Read Ninia Yali BILANGAN 36 Bible Online

BILANGAN 36 - Ninia Yali bible

BILANGAN 36

¹It enunggul unuk ahutdoho Gilead, hun Makhir amloho, Yusuf amloho Manasye ombawi it ap enahain elekwe hundomog etmano re, Musa nim it melal-enepuk on fomane nim wereg ma lebagdeg,

² iren uruk kwit de, “TUHAN en hit mingming-henepuk kwit de kwenang ai ap homi Israel on fam henenggik wal hauk kwit hagdoho helep anggen hwikdoho yohwan-diyug ulug hweag-hesasi. Ne, Aren hit mingming-henepuk kwit de nit nenere Zelafehad angge anggwenang etma re hwelani erekwi etmano fam og-esakiyug ulug hweag-hesasi.

³Famen de hit furoho wenggel-hakiyug, it hwelani ai lahe enahunsi ap enunggul unuk amu on fam hwelahup halug de, kwenang iren on aire ap enunggul unuk ai on enenggik fam waratuk karuhu. Airoho duruk fam de kwenang wilayah niren on fahet hulireg wereg on de dot atuk karuhu.

⁴Tahun kwenang enonggwareg owag oko og-esauk on anyo fam, di angge su angge it enangge on onggo wahup on etmano enonggwareg keram on anyo fam owag og-esauk li em de, kwenang hun Zelafehad ahwelani en etma re, it enahunsi etmano enengge on atuk karuhu, ai fam de nit nenunggul unuk on de nenanggwenang ai eke eleg atuk karuhu,” ulug hweag-esebag.

⁵Airoho ebag ma re at Musa en de ap homi Israel on fam wene melaleg sure TUHAN awene melaleg ulug hweag-esauk kwit, “It hun Yusuf ambiangma on en ehesa on aire demdoho ehesa,

⁶ne ai fahet de TUHAN en uruk kwit de hun Zelafehad ahwelani etma re iren enendan bolug enahunsi hwelauk kamuhup, famen de ap lahe it enunggul unuk misig on halug.

⁷Ap homi Israel on enemu domog en enangge enabinggi angge etma re it enunggul unuk on anyo domog fam het deg laruhu.

⁸Homi it enunggul unuk Israel on au fam en kwenang enabinggi angge waroho belabe foruk kamuhup on de enahunsi oho re it enunggul unuk ai on neg hwelauk kamuhup. Airoho duruk fam de, ap homi Israel on hundomog en de kwenang enomba-enambusi en enabinggi angge fesehup on etmano seneg lamuhup,

⁹ai fam de kwenang it enengge on aire inunggul unuk eke fam en eke fam oko lauk karuhu fug. Ne, it enunggul unuk Israel on etmano domog en de enanggwenang enonggwareg en on omano sen dalug lamuhup,” ulug hweag-esebag.

¹⁰Aireg ma re TUHAN en wene melaleg Musa hweag-etfag on higitdoho re, hun Zelafehad ahwelani hwele, Mahla mel, Tirza mel, Hogla mel, Milka mel, Noa re enahunsi ap at akni en orireg latfag on nim hwelebag.

¹²It aire enahunsi ap enunggul unuk Manasye hun Yusuf amloho anyo on fam en enunggul unuk ahutdoho wereg on etmano fam en hwelebag. Airoho debag fam de kwenang it enangge atfag on anyo re it enunggul unuk it enakni on fene anyo on fam welatfag.

¹³Ap homi enunggul unuk Israel on o Moab donggoma, Ik Yordan aegman, o kota Yerikho horogma etano wereg li em, TUHAN en awene melaleg mel, diroho suroho duruk kamuhup on ulug mel ap homi Israel on enobahet Musa fene en hweag-etfag on de etma.