur bigalem misig emberim fil deg on neg wenako lisu balfag on seberoho re, 7.500 en.

²³At Elyasaf hun Lael amloho ai en de it enunggul unuk ai on fahet enowe kepala welatfag. It ap homi Israel on o sabo wit heheg wereg ma etmano en de it enunggul unuk ai on de TUHAN Obam Sabo salegman ambol fil mo obuk uruk fil etma welatfag.

²⁴

²⁵Ne, TUHAN Obam Sabo saleg on anyo hwalduk ale fahet de, it enunggul unuk ai en de O Sabo ebe inim, emberimmu sebeleg angge inim, kain sokolma wereg on nim,

²⁶sum anggwe on O Sabo ai ambe lilimol fene hwaninggoho kwelabeg on mel, waroho yaldukmu mezbah mel, o sokole ambe lilimol fam ai sum boroho belabeg latfag on nim etma hwalduk ale fahet aknireg latfag. Iren de no etma fahet yabuk duruk kamag ulug akniroho welatfag.

²⁷It enunggul unuk Kehat on de at Amram ahain elekwe on nim de Yizhar mel, Hebron mel, Uziel mel, enahain elekwe on.

²⁸It Kehat unggul unuk fene on en enomaliki enebe umur bigalem misig emberim fil deg on neg wenako lisu baleg latfag on seberoho re, 8.600 en. It enebe re o TUHAN Obam Saboma etma di angge su angge hwalduk on welatfag.

²⁹At Elisafan hun Uziel amloho en de it enunggul unuk ai on fahet kepala katfag. O Sabo wiroho wereg ma omano en it ai on de TUHAN Obam Sabo salegman selatan fil etma welatfag.

³⁰

³¹Ite no Peti Sali wene wareg yohwareg angge anyo mel, meja mel, lampu owag mel, mezbah-mezbah mel, Ambe Enegma anyo en it imam en duruk angge omano mel, sum o Ambe Enegma anyo huliroho suknoho belabeg on anyo mel, akniroho hwalduk katfag. Ite di angge su angge etma fam en duruk on fahet akniroho welatfag.

³²It Lewi on enowe kepala suku re Eleazar hun Harun amloho anyo welatfag. Aren de it ap o Ambe Enegma anyo duruk on fahet kahal-enusug latfag.

³³It enunggul unuk Merari on de at Mahli ahain elekwe on mel de Musi ahain elekwe on nim.

³⁴It Merari unggul unuk fene en enomaliki enebe umur bigalem misig emberim fil deg on wenako lisu baleg latfag on seberoho re, 6.200 en.

³⁵At Zuriel hun Abihail amloho en de it enunggul unuk ai on enowe kepala atfag. O Sabo wiroho wereg ma etmano en it ai on de TUHAN Obam Sabo salegman utara fil etma welatfag.

³⁶It ai en de o Sabo owag mel, e nunggulig on mel, owag undutuk on mel, hwenie doaleg on mel, di on su on mininggig on etmano mel, yabuk no etma fam en duruk ale on etmano mel, akniroho hwalduk katfag.

³⁷Ai en dumahan mel, apmane doaleg on mel, bepug mel, ambe dag fil on fahet sabu mel etma oho it akniroho hwalduk katfag.

³⁸O Sabo wirig ilonggoma etman de it Musa mel, Harun mel, at Harun omaliki mel de enobale o TUHAN Obam Sabo anyo olohotma, mo indip fil etma hwelebagdeg welatfag. Ite Ambe Enegma anyo it ap homi Israel on fahet di on su on dik kuruk on ulug akniroho welatfag. Famen de it wereg kweleg ap homi fomane en yabuk ai on dul ulug duruk on omano re enebe binggi enowatuk katfag.

³⁹It enunggul unuk Lewi on en enomaliki ap on enebe umur bigalem misig emberim fil deg on, At TUHAN en wene melal-enepfag higitdoho lisu it enunggul unuk domog baleg latfag on etma enebe seberoho re, 22.000 en deg latfag.

⁴⁰TUHAN en Musa fam uruk kwit de, “It Israel on enomaliki ap wandeba on mundoho re An nangge. Anggere it enebe umur bigalem misig emberim fil deg on etma enunuk baliyug. Famen de it enobalmangge re it ap Lewi on ai An nonggwareg nangge ulug uruk kahi ai. An TUHAN en ihi! It Lewi on enowam etma oho re it enunggul unuk Israel on en enowam en omalik keram endetuk on etma obalmangge ulug ihi ai,” ulug hweag-etfag.

⁴¹

⁴²Airoho hweag-etfag ma re at Musa en de TUHAN ebag ale anyo higitdoho neg debag; aren de it omalik ap on

⁴³enebe umur bigalem misig emberim fil deg on etmano enunuk lisu balfag. Balfag ma it enebe abirangge re 22.273 en deg latfag.

⁴⁴Aireg latfag ma TUHAN en Musa fam uruk kwit de,

⁴⁵“It Israel on enomaliki wandeba on etma enobalmangge re it Lewi enap ai An nobahet eneko fesein; ai en it Lewi on enowam etma oho re it Israel on enowam obalmangge feiyug.

⁴⁶It Lewi enap enebe maben deg kweleg it Israel on enomaliki ap wandeba on de enebe 273 en deg, anggere foma alongdoho deg on eta fahet de enonggo baluhup.

⁴⁷Omalik enebe domog fahet de onggo uang perak on foaben fam, onggo ebe An Nobam Saboman deg ale higitdoho fam enonggo baluhup.

⁴⁸Ne, uang ai ebere at Harun mel omaliki mel fam og-esakiyug,” ulug hweag-etfag.

⁴⁹Airoho hweag-etfag ma re at Musa en de TUHAN en melaloho hweag-etfag ale higitdoho debag.

⁵⁰Aren de uang perak on 1.365 en anyo webagdeg

⁵¹de at Harun nim omaliki nim fam og-esebag.