Read Ninia Yali BILANGAN 35 Bible Online

BILANGAN 35 - Ninia Yali bible

BILANGAN 35

¹ O Moab donggoman, Ik Yordan aegma kota Yerikho horogman de TUHAN ele Musa fam hweag-utuk kwit,

²“Haren ap homi enunggul unuk Israel on fam hweag-esakin, kwenang it enengge on amag ulug yohwan-esahupmu hwelahup on etman de, o kota nunggwe en hagdoho nim, aluluk kwe enggelangge wilibig on nim de it ap Lewi on etma welamag ulug hiren og-esahup.

³Kota etma re it ap Lewi on wereg lamuhup en de it enangge on aruhu. Enggela lei aluluk kwe welaruhu on etma re iren endetuk on mel kulduk on mel fahet.

⁴Osuk angge etma re unggut-unggut etano ilitdoho 450 meter en, ne ilit duruk kwit de o kota elehet fag oho on fam en ilit duhup.

⁵Aireg ma re it ap Lewi on enobam bumbuk welamuhup kwe etma re ombandu ohwan ilit dohore unggut amu-amu fahet de 900 meter en deg laruhu, ne bulmu etma re enobam kota anyo wereg laruhu.

⁶Ap Lewi on fahet de kota along balegma folfalik en hiren og-esahupmu re it ap apenendoho fug men enori ware feselug de buroho etma lauk kamuhup on fahet og-esahup. Ai it ap Lewi on fam de kota 42 en amu on nim

⁷osuk sal inim og-esahup. Og-esahup on eta abirangge seberoho re 48 kota en ap Lewi on enobahet welaruhu.

⁸Kota it ap Lewi on enobahet wilayah it ap homi Israel on enunggul unuk domog etmano fam welaruhu ale aire. O kota deg ale nim de wilayah ai hum deg ale anyo nim deg aleroho welaruhu” ebag.

⁹ TUHAN en Musa miming-duruk kwit de,

¹⁰ele diroho su it enunggul unuk Israel on fam hweag-esakin, “Hit Ik Yordan mundoho dahaloho o Kanaan nindig amuhup deg,

¹¹Hiren de o kota along balegma welaruhu on fahet ulug ene fohup, ai fam de it ap en enapenendoho fugmen ap ware folug de buroho etma lauk kamuhup en.

¹²O kota eta fam wereg halug de, it ap wareg fil anyo ori en unggulmu watul ulug wamuhup famen de waruhup fug mu ap ai ahap wendat aruhu. Aire ap haren warehen ulug obam hekip hahup on anyo awene it unggum seberoho bilingguruk enap wereg ma etmano owan bilingguk eleg kweleg de ap ai waruhup fug.

¹³Ai fahet de kota ousa on folfalik en eta foukdoho fohup,

¹⁴Henahan de Ik Yordan foma timur fil feheg, ne henahan de o Kanaan kwenang fil feheg, duhup.

¹⁵O kota folfalik en etare kota along balegma on eneko fohupmu, aire hit ap henunggul unuk Israel on fahet mel ap bohon henekit elamna watlug wereg on fahet mel, ite ap bohon yugdoho watlug hit henesahalimu wereg on fahet mel, welaruhu. Ap en lahe ap amu on binggi apenendoho fugmen ware fohureg halug de buroho re o kota eta misig eke fam lauk karuhu.

¹⁶Famen de, ap eke en sehen bosie owag on mel ite helep ane, e ane mel fam en ap binggi ware foruk halug de, ap aire ap binggi watni at; aren siag duhumu re unggum de ebe binggi waruhup.

¹⁹It ap en ap amu on ware fohu on anyo ori horogma on en de ap unggum obam folug binggi watuk ale ai duhup fano. Ne, ap are eke en ap watni anyo hweaho fohureg halug de binggi waruhu ai fano.

²⁰Ap eke en ap eke fam ahummu erim boruk katlug, ap anyo ebe hwik ha lahaik-wambuk ane, ite hwik angge fam unggul obagdoho ware fohu,

²¹ite enggik yinggilig holum waruhu halug ane, ap aire ap watni at; ap ai aren siag duhumu re unggum de ebe binggi waruhup. It ap en ap amu on ware fohu on anyo ori horogma on en de ap unggum obam folug binggi watuk ale ai duhup fano. Ne, ap are eke en ap watni anyo hweaho fohureg halug de binggi waruhu ai fano.

²²Famen de ap eke en ap amu on fam ahummu erim boruk fug kwit en apenendoho ware fouk alereg, aire we hwik ha lahaik-wambuk oho ite hwik angge fam hwikdoho oho ware fouk alereg.

²³Ite ap en inil ha elegman helep imbiloho wamburuk kwit ap eke at aselei on mel fug, ne are ai alema re femin ulug mel wenggeleg elegman ware fohu.

²⁴Wene aireg on fahet halug de ap homi humdoho kabog-debelug bilingguhup deg, ap waruhu on anyo mel ap onggo watul boruk on anyo mel ayo wit-enebuhup.

²⁵Ap homi kabog-duhup on anyo en de ap watsi on ai it watsi on ori en waruk no ulug enebe en mapnuroho foroho lit bilingguruk kamuhup. Ap aire walug nikangge sombandoho o kota along balegma at akol en lahumu etmano walug lahup. Walug lahupmu at ebe etma weregman neg de hun Imam Agung eta li em welaruhu on anyo wararuhu mu neg de at anyo obam indipmu lauk karuhu. Famen de at anyo o kota along balegma at akol en lahumu etmano embeselug wilibik lahureg, durukmu ap wararuhu on anyo ori en hwehakupdeg binggi waruhup halug de, iren unggulmu fohup on aire ap binggi watuk on hagdoho re fug.

²⁹Wene melaleg etma re hit nim henomaliki nim di kwe su kwe welamuhup kwe etman duruk kwit neg welamuhup.

³⁰Wene ap watuk on fahet bilingguruk kwit de, ap waruhu ahun ulug obam hekip hahupdeg halug, at su siag disi ulug ebe binggi waruhup ale aire, aren duhu ale anyo fahet ap biren oho ne alongdoho en oho inil hahup deg uruk halug duhup. Ap misig en il hahureg uhu on fahet de ap obam hekip hehesa on aire demdoho ulug duhup fug.

³¹Ap eke en ap waruhu on aire at ebe binggi waruhup. Aren unggum wahu on aire onggo uang oho fohu fug.

³²Ap eke ap ware folug buroho kota along balegma etmano eke lahu halug de, ap Imam Agung anyo owan waram fug kweleg de, at anyo uang folug obam lowag ulug hweag-umuhup hayog.

³³Hit en airoho duruk kamuhup halug de kwenang hit welamuhupmu etma alema re fohup ai. Ap wareg en de kwenang alematuk kamuhup; Anggere indip amu on fam eke kwenang alematuk on ai fanoap duk ale eke wereg fug, we at ap waruhu ahun ai oluk eleho fohup ale ai neg.

³⁴An de TUHAN, deg lahimu ne An de ap homi enunggul unuk Israel on enesahalimu welahimu re, Kwenang hit welamuhup mu etma alemaruk fug,” ulug hweag-etfag ma hweag-esebag.