Read Ninia Yali MIKHA 1 Bible Online

MIKHA 1 - Ninia Yali bible

MIKHA 1

¹ Ap homi o Yehuda fam welatfag on enowesi Raja Yotam mel, Ahas mel, Hizkia mel, eke dag eke fobikdeg wereg lit melal-enepuk wereg ma, TUHAN en de ap homi Yehuda on mel Yerusalem on mel enobam aruhu ale fahet hweag-esowag ulug, hun Mikha obam kota doron unuk Moresyet on ai fam wene febag.

²Hit ap homi henunggul unuk domog en de an wene imin on ai holiek! Hit ap homi di obam su obam welahep on en de an wene imin on ai fik-furebeiyug. TUHAN mun leho wereg on en hit duruk kahep ale At hesaukmu, fagdoho henenggali warikoho At onggwareg obam mun eneg ma etmano en wilibik waharuk ai henesanggo holiek.

³At ebe wereg ma mun eneg ma etmano en wambik wahareg, o kwenangma di obam su obam dom funu fene eyog belabik lauk.

⁴Airoho wambik waharuk kwit dom funu etma At eyog en mun lebeleg on aheg, hendali indok ambulbul en nunum-nunum naukmu eleg atuk anyo hag aheg, duruk. Ik dom famen wilibik waharuk hag, ik dom fam en kwenang walug donggoma wambik waheg, duruk.

⁵Ap homi Israel on en de Allah enerimdoho wereg lit, ele sahaloho siag neg duruk ai fam de wene ihi on eta mundoho aruhu. Indip sa siag elekwe ap homi Israel on siag duruk no? Indip de it ap homi o kota Samaria indipmu wereg on enonggwareg eneg. Ne, indip sa siag en it ap homi Yehuda on kembu mot-duruk no? Indip de it ap homi o Yerusalem enonggwareg on siag en.

⁶Ai fam de TUHAN en uruk kwit de, “Ap homi Samaria on enobam etma re o meiyaleg mel, helep balureg mel deg ma, ap homi en anggur a yareheg duruk kamag ulug debeseheg, o meiyaleg helep etma donggoma hwik-eseheg, oboule wereg on etma ename feseheg, duruk.

⁷Airoho debelug enanggembu ahut ilitdeg onggo hum angge fam baleg on etma mun luluhun-lalahan debeseheg, ne homi kembu obam wirigmu etma kembu obahet yabuk duruk kamag ulug wereg on etma mel, di angge su angge og-esa kuruk on etma han yal-enebeheg, kembu mun elehap debeseheg duhuk. Homi etma sene fesehukmu re enenggikmu angge fano atuk angge ulug foroho lit onggo di on su on fam wauk angge etma fobik it henaselei on en hwelalug lalug, iren enanggembu enda fanoroho ulug og-ereheg, duhup,” ulug ebag.

⁸Ap homi Samaria on mel Yehuda on mel enayebil mun siag on enobam atsireg, ap homi o kota kwik laul ulug fak lehet ambe hilinggig kwe en kuruk ai hag, siag on ai ap homi an noruk on o Yerusalem wereg on etma enobam aikoho, aik wahareg wereg.

⁹Ai fam de an Mikha nendama mun siag atihikdeg de oba yatuk kahi. An nenda siag atsi ale ai eneg amag ulug de sum wandeg eleg angge ne neyog ahut hwililip deg eleg angge we lauk kwit, mene en kouwa duruk ai hag mel ne suwe huhubi hag on en ele uruk ai hag mel il lauk karuhuk.

¹⁰Nit nenobam siag on aik waha on ai fahet, nit nenaselei on o Gat on etma hweag-esa fug. Hit oba yatuk kahep on ai iren inil henesowag ulug enameg yaruk fug. Yaho hit ap homi o Bet-Le-Arfa[1] henap su. Nit mundoho siag amuhuk ulug uruk kahep ale ai eneg amag ulug de ul fene etma limbuk-lambak uruk kamek!

¹¹Hit ap homi o Safir welahep on suma, sabu hetdoho og-heneplug lahupmu etma henesum nonggoloho henenggali nim-nim lakiyug. Ne, ap homi o Zanaan on de enambong seroho enobam kota en wilibik wamuhup fug. Ne, ap homi o Bet-Haezel on wene etma fahet oba yatuk aire hiren hol halug de, o etma oho nit alele og-nenebuk fug alereg beiyug.

¹²TUHAN en anggin-fanggin mondorik waha ma o Yerusalem fak lehet oho on anyo bakopma aik waha ai en de ap homi o kota Moret on nit let-nesahup ulug henenda ebereg welam fug.

¹³Yaho hit ap homi o Lakhis welahep on, henebe kereta fam lahalug heiye lahup en de henowam kuda fam ilili feil lakiyug. Hiren dam ap homi Israel on en siag duruk ale enobabut oho folug, hiren airoho duruhup ai fam de, ap homi o Yerusalem on oho re hit henobabut wal-heheg siag duruk ai.

¹⁴Ketiare hit ap homi Yehuda on su, hit de ap homi o Moresyet-Gat on enebe o amumu aik lahup. Ne, it raja Israel on de o kota Akhzib en eke let-esauk kamuhup fug.

¹⁵Yaho hit ap homi Maresya on su, TUHAN en hit henebe ap homi hit henobam sebeleg wereg lit sen-henusug welamuhup ulug etma enenggikmu henobahaku. Airoho henobahakumu re ap homi Israel on melal-henepuk enap enomamne on etma re o Adulam owikmu herag amuhup.

¹⁶Hit ap homi Yehuda on su, henomaliki mun henenda hundig on sabu het-eneplug lahup anggere hit fong watuk ale eneg deg lamag ulug de, suwe di on su on wareg filik nauk on unggul owag deg hag, henoruk henunggulmu mundoho hweroho kehebo debeiyug.