Read Ninia Yali BILANGAN 34 Bible Online

BILANGAN 34 - Ninia Yali bible

BILANGAN 34

¹TUHAN en de Musa fam,

²wene melaleg ap homi enunggul unuk Israel on hweag-esowag ulug og-etfag on de su, “We horog ketia hit o Kanaan kwenang fam, kwenang An den hit henonggwareg henangge on amag ulug og-hesauihik mu anyo kwik lakoho lahep. Hit henobam henanggwenang ai hulu-huli re su.

³Il apma selatan fil en de huli-huli re o Zin leimu etman de ilig-ilig de o Edom huli etma. Mo lahaik waharuk fil en huli-huli re ik Laut Mati ambiang selatan fil etman de,

⁴kwaniroho re il apma selatan fil kobokwe o Akrabim lauk on fam en de dil-dil de o Zin en de o Kades-Barnea il selatan fil etma. Etan kwaniroho il barat laut fil en de o Hazar-Adar huli, etman dil-dil de o Azmon fam.

⁵Etan hwaninggoho re donggo o Mesir nim huli-hulimu etman de ambiang fotogdoho re ik Laut Tengah fam etma.

⁶Il barat fil en hit henobam ai huli-huli fahet de ik Laut Tengah ai welaruhu.

⁷Il emberim utara fil fahet huli-huli re Laut Tengah fam indip dulug de dil-dil de Dom Hor fam

⁸ne etman de kwe Hamat lauk on fam en de dil-dil o Zedad fam,

⁹ne ai en o Zifron en de ambiang fotogdoho re o Hazar-Enan huli etma.

¹⁰Il mo obuk uruk fil de huli-huli aire o Hazar-Enan en indip dulug de o Sefam fam.

¹¹Etman de belabeg de o Ribla o Ain en mo lahaik waharuk fil etman de, dil-dil, mo lahaik waharuk fil en ik Galilea yenggeleg on aegman mo lahaik waharuk fil en duk-duk kwe etman de,

¹²il apma selatan Ik Yordan fam en de ik Laut Mati huli fam etma. Hit henobam henanggwenang maseroho wereg on en huli-huli re ai,” ulug hweag-esakiyug, ulug hweag-etfag.

¹³ Hweag-etfag ma Musa en ap homi enunggul unuk Israel on anyo fam hweag-esauk kwit de, “Kwenang hiren henenggik waldoho helep anggen hwik halug hwelahup on de etma, kwenang aire At TUHAN en wene melaleg fam de it Israel on enunggul unuk soho en foma minggiroho anyo en hwelahup isi on.

¹⁴It enunggul unuk Ruben mel, Gad mel, it Manasye on foma minggiroho mel de, it enangge amag ulug mundoho hwelausa, ne kwenang etma oho re it enahain elekwe deg aleroho yohwan-yohwan atswa.

¹⁵Kwenang it enangge atsi on de Ik Yordan en mo lahaik waharuk fil, o kota Yerikho horogma etma,” ulug hweag-esebag.

¹⁶TUHAN en Musa fam uruk kwit de,

¹⁷“Hit henesahalimu etman kwenang ai yohwan-duhup on de at Imam Eleazar nim de Yosua hun Nun amloho ai nim en.

¹⁸Kwenang ai yohwan-duruk mu it Eleazar nim Yosua nim eta let-enepuk kamag ulug de ap homi it enunggul unuk domog etmano en enowesi melal-enepuk on misig heg enenggik dum ware feseil lowag,” ulug hweag-etfag.

¹⁹Hweag-etfag ma ap enenggik dum ware fesebag on eta ininuk de su: [Enungguk unuk] — [Enowesi melal-enepuk on] Yuda on — Kaleb hun Yefune amloho anyo Simeon on — Samuel hun Amihud amloho anyo Benyamin on — Elidad hun Kislon amloho anyo Dan on — Buki hun Yogli amloho anyo Manasye on — Haniel hun Efod amloho anyo Efraim on — Kemuel hun Siftan amloho anyo Zebulon on — Elisafan hun Parnah amloho anyo Isakhar on — Paltiel hun Azan amloho anyo Asyer on — Ahihud hun Selomi amloho anyo Naftali on — Pedael hun Amihud amloho anyo

²⁹Ap TUHAN en o kwenang Kanaan anyo ap homi enunggul unuk Israel on enanggwenang amag ulug, yohwan esowag ulug mingming-enepfag on ininuk de eta.