Read Ninia Yali BILANGAN 31 Bible Online

BILANGAN 31 - Ninia Yali bible

BILANGAN 31

²“Ap homi Midian on ai en ap homi enunggul unuk Israel on fam duswa ale anyo fahet hiren oho unggulmu enowarik lakiek. Ai mundoho debelug neg de hat hebe wararuhun,” ulug hweag-etfag.

³Airoho hweag-etfag ma re at Musa en ap Israel on fam hweag-esauk kwit de, “Weim yabuhup angge re fik-fouk duruk kamek; hiren de ap homi Midian on ai fam de At TUHAN en unggum enobam fesi on ai debehup en de it enowarik kuhup.

⁴Hit henunggul unuk Israel on etmano fam en hundomog de ap enebe 1.000 en on weim yabik lahup on fahet fouk debeseluhup,” ulug hweag-esebag.

⁵Airoho hweag-esebag ma re it ap homi Israel on enunggul unuk domog etmano en ap 1.000 en heg en-enepfag ma re, enebe abirangge seberoho re 12.000 en ap weim yabukoho fik-fouk deg latfag.

⁶Musa en de it dog yabik lowag ulug mingming-enepuk kwit de at Pinehas Imam Eleazar amloho anyo inim yabik lowag ulug hweag-esebag. At Pinehas en de di angge su angge mun eneg horeg angge etmano mel, ne bohweap trompet ele eneg ale duruk on ulug mel walug lebag.

⁷TUHAN en wene melaloho Musa fam hweag-etfag ale higitdoho re ap Israel on en de it Midian on anyo enowarik kuruk kwit de, etma ap on enebe abirangge enowatil lebag,

⁸aire raja Midian on enebe foaben etano oho, enebere Ewi, Rekem, Zur, Hur, Reba, nim. Bileam hun Beor amloho anyo oho watfag.

⁹Ap Israel on en de homi Midian on mel enomaliki mel hele wat-eneplug waharuk kwit de, iren endag dauk angge mel, kulduk angge mel, enangge di angge su angge mel huhul hwelalug watfag.

¹⁰It enobam kota mel iren on enobam o sabo wiroho wereg kwe omano mel mundoho harep fisatfag.

¹¹Ai mundoho debelug de ap Israel on en enengge huhul angge webag on omano mel enebe hele wareg og-enepfag on omano mel, enowam huhul webag on omano mel,

¹²walug watfagdeg de Musa nim Imam Eleazar nim, ap homi Israel on nim enekit walug watfag. Eta li em de it enebe o Moab donggoma, Ik Yordan aegman o kota Yerikho horogma etma wereg kweleg debag.

¹³Airoho debag ma re Musa mel, Imam Eleazar mel, ne it ap homi Israel on enowesi melal-enepuk on fomane mel de enobam sabo etmano fam en wilip atlug de tentara Israel on waharukmu etmano enolohotma lebag.

¹⁴Lebagdeg de at Musa en de ap tentara enowesi Perwira mel, ap esan lohwaleg en domog fahet kepala etmano mel, ne it enunggul unuk domog etmano en enowesi etmano mel ket sombandoho waharuk on etmano fam bet-enepfag.

¹⁵Aren bet-enepuk kwit de, diroho ebag, “Nunggwelug hiren homi etma enoluk welamag ulug embesehep?

¹⁶ It homi etman de at Bileam ele komo hole folug, o Peor etmano en TUHAN embesoukwag ulug enenda wausa omano hwi? Ai duswa fam de TUHAN en ap homi su fam anggin enobam mondorik wahasi anyo!

¹⁷Anggere, ketia enomalik ap on mel, ne homi ap ahap enapeleg fug on mel etma mundoho enowariek.

¹⁸Famen de homi duhum on ap ahap enapeleg on etma neg de hit fahet hwelakiek.

¹⁹Ne, hit mundoho et ap enowarehep on mel, hit ap wareg sen hehep on mel de o sabo dag fil wereg kweleg nukoho sabiren duhup. Nukoho henahaneg on fam inim, nukoho sabit on fam nim de hit henebe mel, homi hiren hele waroho og-enepuhup on etma inim henebe ho dahup.

²⁰Bogsum kongdeg angge hundomog nim, munangge manangge ahap on fam en nim kambing oruk ane e on ane, etma mundoho horuhup,” ulug hweag-esebag.

²¹Airoho ebagman at Imam Eleazar en ap it dog yapuk katfagdeg sombandoho watfag on anyo fam hweag-esauk kwit, “Wene melaleg TUHAN en Musa fam hweag-itsi on de su.

²²Munangge manangge indok en han na fug angge, emas hag, perak, tembaga hag, bosie hag timah kuron mel singon mel, de indokma yaloho horuluhup. Ne, ai debelug de di angge su angge etma emereg on welam no re nikangge ik fam horuruk kwit duruk on anyo fam horuluhup. Ne, amu angge fomane indok en na alereg on etma re ik horuruk kwit duruk ale on anyo fam horuluhup.

²³

²⁴Nukoho sabit salim de hit henesum ho dahupmu hit henebe emereg on anyo eleg aruhu mu henobam saboma kwik wamuhup ulug hwea-itsi anyo,” ulug hweag-esebag.

²⁵TUHAN ele Musa hweag-utuk kwit de,

²⁶“Hat nim Imam Eleazar nim, it ap homi Israel on enowesi inim seberoho re di angge su angge huhul angge walug wahausa on etma wenahaluhup, aire homi hele wat-eneplug wahausa on mel wam walug wahausa on mel et.

²⁷Huhul angge wausa on etma re hiren bul kwe heiroho biren minggiri folug de, foma re it prajurit sehen foroho enap dog yabik lausa on ai fahet feheg, foma etma re it ap homi alongdoho etma enobahet.

²⁸An TUHAN nobahet folug eneko og-nutuk on de, it sehen foroho on prajurit etma amuhup fil on etman it enengge lima ratus halug de misig heg haren wakiyug. Aire ap hele wat-eneplug wahausa on etman oho, ne wam sapi, keledai, domba, kambing etman oho airoho neg diyug.

²⁹Etma re An TUHAN nobahet eneko foruk on ulug Imam Eleazar fam og-umuk.

³⁰Ne, foma it ap homi Israel on og-esahun on ai en de, it enengge etma lima puluh en deg on de haren misig heg wakiyug, aire ap hele wareg wamuhup on etman oho, ne wam sapi, keledai, domba, kambing halug oho airoho neg diyug. Etma re it ap Lewi enap An Nobam Saboma hwalduk on anyo fam og-esakiyug,” ulug hweag-etfag.

³¹Airoho hweag-etfag ma re Musa nim Imam Eleazar nim en TUHAN en melal-enepfag ale etano higitdoho neg debag.

³²It sehen foroho on prajurit en it enonggwareg fahet hwelebagdeg etano iren huhul webag angge etma seberoho abirangge domba, kambing nim de: 675.000 en ai, ne sapi re 72.000 en ne, keledai re 61.000 en ne hwelani duhum on ap ahap enapeleg on de 32.000 en webag.

³³

³⁴

³⁵

³⁶Webag angge etman foma bul kwe minggiroho re it ap sehen foroho prajurit etmano og-esebag on ebe dindiloho re su: Domba, kambing nim de, 337.500 en ne ebe seberoho etan 675 en aire TUHAN obahet eneko folug og-utuk on fahet; ne sapi re 36.000 en, sapi etman 72 en aire TUHAN obahet eneko folug og-utuk on fahet; ne keledai re 30.500 en, keledai etan wenako 61 en etare TUHAN obahet eneko folug og-utuk on fahet; ne hwelani ap ahap enapeleg on etmano re 16.000 en, ne hwelani etan nenebe 32 en aire TUHAN obahet eneko folug og-utuk on fahet.

³⁷

³⁸

³⁹

⁴⁰

⁴¹Airoho debebagdeg de eneko folug og-utuk on ulug febag on etmano re at Musa en oko Imam Eleazar fam, TUHAN obahet on ulug, wene melaleg TUHAN en hweag-esebag aleroho og-etfag.

⁴²Foma it ap homi fahet on etma re it sehen foroho enap prajurit enobahet on etano higitdoho debebag: domba, kambing mel de 337.500 en, ne sapi re 36.000 en, keledai re 30.500 en, hwelani duhum ap ahap enapeleg on de 16.000 en debebag.

⁴³

⁴⁴

⁴⁵

⁴⁶

⁴⁷TUHAN en wene melaloho Musa hweag-etfag aleroho re it ap etman oho, ne wam omano en oho lima puluh en wereg halug de misig heg oko re, it ap Lewi on TUHAN Obam Saboma yabuk duruk on etmano fam og-esebag.

⁴⁸Airoho debag ma it ap sehen foroho on enowesi Perwira ap tentara Israel on melal-eneplug lebag on etmano, Musa wereg ma watfagdeg,

⁴⁹hweag-utuk kwit de, “Nakni nit de nenautsi prajurit nit nenapma wereg on mundoho wenag-enepuhuk. Men de it enebe mundoho dugdoho wereg ne eke longgo uswa fug.

⁵⁰Ai halug de niren enalili angge emas on mel, enenggik sehene mel, eneyog hwabik mel, helep sehene enenggik seheletma kwelabeg on mel, enesanggoma angge mel, siong ap enemu domog en wausa on mel, walug wahe. Mundoho etma re niren TUHAN og-umul, aire Aren nit nenebe along bal-nenusug welamag ulug,” ulug hweag-etfag.

⁵¹Airoho ebag ma re Musa nim Imam Eleazar nim en de emas etma oko webag. Etma re abirangge enalili angge boruruk on deg latfag.

⁵²It ap perwira ai en TUHAN obahet febag on etma anggin de dua ratus kilogram en hag.

⁵³Famen de it prajurit etma re iren enemu domog en huhul hwelebag angge etmano enonggwareg fahet hwelebag.

⁵⁴Airoho debag ma re Musa nim Imam Eleazar inim en de emas etmano walug de, TUHAN en it enunggul unuk Israel on enalong bal-enusug welamag ulug TUHAN Obam Saboma walug lebag.