Read Ninia Yali BILANGAN 32 Bible Online

BILANGAN 32 - Ninia Yali bible

BILANGAN 32

¹It enunggul unuk Ruben on mel, Gad on mel, de enowam hum kakdoho welatfag. Iren inil hauk men de, kwenang Yaezer mel kwenang Gilead mel de, etma it enowam hwal dauk kam ale mun fano deg ma hebagdeg,

²iren Musa nim Imam Eleazar nim it Israel on fam enowesi melal-enepuk on amu on etmano nim enekit lebag. Lebagdeg iren uruk kwit de,

³“Kwenang o kota Atarot mel, Dibon mel, Yaezer mel, Nimra mel, Hesybon mel, Eleale mel, Sebam mel, Nebo mel, Beon mel, TUHAN let-nenesauk kweleg nit Israel on en sebelik kwik waharuhukmu, etma wam hwalduk kam ale mun fanoreg. Ne, nit de nenowam hum deg ma re,

⁵kwenang etma nit nenengge on amag ulug og-nesaluhup en heng-henepuk kahe. Nit de Ik Yordan foma fil etlema lakiek ulug mingming nenebuk fug,” ulug hweag-esebag.

⁶Airoho ebag ma Musa en onggo hweag-esauk kwit, “It henori hit henunggul unuk on weim yabik lauk kweleg hit welamluhup ai a?

⁷Nunggwe ulug hiren ap homi enunggul unuk Israel on Ik Yordan dahaloho nindig atlug kwenang TUHAN en og-esasimu anyo hwelag lakoho duruk kweleg enakolap kwelap-enepuk kahep?

⁸ O Kades-Barnea en an den o kwenang su inil o lowarik lowag ulug mon-enepihik men oho hit henaknisi en oho airoho neg duswa.

⁹Ite mundoho Eskol donggoma etma lausareg, kwenang ai mundoho inil hausa. Famen de it sombandoho wahausareg de it ap homi Israel on su TUHAN en kwenang og-esasimu etma kwik lauk ale fahet enakolap kwelap-enepswa.

¹⁰ Ai duswa ma eta li em TUHAN olok en de Aren uruk kwit, It aire An nobam dipdoho duruk eleg on. Ai halug de it ap ai en o Mesir en wilibik waharuk li enebe umur 20 tahun emberim fil deg kweleg wilibik wahausa on de, kwenang An den hun Abraham, Ishak mel Yakub mel fam hombuk baloho abug og-esauihik mu etma kwik lahup fug ulug isi anyo.

¹²Ap abirangge re unggum hwelaswaman de we Kaleb hun Yefune amloho ap Kenas on anyo nim, Yosua hun Nun amloho anyo nim neg de, iren TUHAN fam enenda dipdeg latswa ma re unggum hwelausa fug.

¹³TUHAN en it enunggul unuk Israel on fam olok enepsireg de o lei kwe etma leil watil lauk kamag ulug debesesimu empat puluh tahun dag watuk men neg ap At fam ele sahaleg ale duswa on omano mundoho waratswa.

¹⁴Ne, ketia re, hit nim henaknisi en duswa hag wene sahalduk kahep au! Hit de ap henebe kabogdeg lit siag duruk fam TUHAN olok anyo ap homi Israel on fam lahaukwag ulug duruk henap welahep!

¹⁵Hiren sombandoho TUHAN henembol yig-utuk halug de, ap homi enunggul unuk Israel au fotog-esahumu leimu oma anunuroho leil watuk kamuhup, aire hiren duhup fam it enebe eleg atil lahup!” ulug hweag-esebag.

¹⁶Airoho hweag-esebag ma, It ap Ruben on mel ap Gad on mel omano Musa akit horogdoho lebagdeg hweag-utuk kwit de, “Fano nit de atam nit nenowam domba obam helep lehet hukdoho wiruhuk, ne o kota nit nenohwesi nenomaliki nim enobahet dag wiruhuk.

¹⁷Airoho debelug de nit nenori nim weim yabik lahuk en folo-folo fik-fouk duhuk. Weim yabik kuruk kwit aire niren it nenori ai og-eneplug o kwenang it nenori enengge aruhu mu ai kwik lauk kwit lahuk. Nit airoho lauk kweleg de, nit nenomaliki mel nenohwesi mel de suma welamuhup. O kota elehet hukdoho ohoma etma re ap homi o kwe suma wereg on en enowarik kuk alere deg fug we enakol eleg angge welam alereg.

¹⁸It ap Israel on enanggwenang enangge on amag ulug hwelauk elek kweleg de nit dam nenobam sombandoho kwik wamuhuk fug.

¹⁹Nit de it nenori enanggwenang Ik Yordan dahaloho foma fil etma nit dorangge ulug oho eke hwelahuk fug, nit oho nenenggwenang Ik Yordan foma fil mo lahaik waharuk fil suma mundoho hwelauhukmu anggere,” ulug ebag.

²⁰Ai ebag ma Musa en onggo uruk kwit, “Hit dik-demdoho TUHAN obahet dog yabik lahuk ulug fik-fouk deg lahep halug,

²¹ne hiren henesahalimu en Ik Yordan baloho lalug weim yabik lahupdeg ne, TUHAN en melal-henepuk kweleg it heneselei on ai bin enowarik kuhupmu TUHAN en oko wilibi fesehumu,

²²o kwenang ai At apma sebe uhumu neg de, hit sombandoho wamuhup. Ne hiren TUHAN obahet dukwag ulug wereg ale anyo nim it henori fahet on nim anyo fam en hit kolo amuhup, ne TUHAN en de kwenang o mo lahaik waharuk fil su hit henangge amag ulug og-hesahu.

²³Famen de wenggel-hakiyug, hiren henele sali ehep on ai higitdoho duhup fugmen de, hiren TUHAN obam siag duhupmu, hit henesiag ai onggo hit unggum hwelahup.

²⁴Anggere laluhupdeg o kota mel domba obam mel etma wirik lakiek, ne hiren henele sali ehep on ai dip-debehup ale fahet henapeleg am fug!” ulug hweag-esebag.

²⁵Airoho hweag-esebag ma, it Gad on mel, Ruben on mel anyo en uruk kwit de, “Nakni nit de haren melal-nenepuk ale etma nit higitdoho duruk kamuhuk.

²⁶Nit nenomaliki nenohwesi mel nenowam sapi, domba mel, de o kota Gilead suma fesehukmu welamuhup.

²⁷Famen de nit deiyare TUHAN en melal-nenepuk kweleg og-neneplug dog yabik lahuk on ai neg. Nit de Ik Yordan baloho lahuk deg nenakni en hweag-nesehen ale ai neg duhuk,” ebag.

²⁸ Airoho ebag ma Musa en wene melaleg su Imam Eleazar inim, Yosua mel, it Israel on enowesi melal-enepuk on etmano mel hweag-esauk kwit,

²⁹“It Ap Gad on mel, Ruben on mel, de TUHAN wene melaleg anyo mutlug lauk kwit, Ik Yordan dahaloho lalug dog yabuhuk ulug nindig amuhup halug mel, ne iren let henebuhup on fam hit kwenang del dahup halug de, Gilead kwenang aire hiren it enengge on amag ulug og-esahup.

³⁰Famen de iren hit hinim dog yabukoho Ik Yordan dahaloho nindig amuhup fug halug de, ite hit nim higitdoho kwenang o Kanaan etma enangge yohwan esahup,” ebag.

³¹Ai ebag ma ap Gad on nim Ruben on nim en onggo uruk kwit, “Nenakni nit de TUHAN en melal-nenepuk ale ai higitdoho duhuk.

³²Nit de TUHAN en hondog neneplug lauk kweleg o Kanaan kwenang fam etma nindig amuhukdeg dog yabik lahuk, famen de kwenang Ik Yordan foma fil mo lahaik waharuk fil aure nit nenangge on aruhu ai,” ulug ebag.

³³Airoho ebag ma re, Musa en it enunggul unuk Gad on mel Ruben on mel, Manasye on foma mel de, kwenang Sihon mel, raja Amori, o Og raja Basan on mel, o kota mel, kwenang etma maseroho wereg on mel, og-esebag.

³⁴It enunggul unuk Gad on en de kota Dibon mel, Atarot mel, Aroer mel,

³⁵Atarot-Sofan mel, Yaezer mel, Yogbeha mel, obalma nikangge witfag.

³⁶O Bet-nimra mel, Bet-haran mel, etare kota fag omamneroho witfag, ne ai en enowam domba wereg ma ulug mel witfag.

³⁷It enunggul unuk Ruben on en de o kota Hesybon nim, Eleale nim, Kiryataim nim,

³⁸Nebo nim, Baal-Meon nim, Sebam nim, etma witfag. Kota iren nikangge obalma witfag on etma re iren unuk amu on soalfag.

³⁹It enunggul unuk Makhir on hun Manasye omaliki en de o Gilead bin kwik lebagdeg sebele folug de ap homi Amori on etma wereg on etmano muko wilibi fesebag.

⁴⁰Airoho debag ai fahet de, Musa en kwenang Gilead ai it enunggul unuk Makhir on fam og-esebag ma re it enebe yugdoho etma welatfag.

⁴¹Hun Yair unggul unuk Manasye on en de desa etma bin kwebagdeg deloho hwelebag ma, o etma unuk “Desa-desa Yair” ulug soalfag.

⁴²Hun Nobah en de o Kenat mel, o sili-sili etma fam bin kwebagdeg deloho hwelebagdeg de o etma unuk Nobah, at onggwareg unuk feneroho soalfag.