Read Ninia Yali BILANGAN 6 Bible Online

BILANGAN 6 - Ninia Yali bible

BILANGAN 6

¹TUHAN en Musa hweag-utuk kwit,

²“Wene melaleg duruk kamuhup ale suma ap homi Israel on hweag-esakin. Ap enebe hundomog ap en ane, hwe en ane ele unduhuk foruk kwit, An TUHAN obahet eneg ap nazir on welaruhuk, ulug ap nele unduhuk on welaruhuk ulug uruk halug de,

³ ik anggur ahaik mel ahaik wirik on mel nauk karuhu fug. At aire anggur anggen fam en wirig on mel anggen-anggen amu on fam en wirig on mel, de nahu fug. At de anggur anggen ket dahaneg on mel, iringgig on mel nahu fug, ite we di on su on indip anggur fam en on halug oho, anggen ilonggoma on halug oho, alit halug oho nahu fug.

⁵At ele unduhuk fohureg wereg li em aire oruk baluhu fug, ne, ombanisong mel hweruhu fug. Airoho wereg lit aire oruk nim ombanisong nim de yatdoho wilibukwag ulug embesehureg welaruhu. At de ele unduhuk fohu on ai fam hetdeg weregman neg aren ebe TUHAN obahet eneg welatmin ulug uhu on ai mun aruhu.

⁶Oruk ai fam de At ebe Allah obahet eneko fesi ulug eneg deg welaruhu. Aren ele uhu on ai owan eleg atuk fug kweleg de aren ebe emere fahat dahu fug; at de ap wareg angge horogma aik lahu fug, ap wareg ai at onggwareg akni, isinga oho ne ori on oho deg kweleg famen de horogma welaruhu fug.

⁸At ap ebe ele unduhuk fohureg wereg li eta re at ap TUHAN fahet eneko wereg on welaruhu.

⁹Ne, ap misig eke ele unduhuk fohureg amu eneg wereg laruhu on anyo fetag-fetag ap wareg on horogma aruhu mu emet aruhu halug de, ap ai en nukoho sabirenam nangno hauk katlug; neg de aren oruk baleheg ombanisong baleheg duhureg ebe horeg on aruhu.

¹⁰Nukoho ligin angge re aren suwe muluk halon biren ane yalma halon biren ane walug de, imam akit TUHAN Obam Sabo sokolma etma wereg ma feik waruhu.

¹¹Suwe misig ekere imam en asiag elehap duruk on fahet waroho yale fohu. Ne, ekere emet atuk on ai elehap deberuk on fahet waroho yale fohup. Yale folug de nukoho ai salim neg at anyo nikangge oruk TUHAN fahet eneko fohu.

¹²Ne, aren an nebe airoho welatmin ulug ele uhu on anyo nim nikangge kerapdoho uhu. Ne, li atam welaruhu on etano re at ebe mundoho emet aruhu ai en de eta fahet eke wenahaku fug. Alemat aruhu on ai obalma re domba misig umur tahun misig deg on waroho yale fohu.

¹³ Ap homi en enele unduhuk fohupdeg welamuhup on anyo mundoho atuk halug de su ale duhup, Ap aire TUHAN Obam Sabo sokolma etma walug lauk kwit de

¹⁴wam henahan ahapmale eleg on inim walug TUHAN og-irik lahup; domba omalik yohombuk misig eke umur tahun misig deg on ai waroho yalduk on fahet, ne domba omalik hwe on umur tahun misig deg on ai enesiag apelehapdoho beseruk on fahet, domba omalik yohombuk on eke anggerangowam waroho sebe enepuk on fahet fohup.

¹⁵Aren roti si misig yohwareg angge fituk angge fam weraho eleg on fohu angge aire, roti duk on tepung fam wiri folug de, zaitun ahalue nim hahambik debehup, ne kue sap-sabel on aire zaitun ahalue en arorebehup. Eta debelug en de aren nin, roti weraho on mel ahalue mel nim indok yalduk on fahet fohu.

¹⁶Airoho fohupmu re at imam en abirangge etma walug TUHAN akit feik wamuhup, ai en de it enesiag apelehap atuk on fahet mel, indok yalduk on fahet mel omano folug yaluhup.

¹⁷Roti si misig yohwareg angge ai mel de domba yohombuk on anyo nim anggerangowam inim seberuruk on ulug fahet nim TUHAN og-iruhu. Ai en eke werako fohup angge etmano mel, ik nauk on hwenanggoho fohup on etmano mel oho re TUHAN fahet folug og-umuhup.

¹⁸Ap ele unduhuk fohureg welaruhu on anyo re TUHAN Obam Sabo sokolma etano en oruk bale folug de, anggerangowam inim seberuruk kwit ulug yaluhup mu indok nauk karuhu on anyo fam hwik-esa kuhu.

¹⁹Ai debelug domba yohombuk anyo mun esag atuk halug enggik foma eke imam en oko walug roti duk on mel, kue sap sabel on mel, si elma anyo en oko walug ap ele unduhuk fohu on anyo enggikmu fohu.

²⁰Ai debelug imam en de nauk angge etma re TUHAN obahet eneko og-utuk angge ulug ibil unug-hauk karuhu; airoho duhu on aire domba yohombuk on anyo amig mel, aho anggen mel, wene melaleg fam it imam enengge on welaruhu ulug deg on anyo wereg kweleg de, eneko ousa fil on eta imam enangge atuk karuhu. Ai mundoho debelug neg de ap ele unduhuk fohu on ai anggur ahaik nahu fano.

²¹Aire it ap homi en, An diroho duhuk, ulug enele unduhuk folug wereg on en duruk kamuhup ale awene melaleg de airoho, famen de ap homi enele unduhuk fohup on anyo en lahe fohu angge etmano alongdoho fohu halug de, aren diroho duhuk ulug ele sali uhu ale ai dipdoho neg duhu,” ulug, hweag-etfag.

²²TUHAN en Musa miming-duruk kwit,

²³“Harun mel omaliki mel hweag-esauk kwit de iren ap homi Israel fanoap debeseruk kwit de henele diroho uruk kamuhup ulug hweag-esakin:

²⁴TUHAN en fanoap henepuk kwit hwal-henepuk karuhu.

²⁵TUHAN en hit henobam enda kain aheg, enda sako fam henebeheg, duruk karuhu.

²⁶TUHAN en enda henesug lit, seberoho welamag ulug liole henobaharuk karuhu.

²⁷Ne, TUHAN ele uruk kwit de, Iren ap homi Israel fanoap debeseruk kwit An nunuk yiko fanoap debeserukmu re, An den it fanoap debeseruk karuhuk, eheik ulug hweag-esakiyug,” ebag.