Read Ninia Yali MIKHA 3 Bible Online

MIKHA 3 - Ninia Yali bible

MIKHA 3

¹Hit ap homi Israel henap en henalong welahep on suma henesanggo holiek. Hiren de ap homi foma fanoroho hwal-esa ale henoluk deg liren de,

²katukdoho duruk ale ai henerim deg lit de siag duruk ale fahet henambonoreg lahep. Hiren de ap homi an nunggul unuk on etmano enoluk wereg kweleg enahap ibil eneplug, hiren it enowag fam en inino sobal heheg feseruk kahep.

³Hiren de it enahap dinil-denaldoho embeseheg, enowag welelenggen debeseheg, ne hiren de wam lenggaroho waruk belanga elma kwelapuk omano hag it enebe king-kongdoho debeseheg, duruk kwit, hiren ap homi an nunggul unuk on etma nauk kahep.

⁴Hiren TUHAN fam hweag-utuk kwit, ‘Let-nenebin’ ulug hwiruhup famen de Aren hit henele onggo hweag-hesahu fug. Ne, hiren mundoho kwasik ale duruhup ai fam de, hiren somban uhup on ohore esanggo holuhu fug.

⁵Ap homi an nunggul unuk on ap nabi saleg lal-enepuk kwit de it eke en lahe uang og-esauk on fam halug, ‘Fobik fanoroho welamuhup,’ ulug hweag-eseheg, ne it eke og-esauk eleg on etmano fam de maben deg bolug de eneseleiroho welaheg, duruk ai. Ne it ap enebe nabi saleg wereg lit airoho duruk enap etma fahet TUHAN en uruk kwit,

⁶“Hiren airoho duruk kahep ai en de, hit henobahet mo yatuk on de mundoho obuk uhu. Ne, airoho obuk uhumu re mum aheg, ne An nendama boruk kahi ale etmano hena hauk hag fam ha fug angge welaheg, ne hit henape nong-hong uhumu hiren diroho airoho ulug eke uhup fug,” ulug isi ebag.

⁷It ap eke wene fobik aruhu ale ulug mel hweag-esauk on etma mel, ne it eke enenda seleg amag ulug di on su on duruk on etma mel de fobik Allah it fam ele onggo hweag-esahu fug ai en de, it enenggali atlug mundoho enorohole wambuhu.

⁸Airoho duhup famen, an neg de nakni TUHAN en nomamne og-nereheg, ne Aheime yohware nobahakeg disimu welahi. Airoho nobahasireg, wene katukdoho debeseruk ale fahet mel, ne ap homi Israel on en siag duruk ale etma fahet nambong seroho enenggali ware feseheg, dukwag ulug Aren airoho nobahasimu welahi.

⁹Yaho hit ap kaindeg ap homi Israel on enobahet welahep henap su, an den nele imin on aire furoho holiyug. Hiren de ap homi enawene katukdoho bal-enebuk fug angge debeseruk kwit de ahamdoho re siagdoho neg debeseruk kahep.

¹⁰Hiren de o kota Yerusalem Allah onggwareg obam anyo orohole hilingguruk kwit de ap homi enowareheg, wene katukdoho on fam duk aleg angge deheg duruk kwit wutuk kahep.

¹¹Hit ap o kota fam kain wereg lit henalong welahep on en ohore, wene wut-nesowag ulug halug de onggo og-hisil lauk em neg de enawene baleheg, ne it ap imam en de ohore wene hweag-nesakiek ulug onggo baloho uruk halug neg TUHAN en awene melaleg anyo hweag-eseheg, duruk kahep ai. Ne, hit ap nabi en ohore, Allah en diroho duhup ulug uruk ale hweag-esakohore uang og-hesauk halug neg hweag-esauk kahep. Airoho duruk kwit it abirangge en de, “Nit TUHAN inim hundig welahe, ne At ebe nit nenesahalimu wereg ma re, nit fam wene siag on eke atuk karuhu fug,” ulug boruk kahep ai.

¹² Ne, hiren airoho mun kwasik ale neg duruk kahep ai en de, o Sion fam suma re yabuk wutuk ai hag wireheg, ne o Yerusalem fam mun meiyag-langgukdoho aheg, ne duk TUHAN obam wirigmu suma re e ohwei aruhu.