Read Ninia Yali BILANGAN 33 Bible Online

BILANGAN 33 - Ninia Yali bible

BILANGAN 33

¹It ap homi Israel on o Mesir embeselug wilibik watfagdeg, it enunggul unuk etmano domog lohwaloho waharuk kwit it Musa nim Harun nim melal-eneplug waharuk kwit de, o ekema kweheg, ekema kweheg, dil watfag.

²TUHAN en Musa miming-duruk kwit de o it ya kwil da kwil watfag ma etma unuk lisu baloho foukwag ulug hweag-etfag.

³Ap homi enunggul unuk Israel on aire tanggal lima belas bigalem misig wereg kweleg, Paskah keram on anyo nebagdeg de nukoho misig welatlug o Mesir embeselug wilibik watfag. At TUHAN en melal-eneplug waharuk kweleg it anyo o kota Rameses embeselug wilibik laukmu re ap homi enunggul unuk Mesir on,

⁴enomaliki wandeba on TUHAN en binggi enowatfag ma waratfag on etmano sal-enepuk kwit inil esebag. Airoho debag ai fam de ap homi Mesir on enanggembu ilah omano maben hag deg kweleg TUHAN neg de omamne wereg anyo ename febag.

⁵It enunggul unuk Israel on o Rameses embeselug watfagdeg anyo re o Sukot o sabo salik watfag.

⁶Ai en de it anyo lebagdeg de o Etam en, lei elanma etma sabo salik lebag.

⁷Etman de it anyo nikangge sombandoho re o Pi-Hahirot, o Baal-Zefon en mo lahaik waharuk fil etma watfagdeg o Migdol horogma etma o sabo salfag.

⁸Ai en de iren o Pi-Hahirot embeselug de, ik laut baloho re o Etam lei fam kwik lebag; nukoho henahan fam lauk katfagdeg de, it o Mara etma sabo salfag.

⁹Etman de lauk katfagdeg o Elim o sabo salik lebag; etma re ik eleruk nesanggo nim wereg ma e kurma tujuh puluh en nim wilibig latfag.

¹⁰Ai en de it anyo o Elim beselug de o ik unggut durukmu Teluk Suez horogma etma o sabo salik lebag.

¹¹Ai en de it anyo o Zin leimu etma sabo salik lebag, ai en de o Dofka horogma etma, etman de o Alus lebag, ai en de o Rafidim lebag, famen de etma ik nauk welatfag fug.

¹⁵O Rafidim en de bekit Dom Hor fam lauk kwit de, iren obale o ebe deiyan o sabo wiroho nohweil lebag: Sinai leimu en de, Kibrot-Taawa, “An namu neg angge salegma” etman de o Hazerot, Ritma, Rimon-Peres, Libna, o Risa, en de o Kehelata, en de Dom Syafer fam, etman de o Harada, Makhelot, Tahat, Tarah, Mitka, Hasmona, Moserot, Bene-Yaakan, Hor-Gidgad, Yotbata, Abrona en de, o Ezion-Geber en de, o Zin leimu, ai en de Dom Hor kwenang o Edom inim hwili-hwilimu etma nohweil lebag.

³⁸ At TUHAN en awene melaleg fam de, Imam Harun anyo Dom Hor fam lahaik lebag. At ebe etan tanggal satu bigalem foap on fam ne tahun oho 40 fam it ap homi Israel on o Mesir embeselug wilibik watfagdeg anyo waratfag. At Harun ebe waratfag li etare umur 123 tahun deg li waratfag.

⁴⁰ At raja o Arad o Negeb Kwenang fam on, o Kanaan en selatan fil on anyo holduk men de, ap homi Israel on de at anggwenang fil omano waharuk ulug urukmu holfag.

⁴¹Kobokwe o Dom Hor fam en o Moab Donggoma etma lauk kwit de, ap homi Israel on anyo enobam sabo sal heheg nohobag kwe re su: O Zalmona, Funon, Obot, o Abarim lilibug-lalabag esebag ma etma o Moab fam etma, Dibon-Gad, Almon-Diblataim, Dom Abarim, Dom Nebo horogma etma, ne o Moab donggoman Ik Yordan aegma etman kota Yerikho horogma, o Bet-Yesimot dulug o Sitim Donggo dulug etma nohobag.

⁵⁰O Moab Donggoma, Ik Yordan aegman o kota Yerikho horogma etan de, TUHAN en Musa fam

⁵¹di wene melaleg su wene melaleg ap homi Israel on fahet og-etfag on de su,

⁵²“Hiren de ap homi o kwenang etma fam wereg on abirangge buhuloho wilibi fesehup. It enanggembu helep on mel logam on mel, ne iren wene kabog-duruk kwit mot-durukmu etma mel de mun felelengdoho elehap diyug.

⁵³Kwenang aire An den hit og-hesauihik mu anggere, hiren hwelag kulug de hit henebe etma wereg lamuhup.

⁵⁴ Ai en de hiren helep anggen hag henenggik wal-halug hit henunggul-unuk ahutdoho esan deg ale etanoroho henangge on amuhup en de yohwan-diyug. It enunggul unuk lohon fam de hum angge og-esahup, ne enunggul unuk doron fam de dorangge heg og-esahup.

⁵⁵Famen de ap homi o kwenang ai fam wereg on etma hiren buhuloho wilibi fesehup fug halug de, ap homi o etma welamuhup on en de hit henobam bini hinilmu kurukmu duruk kahep hag, it de alog heneiyogma kurukmu duruk kahep hag anggin-fanggin henobaharuk kamuhup. Iren de hit hinim weim yapuk kamuhup.

⁵⁶Hiren it buhuloho wilibi fesehup fug halug de, An den de hit henebe An den it fahet duhuk ulug nele irihik hagdoho henebe elehap henobahakuk,” ulug hweag-esakin ulug og-etfag.