Read Ninia Yali MIKHA 2 Bible Online

MIKHA 2 - Ninia Yali bible

MIKHA 2

¹Ap homi eke en it eke nale fesehuk ulug hupanggo enebe nohorukmu etmano yinggig lit enenda ebetlug, iren duk ale mun enomamne wereg ma, o sekan dil laukem dik lauk on etma mun suhwi atuk kamag.

²Iren enendama ebetuk kwit de, iren lahe ap homi en yabuk wirig fahet ebetlug halug de yabuk anyo del-deheg, ne o wirig fahet enenda naukmu halug de o anyo dolulu kwik laheg dulug de, o anyo fam di angge su angge wereg angge mel, ap homi enebe mel mundoho enenggik abusag hwelauk.

³Airoho duruk ai fam TUHAN en uruk kwit, “An den siag on henobam feik waruhuk ulug nenda wenggeldihik mu re, henobam aik waharuk halug de hit bologdoho wilibuk fug ale aruhu. Ne, airoho mondorik waharuk li em aire hit henanduhun yaratlug lauk kamuhup fug.

⁴Eta li em ap homi en enelitno henepuk kwit suni kelem uruk hag, suni fong watuk suni diroho uruk kamuhup: ‘TUHAN en de nit nenobam indipmu suno oho weheikdeg, Aren ap nit sebel-nenebik wahesa on fam og-eseheik. Ai fam de nit nenebe mundoho elek-felek aik lahe, uruk kamuhup’ ” ulug ebag.

⁵Airoho duruk kahep ai en de TUHAN en o etma nikangge TUHAN omaliki og-esahu li em aik waruhu mu re, o etma hat akni amin ulug hit eke hweag-hesahup fug.

⁶Airoho hweag-esaukmu ap homi eke en an nobam uruk kwit de, “Haren nit wene hweag-nesauk eleg. Wene mundoho etma aruhu ale fahet nit hweag-nesa fug, nit de nenenggali aruhu fug.

⁷Nit ap homi Israel on de TUHAN en homan nenobam fesimu welahe no? At TUHAN en airoho nenebuk alereg a? Eleg. At obabut de ap homi enobabut fanoroho duruk on fam ele sako fam hweag-esauk fug ulug a? Hweag-esauk neg,” ulug hweag-nutuk.

⁸Airoho urukmu TUHAN en uruk kwit, “Hiren neg An nomaliki enebe heneselei on hag debeselug enowaruhuk ulug duruk kahep. An nomaliki on hit henori on weim yabik lalug enobam waharuk kwit, enobam olekwe fanoroho wereg ma, laul ulug waharuk men de, etmano hit enobam del daul en ulug nangno enepukmu neg waharuk.

⁹Hiren de An nomaliki homi etmano enobam enenda hundig on fam etmano wereg ma muko wilibi feseheg, ne it enomaliki fam An den enangge di angge su angge fano angge og-esauk kahi on etmano mundoho-mundoho fahet deloho hweleheg, duruk kahep ai.

¹⁰O suma re hit henebe fanoroho welahep fug halereg. O suma re mun fano welaruhu fug, An nerim boruk kahi ale neg duruk kahep ai en de, henebe inatlug de lakiek.

¹¹Hit henobabut de ap nabi on saleg seiale lal-henepuk kwit, fobik anggur ahaik mel, ik ahalue eke naukmu siomo duruk on mel, mun sigdoho nauk kamuhup ulug hweag-hesauk on fahet anggolo hauk kahep ai,” ulug hweag-esebag.

¹²Airoho hweag-esebagdeg TUHAN en ekenim uruk kwit, “Hit ap homi Israel on ando henoluk welahep on dia. Wam domba ambol sombandoho enobam hukmu waharuk ai hag, An den hit henebe misigmu andogdoho henobahakukmu, o leimu wam domba humdoho wereg ai hag, hit henobam etma henebe humdoho welamuhup.

¹³An den hit henangobokwe hut heseheg, sabu hetdoho og-heneplug lausa ma welahepma etman og-heneplug wilibik waruhuk. Airoho og-heneplug wilibik waruhukmu re, hiren kwe sokole fak lehet baleg on etma molulukdoho embeselug wilibik wamuhup. An henakni TUHAN nebe namu neg hit henakni Raja welahimu re, An den neg hit melal-heneplug wilibik waruhuk,” ulug hweag-esebag.