Read Ninia Yali BILANGAN 8 Bible Online

BILANGAN 8 - Ninia Yali bible

BILANGAN 8

¹ TUHAN ele Musa fam hweag-utuk kwit,

²“Haren Harun fam hweag-utuk kwit de, lampu owag etano fam lampu ebe sabiren ulog deberuk kwit de, aren lampu ebe obabut hwil-hwaldoho debehumu re lampu eyog indipmu en alukwe fil etma nim seleg deg laruhu ulug hweag-umuk,” ulug hweag-etfag.

³Hweag-etfag ma re at Harun en TUHAN en hweag-etfag ale etano higitdoho debag. Aren de lampu omano ulog dil lauk kwit, lampu eyog alukwe fil deg on etma ulog dil lebag.

⁴Lampu ai obale nim lahabeg emberim fil nim ne ebene ilit angge hagdoho ilit deg on nim de emas buhundoho sahaleg on fam At TUHAN en ilit angge kumu heheg duhup on ulug Musa og-etfag on anyo kumu heheg hilinggebag.

⁵TUHAN ele Musa fam hweag-utuk kwit,

⁶“It ap Lewi on de it ap homi Israel amu on etma enesahalimen ene feselug de, it enobahet enebe ho-enebin.

⁷Ne, ebere diroho debeseiyug: ik enebe ho-enepuk on ulug wereg on ai fam de it enebene kwete-esalug de iren enebe abirangge fene enoruk balukwag ulug hweag-esakiyug ne airoho debelug de enesum abirangge horukwag. Airoho duhup fam it enebe horeg welamuhup.

⁸Airoho dulug de iren sapi yohombuk sauwe on eke oko re tepung werako foruk on fahet ulug nim ahalue hililoho walug wamuhup mu. Ai en haren de sapi yohombuk amun on eke enesiag apelehapdoho embeseruk on fahet wakiyug.

⁹Airoho debelug de ap homi Israel on abirangge kabog-dukwag ulug hweag-esalug de, it ap Lewi on de An Nobam Saboman alukwe fil etma unduhuk lamuhup.

¹⁰Airoho wereg ma it An nomaliki enenggik en de ap Lewi on enenggulmu sebele feseruk kamuhup.

¹¹Ai deg kweleg at Harun en it ap Lewi on ai, it ap homi Israel on en An nobahet eneg angge on debelug An og-nuruhu mu re, iren An nobahet yabuk duruk kamuhup.

¹²Ai debelug de it ap Lewi on anyo enenggik de sapi yohombuk on biren etano unggulmu sebele fohup; misig ekere it enesiag napelehapdoho fesoukwag ulug waroho og-numuhup, ne misig eke re Nobahet waroho yal-nutuk on ulug og-numuhup. Airoho duhup on ai fam de it ap Lewi on ai horeg welamuhup.

¹³Ap Lewi on aire An nobahet eneko feselug, Harun omaliki nim enobahet duruk kamag ulug hweag-esakiyug.

¹⁴Hit en ai ale duruk kwit de, ap Lewi on ai ap Israel on enesahalimen minggiroho, An nangge on welamag ulug eneko feseiyug.

¹⁵Haren it ap Lewi on ai An og-nutuk ale ai debesehun mu neg de, it Lewi on ai enebe An Nobam Saboma etma yabuk duruk ale fahet enonggwareg on deg lamuhup.

¹⁶It ai An den ap homi Israel on enomaliki wandeba ondoho on omano enobalma aeg waroho kwelabe feserihik mu anggere; ite An nobahet neg duruk kamuhup.

¹⁷ An den it ap homi Mesir on enomaliki wandeba ondoho on mel enowam omalik keram endoho on mel mundoho binggi enowatuk kwit de, ap homi Israel enomaliki wandeba on mel, wam omalik keram endetuk on ai mel de, An nonggwareg nobahet on ulug mun eneko fahat-dauihik.

¹⁸Ketia re it ap homi Israel on enomalik wandeba on omano aeg warohore ap Lewi on og-enebihi ai.

¹⁹Ne, it ap Lewi on aire An den oko Harun omaliki nim og-esamin mu, ap homi Israel on enobahet An Nobam sabo ilonggoma etma yabuk duruk kamuhup. Ne, ai en iren de ap homi Israel on etman obale eneg horeg ma etma horogma aik waharukmu enobam anggin-fanggin enobam fesouk no ulug de, it enobahet enesiag elehapdoho enobahain ulug heng-napuk kamuhup en,” ulug hweag-etfag.

²⁰Airoho hweag-esebag ai en de, TUHAN en Musa fam wene melaloho hweag-etfag ale higitdoho re, it Musa mel Harun inim, ap homi Israel on abirangge nim en de ap Lewi on anyo TUHAN obahet fesebag.

²¹It ap Lewi on etmano re enebe ho deheg, enesum ho deheg debag ma re Harun en it enebe eneko TUHAN fahet foruk angge apdoho og-etfag. Ne, aren oho it fahet ho-enepuk ale debag.

²²Ap homi Israel on en ap Lewi on enobahet TUHAN en Musa hweag-etfag ale higitdoho neg debag. Airoho debag ai fam de it ap Lewi on omano yabuk TUHAN Obam Sabo wirigmu duruk ale on atfagdeg, Harun nim omaliki nim en melal-enepuk kweleg duruk katfag.

²³TUHAN ele Musa fam hweag-utuk kwit,

²⁴“Ap Lewi on hundomog enebe umur dua puluh lima tahun emberim fil deg on de An Nobam Sabo ilonggoma etma yabuk duruk kamuhup,

²⁵ne it enebe umur lima puluh tahun atuk on de yabuk men we welamag ulug lole feseruk kamuhup.

²⁶Ai mundoho debelug neg de, aren ap Lewi amu on An Nobam sabo ilonggoma duruk on etma let-esauk karuhu, famen de at yabuk fem dohore duruk karuhu fug. Airoho neg it ap Lewi on yabuk duruk kamuhup ale fahet bekit diyug,” ulug hweag-etfag.