Read Ninia Yali BILANGAN 4 Bible Online

BILANGAN 4 - Ninia Yali bible

BILANGAN 4

¹TUHAN en Musa nim Harun nim miming-enepuk kwit de,

²it ap Lewi on enunggul unuk ahutdoho Kehat on anyo enahain elekwe on higitdoho enemu domog enunuk lisu baluhup,

³balduk kwit de ap neg enebe umur tiga puluh tahun en de lima puluh tahun huli deg on halug, iren yabuk TUHAN Obam Saboma duk alereg on mundoho etma enunuk baluhup.

⁴It eneyabuk de di angge su angge mun eneg horeg on etma hwalduk kamuhup.

⁵TUHAN en wene melaleg su Musa og-etfag: O sabo anyo meiyalduk ale horog atuk mu halug de at Harun mel, omaliki mel de TUHAN Obam Sabo anyo ilonggoma kwik lalug, sum Peti Sali wene wareg angge yohwareg on olohotman korogdoho belabik watlug de kain ai en de Peti ai sale foruk kamuhup.

⁶Iren airoho mundoho debelug de, iren ahap nonggoleg sako on eke fam de nikangge eke nim sale fohup, airebelug de emberim kwe re kain orohole bohol il hag on fam deiyale fohupdeg de e Peti ai fam beahan kwelabe foruk kamuhup.

⁷Iren de meja roti werako TUHAN obahet foruk angge anyo emberimmu re kain il bohol il on eke fam sambuni fohup, ne meja ai emberimmu re doal angge mel, amben fano angge dupa yaldukmu obale anyo mel, di angge su angge walug feik laukmu obale anyo mel, anggur ahaik hwenanggeg feik lauk angge ikwag anyo mel, fohup. Roti werako foruk kamuhup on etare hundig-hundig meja fam eta welaruhu.

⁸Abirangge etma re iren kain mebon fam sale fohupdeg de ahap on il sako on fam de emberimmu di ale folug de meja ai bearulug lauk on fahet beahan kwelabe fohup.

⁹Iren de kain il bohol hag on eke oko re lampu owag inim lampu ebe inim, no esahe ambunbun hwalduk angge mel, olog angge mel, zaitun ahalue foruk angge obale etmano mel, fam etma sale fohup.

¹⁰Lampu eyog inim ne ai fam duruk angge etmano mundoho inim de sum ahap on il sako on fam hwililipdoho re bearulug lauk angge en emberimmu etma fohup.

¹¹Eta mundoho debelug de iren kain il bohol il on misig fam de mezbah emas on fam wirig angge ai fam sambuni fohup deg, de ahap nonggoleg il sako on misig fam sebele fohup deg de e beahan anyo kwelabe fohup.

¹²Di on su on o Ambe Enegma anyo en duruk angge etma re iren wahupdeg de kain il bohol il on misig fam hwililip duhup. Ai en de iren ahap nonggoleg il sako on misig fam sebele folug de, beahan anyo emberimmu fohup.

¹³Iren de mezbah anyo fam ul omano horuhupdeg de, emberimmu kain il ungu on fam sambuni fohup.

¹⁴Ne, ai emberimmu re iren mezbah ai fam duruk kwit duruk angge etmano fohup on de: Indok obale mel, garpu aeg soap mel, bololduk angge mel, waruk baskom mel. Airoho fohupdeg de iren ahap on il sako on eke fam sebele folug de beahan hilinggi fohup.

¹⁵TUHAN en Musa nim Harun nim hweag-esauk kwit de, “Hiren O sabo saleg on etma meiyalduk li em etma re, at Harun nim omaliki nim de An Nobam Saboma anyo ilonggoma kwik lalug de, di angge su angge mel etman yabuk duruk angge mel etmano sale feik kuruk kamuhup. Airoho debeil lauk em neg de, it ap Kehat enap anyo en harukoho lit waharuk kamuhup. Famen de iren eke di angge su angge etma inil en heheg, horog aik laheg, enahap en bal heheg, mel duhup hayog, di angge su angge etma re mundoho An nobahet eneko wereg ma anggere. Ne, iren airoho duhup halug de it enebe waratuk kamuhup. Ai halug de it ap Kehat enap ai it enunggul unuk Lewi on fam en horoho elehapduk no re, at Harun nim at omiliki nim de iren walug lauk kamuhup angge etmano enesahali kwe fesehehup. An Nobam Sabo ai oko feik lauk kwit it Kehat enap eneyabuk duruk kamuhup on de ai. At Eleazar hun Harun amloho aire, aren An Nobam Sabo ai fahet nim, minyak lampu fahet on nim, amben angge yalduk on nim, no gandum walug hundig-hundig foruk kamu(...)

²¹TUHAN en Musa fam de

²²ap homi Lewi on it enunggul unuk ahutdoho Gerson on en it enahain elekwe enemu domog ininuk baloho wenag-enebukwag ulug miming-debag.

²³At Musa en de it ap on neg enebe umur tiga puluh tahun en de lima puluh tahun deg on iren yabuk TUHAN Obam Saboma etmano durukmu duk alereg on neg ininuk baloho wenag-enepfag.

²⁴It aire yabuk de di angge su angge walug lauk kamag ulug ebag on de su:

²⁵O Sabo ai saleg on kain mel, ilonggo fil mel dag fil mel saleg on ahap sako on fam yihig angge mel, kain O Sabo sokolma wereg on mel,

²⁶kain wirilig on sabu o ambe lilimol fahet on o Sabo horog kwe inim mezbah horog kwe inim etma wereg on mel, kain sokole humon fam wereg on mel, di on su on kain etma ililduk on fahet abirangge mel walug lauk kamag ulug miming-enepfag. It aire yabuk aireg on etma fahet akniroho welamag ulug fesebag.

²⁷Fesebag ma re it Musa nim Harun nim en de at Harun nim at omaliki nim en ap homi Gerson on fam yabuk duruk kamag ulug hweag-esebag on etmano fahet inil kahal-enusug latfag, ne di angge su angge walug la alereg on halug de walug lauk katfag.

²⁸It ap homi Gerson on en eneyabuk O Sabo wirigmu etman duruk katfag alere etma; Yabuk etma re iren hun Harun amloho Itamar anyo en melal-enepuk kweleg duruk katfag.

²⁹TUHAN en Musa miming-duruk kwit it ap homi Lewi on enunggul unuk ahutdoho Merari on enahain elekwe domog wenako lisu balukwag ulug hweag-etfag.

³⁰At Musa en de ap on neg mundoho enebe umur tiga puluh en de lima puluh tahun huli deg on, o TUHAN Obam Saboma etma yabuk durukmu duk alereg on neg wenako inunuk balfag.

³¹Bale folug, it ai en de o Sabo anyo fahet owag mel, e sobang duruk on mel, unduko lahapuk on mel, doal angge mel, walug lauk kamag ulug fesebag.

³²Ai en foma re o sabo anyo fam en maseroho ambe olohotma kwe etmano undutuk on mel, doalduk on mel, bepug delduk on mel, sabu mel, di angge su angge o sabo ai unduhuk welamag ulug deberuk angge etmano mel, walug lauk katfag. It enebe domog de misig angge eke hunduko walug lauk kamag ulug debesebag.

³³It ap enunggul unuk ahutdoho Merari on en yabuk duruk katfag on de ai; iren o TUHAN Obam Sabo wirigmu etman yabuk duruk katfag on etma re hun Harun amloho Itamar anyo en melal-enepuk kweleg duruk katfag.

³⁴At TUHAN en wene melaloho Musa hweag-etfag ale anyo higitdoho re, Musa inim Harun inim ne it ap homi enowesi melal-enepuk on nim en de, it ap Lewi on en ap homi enunggul unuk ahutdoho henahan on, Kehat inim, Gerson inim, Merari inim on etano wenag-enepfag. Iren wenag-enepuk kwit de ap homi enahain elekwe domog heg wenag-enepfag. Iren de ap on mundoho enebe umur tiga puluh tahun en de lima puluh tahun huli deg on, o TUHAN Obam Saboma yabuk durukmu duk alereg on neg ininuk balfag. Inunuk balfag ma atfag on de su: [Ap enunggul unuk] — [Enebe seberoho atfag on] Kehat on — 2.750 en Gerson on — 2.630 en Merari on — 3.200 en Enebe seberoho re: — 8.580 en

⁴⁹At TUHAN en wene melaloho Musa fene en hweag-esebag ale higitdoho re ap enebe domog ininuk baloho re iren yabuk duruk kamag mel, iren hwalduk kamag ulug mel enemu domog akniap debeseil lebag.