Read Ninia Yali MIKHA 4 Bible Online

MIKHA 4 - Ninia Yali bible

MIKHA 4

¹O fobik welamuhuk li em etma re duk amu on mun sebeleg kweleg de TUHAN Obam wirigmu ai neg de mun bekit yit-yaron unduhuk laruhu. Airoho unduhukmu re ap homi ununggul unuk domog de uluk-uluk etma waharuk kamuhup.

²Airoho watlug iren uruk kwi de, “Nit de ap homi Israel on enakni TUHAN Allah Obam Anduk[2] wirigmu lahaul. Lahaulmu re At ebe o Sion kota Yerusalem fam wereg lit, ele At omaliki hweag-neseheg, komo nenebeheg, duruk karuhu ai fam de, Aren nit wene duruk kamuhuk ale mamul-nesahumu, higitdoho duruk kamuhuk en de lahaukohon,” ulug uruk kamuhup.

³ Aren airoho hweag-esauk kwit de ap homi enunggul unuk domog, enawene unggum katukdoho balduk kwit, ununggul unuk enomamne wereg on, enobam yatma on mel horogma on mel unggum enobam wereg bilinggoho elehap duruk karuhu. Airoho durukmu re karog weim yapuk on fahet de yabuk wutuk on fam en hilinggeheg, inggisim bosiemanggen on fam en de enggelangge balduk on hilinggeheg, duruk kamuhup. Airoho duruk kwit de, ap homi enunggul unuk domog de weim kahaldil lalug weim yabeheg, ne yapul ulug fik-fouk deheg, duruk kamuhup fug.

⁴ Ap homi enebe domog de it enangge anggur yabukmu nim, enahan ara indipmu mel fano liolegma welamuhup. Airoho wereg ma re ap homi eke enakolap enepul ulug duruk kamuhup fug, ulug TUHAN At Mun Omamne wereg on en wene sali watsi ai.

⁵Ap homi enunggul unuk domog o kwenangma wereg on en de enanggembu dewa etmano fam dipdeg lit apne wauk, famen nit neg de nenakni TUHAN Allah obam dipdeg wereg lit, li mundoho-mundoho etma fam At neg apne wauk kamuhuk.

⁶TUHAN en uruk kwit, “Ap homi An den unggum enobam feserihik mu sabu het-eneplug lausa ma di anggun su anggin hauk on etma fobik An den andogdoho feseik waruhuk li wereg.

⁷It ap homi etma re eneyog sahareg on hagdoho debeselug it enobam indipmu en de yatma og-eneplug feseik lauihik on etma re o yatma welamag ulug monde feserihik, famen de it ando enoluk wereg on etma re An den unggul unuk kerapdoho fesehukmu re, enunggul unuk humon aheg, enomamne humon aheg duhup. Airoho debeselug de An nebe TUHAN at wereg lit de Duk Sion fam etma melal-enepuk kwit mundoho-mundoho welaruhuk,” ulug ebag.

⁸Hit ap homi Yerusalem on su. Wam domba hwalduk kwit wereg ai hag Allah en omaliki o suma wereg on hwal-enepuk wereg ma suma, o kota suma re endam unuk leho on welatsi ai hag airoho debehuk.

⁹Hit henele hum fam oba yatuk kahep etma re nunggwelug. Homi enomalik endag-enepuk kwit nenek duruk hag, di anggin su anggen hauk kahep aire nunggwelug. Aire hit henowe raja eleg en a? Ite it ap wene komo hweag-hesauk on etmano re mundoho waratswa ma a?

¹⁰Hit henebe henobam kota lin-esalug o leimu lalug welamuhup anggere, homi enomalik endag-enepuk kwit enebe nenek duruk hag nenek duruk kamek. Hit de henebe o Babel lahup. Famen de etman de henakni TUHAN en de it henaselei on enenggikmu en fiselaroho wilibi henobahaku.

¹¹Hit ap homi Yerusalem on su. Ap homi enunggul unuk domog en de hit Yerusalem on henowatul ulug enebe lohwalehesareg wereg. Airoho lohwalswareg iren weim abog uruk kwit de, “Ap homi o Yerusalem on aire mun al bereloho eleho fesehuk. O kota aire meiyaloho embeselug de nenenda nenahayeg atlug ninil wereg lit kwelaboho lamuhuk,” ulug uruk.

¹²Airoho uruk famen de nenakni TUHAN en it fam debesehu ale fahet wene mundoho ebetsireg de enebe re gandum anggen loldul ulug baloho kabog-duruk anyo hag, unggum enobam fesehuk en ulug fouk debesi famen de it furebouk fug angge wereg lit uruk ai.

¹³TUHAN en uruk kwit de, “Hit ap homi o Yerusalem welahep on su. It heneselei on heneyog en al bereloho fesehup en de lakiek. An den de wam sapi andimuk besi on fam mel, eyog ahap tembaga on fam mel wirig on hag henobahakuk. Ne, hiren de ap homi enunggul unuk domog enebe humdoho al sahaloho enowareheg, enangge di on su on onggo hum angge on huhul hwelausa on etma hit hwelalug de An henakni TUHAN di angge su angge duk ale neg deg lahi on anyo nobahet fohup,” ulug hweag-esebag.

¹⁴Airoho ebag ma an den de, ‘Yaho hit ap homi Yerusalem welahep on. Nenakni TUHAN en let-nesowag ulug henele henelaheg fam hweag-emek. Nit neneselei on en de nit ap homi Israel on nenowesi enowarukoho duruk kwit, o mundoho waling nenebehesa,’ ulug irihik, ebag.