Read Ninia Yali BILANGAN 30 Bible Online

BILANGAN 30 - Ninia Yali bible

BILANGAN 30

¹At Musa en de wene su it ap homi Israel enap enenggul unuk domog enowesi melal-enepuk on etmano fam hweag-esebag.

² Ap misig en eke an Allah fahet eneg on welaruhuk boruk kwit ite ele sali TUHAN fam hombuk baloho uhu fam at anyo ele sali uhu on anyo fam hetdeg hag welaruhu, halug de at ai en de ele sali uhu ale etano higitdoho neg duhu, ne ele eke dahan debehu fug.

³Ne, hwele duhum eke akni obam wereg lit en an Allah fahet eneg on welaruhuk ulug ele sali uhureg ele sali uhu on anyo fam hetdeg hag welaruhu, ne at akni en oho re hwele ai ele uruk on anyo hol-halug enda anggin bohu fug halug de, at hwele duhum on ai en de airoho duhuk ulug uhu ale mel ne ele sali uhu ale mel eta higitdoho neg debehu.

⁵Famen de hwele ai en uruk ale anyo hol-halug akni en enda anggin boruk halug de, hwele aire aren duhuk ulug uhu ale mel ne ele sali waruhu ale anyo mel fam hetdeg welaruhu fug. At akni en duhun fug uhu ai fam de TUHAN en asiag apelehapdoho fohu.

⁶Hwele eke ahun hwelauk eleg on en ele duhuk ale ulug eheg, ite ele sali uruk on fam hetdeg welaheg, atam endaman wenggel-fenggel halug oho, ne we airoho dimin bohureg halug oho uhu halug de, at aire ele uhu on mel sali waruhu on anyo mel fam hetdeg welaruhu. Ne, fobik en hwele anyo ahun hwelahu halug de, at de ele duhuk ulug uhu on nim ne ele sali waruhu on anyo fam nim hetdeg welaruhu, famen aire at ahun en hol hahureg anggin deg fug bohu halug fahet.

⁸Famen de, ahun en lahe wene ai fahet isanggo holug sali ele duhuk ulug uhu on ai dimihin fug ulug kwe balduk halug de, at aire ele uhu on mel, sali waruhu on mel fam hetdeg welaruhu fug. Ne, TUHAN en de at asiag apelehapdoho fohu.

⁹Hwe eke sohwe on en ane, ite ahun en nerim ulug embesesi on en an airoho duhuk ulug ele uhureg, ite ele sali waroho an ai fam hetdeg laruhuk ulug eheg, duhureg halug de aren ele uhu on mel sali waruhu on anyo mel fam hetdeg wereg lit dipdoho debehu.

¹⁰Hwe eke ap hwelahu reg en ele duhuk ulug eheg, ele sali wareheg, duhureg ele uhu on anyo fam hetdeg welaruhu halug de,

¹¹aren ele sali waruhu on anyo higitdoho dip debehu famen de aire at ahun en hol hahureg anggin deg fug boruk halug duhu.

¹²Famen de wene ai holdil lauk kwit, ahun en alele wauk halug de hwe ai en duhuk ulug uhu ale mel, ele sali wene waruhu ale ai mel fam het deg welaruhu fug. At ahun en alele wahu ai fam de TUHAN en asiag apelehapdoho fesehu.

¹³Ap ohwe en an diroho duhuk ulug eheg, ele sali wareheg, duhu men ohore at ahun en dimihin fug ulug eleho fohu halug aire duk ale neg.

¹⁴Famen de wene ai enesanggo holduk li ahun en anggindeg fug boruk halug de, hwe ai en ele duhuk ulug uhu ale mel ele sali waruhu ale mel abirangge etmano dipdoho neg duruk karuhu. At ahun en de hwe ai en duhuk ulug eheik on nim ele sali wareheik on nim aire anggin deg fug bohureg fano dimihin uruk karuhu.

¹⁵Ne, fobik en hun ahun en ohwe ele sali waruhu on mel, duhuk ulug uhu on mel anyo elehap debeseruk halug de, aren elehap debehu on anyo ambiangma re at hun ai en hwelahu.

¹⁶Aire wene melaleg hwelani duhum on akni obam wereg lit duhuk ulug ele eheg, ele sali wareheg, duhu halug ne hwe eke ahun hwelahu on en airoho duhu halug duruk kamuhup ale ulug TUHAN en Musa hweag-etfag on de ai.