Read Ninia Yali BILANGAN 5 Bible Online

BILANGAN 5 - Ninia Yali bible

BILANGAN 5

¹TUHAN en Musa hweag-utuk kwit,

²“Wene melaleg su ap homi Israel on fam hweag-esakin: Ap enebe abirangge etman ouk enahap fene burag siag on hauk kwit halug oho ite enahap enenggali mu etma yebilangge deg lit halug oho, ite ap wareg bal-hahup halug oho re, it ap homi ai on mundoho re it Israel on enobam sabo salegma omano en dagma wilibi feseruk kamuhup.

³An Nebe Nomaliki nim wereg lahimu etma emet am no ulug de it wilibik lowag ulug hweag-esauk kamuhup,” ulug hweag-esakiyug ulug hweag-etfag.

⁴Airoho hweag-etfag ma re ap homi Israel on en wene melaleg ai higitdoho duruk kwit, ap humdoho en ai alereg on halug enobam saboman wilibi feseruk katfag.

⁵ At TUHAN en de Musa fam

⁶di wene melaleg su wene melaleg ap homi Israel on enobahet og-etfag on de su: Ap eke en TUHAN ele higitdoho duruk eleg lit ap eke fam siahap deberuk halug,

⁷ap anyo en asiag fag-duruk kwit onggo ap are siahap debehu on anyo og-utuk kwit dua puluh persen eke nim dopnoroho og-utuk karuhu.

⁸Famen de ap alema re fohu on anyo wararuhu mu ori at horog deg on oho eke wereg fug halug, onggo fohup angge ai oko TUHAN og-umuhup mu, It imam on enangge aruhu. Onggo baluhup angge aire domba yohombuk on ap siag duruk on anyo asiag horukwag ulug fohup on ai nim seberuhup fug.

⁹Ap Israel on en munangge manangge mundoho TUHAN fahet foruk angge etma it imam on foruk angge wauk on ai enangge atuk kamuhup.

¹⁰Ap misig en nunggwangge e TUHAN fahet fohu angge ai at onggwareg fahet neg. We it ap imam on eke og-esahu on neg de imam ai angge aruhu.

¹¹TUHAN en Musa mingming-duruk kwit,

¹²wene melaleg su ap homi Israel on hweag-esakin. Hun ahun en ohwe fam enda meneni obam foruk karuhu lit deg. Aren at ohwe fahet boruk kwit, an erimdoho nabeheg nebe siahapdoho nobahakeg napuk aire at ap amu on nim nohousareg duruk boruk karuhu. Famen de at ohwe en de herag-herag duhumu re at ahun ai furoho olukdeg laruhu fug; ne ap en oho inil eke hahup fug at, ne hwe ebe en ap inim durukmu etano hweag-enepswa fug at. Ite, hun ahun eke en at ohwe en dahandoho duhu fugmen at ahun en enda meneni fohu lit deg.

¹⁵Wene indip biren eta fahet de hun ahun anyo en ohwe walug de it imam enekit waharuk karuhu. Ne, aren de obahet foruk angge satu kilogram tepung gandum on walug waharuk karuhu. Walug watlug de feik wamuhup angge aire enda meneni fahet, ne ahun en ohwe fam enda meneni fesi ulug enegdoho feik waharuk kamuhupmu re tepug ai fam zaitun ahalue oho hililuhup fug, amben angge dupa oho belabuhup fug.

¹⁶At imam en de hwe anyo mezbah olohotma lalug TUHAN olohotma unduhuk lamin ulug hweag-utuk kamuhup.

¹⁷Unduhuk kweleg it imam en mangkuk kwenang on eke walug ik horeg on hililoho ilonggoma kwelabe foruk karuhu. Airoho debelug de aren ul ahe dorangge TUHAN obam hwenie ma en oko re, ik ai fam kwelabe foruk karuhu.

¹⁸Airoho debelug de at imam anyo en de hwe ai oruk bilingguruk kwit, tepung enda meneni fahet feik waharuk on anyo oko hwe anyo enggikmu yinggili fohu, ne at imam anyo neg de ik asig on hururung ahaik debeik waharuk on ai seneg laruhu.

¹⁹Ai mundoho debelug, de imam anyo en hombuk balduk kwit de hwe anyo en oho fano boukwag ulug hweag-uruhu. Ai ulug de at imam en de diroho uruk karuhu, “Hat babi dirihin fug halug, ik su fam hururung hobahaik waharuk on ai hobam aruhu fug.

²⁰Famen, hat demdoho babi dirihin halug de,

²¹TUHAN en hat hunggul unuk on enesahalimu etma hat hunuk hombuk baloho hururung deg on welaruhun lamag. Aren de ha-senggama on ai halo deberuk kwit, hahum neg buag uruk karuhun lamag.

²²Ik hururung ahaik au hahummu kuruk kwit, hahum buag eheg, hasenggama on ai halo aik kweheg, duhu,” ulug hweag-utuk karuhu. Airoho hweag-utuk mu, at hwe ai en onggo uruk kwit de, “An den oho TUHAN en ai fano nabukwag boruk kahi,” uhu.

²³Airoho dulug de at imam anyo en hururung wene ai kertas yinggilig on fam lisu bale folug, ik hururung ahaik asig on ai fam horebehu.

²⁴Ai debelug de imam anyo en ik asig on at hururungap deberuk ahaik anyo hwe anyo en nowag ulug hweag-uruhu. Ne, ik ai nauk mu halug ahummu re at obam ouk aruhu.

²⁵Ai en de imam anyo en Allah obahet foruk angge anyo oko walug TUHAN orohole fil unug-halug mezbah fam etma walug lahu.

²⁶Tepung anyo mundoho abirangge fehesama ulug eneg aleroho re tepung enggik misig en hagdoho yinggiloho walug de mezbah emberimmu yale fohu. Ai en de fotogdoho re ik anyo hwe anyo en nowag ulug hweag-uruhu.

²⁷Hwe ai babi siag demdoho duhu men lahe, ik anyo en hwe anyo ouk mun anggolo on duhureg; ahum buag uruk kwit asenggama on anyo halo uruk halug de, hwe ai unuk de ap homi at unggul unuk on enesahalimu etma hombuk baloho hururung deg laruhu.

²⁸Famen de at siag duhu fug men halug de, hururung anyo at obam am fug angge wereg lit koloroho omalik endag dauk karuhu.

²⁹Wene melaleg airoho ai ap ahun eke en ohwe enda meneni en hip hauk kwit ohwe en de dahandoho disireg duk fug on disi ulug uruk halug de, wene melaleg de airoho duruk kamuhup. At hun ahun anyo en de ohwe anyo TUHAN inim imam nim inil hanim fohureg wene melaleg ai at fam higitdoho debehup.

³¹Ap ai siag ai fam en koloroho welaruhu famen, ohwe ai siag demdoho duhu halug de duhu on ai ambiangma hauk karuhu.