Read Ninia Yali BILANGAN 9 Bible Online

BILANGAN 9 - Ninia Yali bible

BILANGAN 9

¹ Tahun bireneg on fam bigalem misig wereg kweleg it ap homi Israel on o Mesir embeselug wilibik watfagdeg, etano li em Sinai lei fam en TUHAN ele Musa hweag-etfag. Hweag-utuk kwit de, TUHAN en diroho ebag,

²“Bigalem su tanggal empat belas fam mo obuk ik lauk ale atuk kweleg etare ap Israel on en de wene melaleg wereg ale etanoroho soni Paskah duruk kwit mot-duruk kamuhup,” ulug hweag-etfag.

⁴Airoho hweag-etfag ma re at Musa en de ap homi omano en soni Paskah ai fam mot-dukwag ulug hweag-esebag.

⁵Hweag-esebag ma re iren o Sinai lei fam etman, o hupmu atuk kweleg bigalem misig deg ma tanggal empat belas fam mot-debag. Di ale su ale debag on etma re TUHAN en wene melaloho Musa hweag-etfag ale etmano higitdoho neg debag.

⁶Airoho debag famen de, it enanggelegma etma ap foma ap wareg senetfag ma re enebe emereg on welatfag. Ai fam de iren nukoho ai salim Paskah fahet mot-duruk ale ininim debag fug. It omano re it Musa nim Harun nim enekit lebagdeg

⁷hweag-esauk kwit de, “Nit de ap wareg senetuhukmu re nenebe emereg on welahe. Famen de nunggwelug nit de nenori nim wam waroho TUHAN og-om fug angge nit neg airoho welamul?” ulug ebag.

⁸Airoho ebag ma at Musa en onggo hweag-esauk kwit de, “An de TUHAN diroho din ulug hweag-nitmisi on dag nesanggo holmin deg angge re bok welamek,” ulug hweag-esebag.

⁹Airoho ebag ma TUHAN en Musa mingming-duruk kwit,

¹⁰“Ap homi enunggul unuk Israel on fam diroho hweag-esakin: Ap homi hiren henesahalimu en oho ite hit henahain elekwe on oho ap wareg senetswa ma enebe emereg wereg halug ane ite kwe yaron lauk halug oho re, iren oho TUHAN obahet Paskah fam ai mot-duhup.

¹¹Famen de iren mot-duhup on aire bigalem ombolim on fam, bigalem bireneg on wereg kweleg tanggal empat belas salim mot-duhup. Nukoho ai salim mot-duruk kwit de iren enowam domba Paskah anyo nim roti fituk angge ragi eleg angge fam wirig on anyo nim, sayuran asig on nim seberoho nahup.

¹² Nahup angge ai en dindikdoho eke fohup mu hubet sekan duhu hayog, ne wam waroho An og-numuhup on etma owag misig ulug oho eke somboruhup fug. Soni Paskah ai mot-duruk kwit de, wene melaleg wereg ale higitdoho neg diyug.

¹³Ai fam en de it ap homi eke enebe emereg fug, ne kwe yaron mel lauk eleg lit en famen soni Paskah ai fahet mot-duk eleg angge duruk halug de, aren nukoho eneg wereg on etano fam wam waroho An og-nuruhu fug ai fam de, An den it ai fahet An Nomaliki fug on bohuk. Aren airoho duhu ai fam de ambiangma etma hahu lit deg.

¹⁴Ap hit henesahalimu etma eke ap bog on en Paskah fahet mot-dimin boruk halug de wene melaleg wereg ale mel diroho diyug suroho diyug ulug wereg ale mel etmano higitdoho neg duruk kamag. Wene melaleg aire ap abirangge enobahet, it ap homi Israel on inim ap bog on fahet inim wereg,” ulug hweag-etfag.

¹⁵Nukoho o TUHAN Obam Sabo anyo witfag salim de, anggulog anyo watfagdeg O Sabo anyo salik watfag. O hup anggo anyo en dulug hubet huli aire anggulog ai indok ombagbag hag deg latfag.

¹⁷Anggulog ai hundig-hundig lahaik lauk li em de ap homi Israel on enobam sabo meiyaloho hwelalug lauk katfag. Ne, anggulog anyo bok aik wambik waharukmu etano iren nikangge enobam sabo wit-dauk katfag.

¹⁸At TUHAN en wene melaleg fam neg it ap homi enunggul unuk Israel enobam sabo meiyal dauk katfag, ne wituk ale oho re At TUHAN awene melaleg fam neg wituk katfag. Anggulog anyo o TUHAN Obam Sabo anyo emberimmu wereg li re, it enebe etmano bok welatfag.

¹⁹Ne, anggulog anyo anunuroho O Sabo ai emberimmu wereg halug de, iren TUHAN awene melaleg omano holoho re la fug angge etma neg welatfag.

²⁰Famen de eke salim we nukoho dorangge hag anggulog anyo O Sabo ai emberimmu etma wereg latfag. Airoho atuk kweleg famen de it obale ekema welamag ulug oho ne lowag ulug oho re we At TUHAN awene melaleg en uruk aleroho neg duruk katfag.

²¹Eke salim de anggulog ai hupmu en dulug hubet huli neg welaikoho, ne hubet anggulog anyo wiliplug lauk halug it anyo oho wiliplug lakoho duruk katfag. Anggulog anyo lahe we hubet halug oho hupmu halug oho ne amu li em wiliplug lauk halug de it anyo oho lauk katfag.

²²Anggulog ai TUHAN Obam Sabo emberimmu wereg lit nukoho birenam ane, bigalem misig ane, tahun misig ane ite alongdoho halug ane, wereg halug de it oho etma neg welatlug, anggulog anyo laharuk halug neg lauk katfag.

²³It enebe obale ekema wereg ale oho ne o ekema lauk ale oho re TUHAN en wene melaloho Musa hweag-etfag ale anyo higitdoho neg duruk katfag.