Read Ninia Yali MIKHA 5 Bible Online

MIKHA 5 - Ninia Yali bible

MIKHA 5

¹TUHAN en uruk kwit de, “Hit ap homi Betlehem Efrata on su, o Yehuda fam suma o di kota su kota humon wereg kweleg, hit henobam kota Betlehem suma neg de mun dotdeg famen de, An den ap henombasi enunggul unuk atam welatswa ai on, ap homi Israel on melal-enepuk kamag ulug unduhuk fohuk,” ulug ebag.

² TUHAN en fobik airoho enebuhuk ulug, ketia we elamna dia it neneselei on en melal-enepuk kamag ulug nenobahasimu welamuhuk ai. Airoho melal-enepuk wereg kweleg at raja ai isinga en enderuhu ulug Allah en bebag ale higitdoho endag-atuk halug, ap homi at unggul unuk on sabu hetdoho og-eneplug lausa on etma re fobik it enunggul unuk Israel inim seberik wamuhup.

³Ap enowe along wereg on ai lahe fobik mundoho waharuk halug de Aren nenakni TUHAN Allah anyo omamne fam At omaliki melal-enepuk kwit welaruhu. Airoho melal-enepuk kwit wereg ma ap homi di o su on wereg on en de, At mundoho omamne humon wereg ulug yande fouk duruk kamuhupmu re Aren omaliki mun fano lombukdeg wereg ma melal-enepuk kwit welaruhu.

⁴Ne aren de ap homi fanoroho lioleg welamag ulug debesehu. Ap tentara Asyur on en nenowarik kwik watlug, o alongbaloho ulug fak oho on etmano dahandoho kwik wahail laukem, nit nenowesi enomamne on it enowarukwag ulug higitdoho lohwale fesehuk. Airoho lohwale fesehukmu re, iren en de nit nenebe ap Asyur on enenggikmu en del-neneplug de enesehen, inggisim fam de ap Asyur on enobam etma sebele fesehup.

⁶ TUHAN en de di angge su angge yaho on fam lil feheg, osit belabik waheg, durukmu fano atuk ai hag, ap homi enunggul unuk domog etma enanggeleg kwe wereg lit, ap homi on enobam hembisig welam fug angge Allah obam hembisig wereg ma, Allah en ap homi etma fanoap debesehu.

⁷Ap homi Israel on foma enoluk wereg on etma, ap homi enunggul unuk domog enesahali kwe etma wereg on de singa en enggelaman de bak wareheg, ne olman de domba wareheg, duruk ai hag uruk kamuhup. At singa en de wam domba omano eyog en sobit-sabat esalug de, aeg en libil-labaldoho nenggeg, durukmu ap homi en ambilikmu angge deluk fug ale atuk ai hag deg lamuhup.

⁸Fobik it Israel on en de it enaselei on enalong elehap debeselug de enebe mundoho elehap debesehup.

⁹TUHAN en uruk kwit, “Ai salim de An den henowam kuda mundoho elehap debelug de kereta emberim fam lahalug weim yabik lauk angge ai eleho feheg, duhuk.

¹⁰Airoho elehap deberuk kwit de henobam kota di kwe su kwe wirig on etma mun moluluk-malalak debeseheg, henaselei on kwik wam no ulug fag wirig on etma meiyaloho embeseheg, duhuk.

¹¹It hwal-enap en enanggembu fam amu ale duruk on etma eleho feheg, it hein og-angge en diroho aruhu ulug uruk on etma enebe hit henanggelegman wilibi feseheg, duhuk.

¹²An den fobik de ap homi kembu mel, ahut-ahut ilit debelug mot-duruk on etma mel, elehap debehuk. Airoho elehap debehukmu re, hiren henenggik fam ahauwag hwale folug mot-duruk kahep on aire mot-duruk kamuhup fug.

¹³Hiren henanggembu isinga Dewi Asyera ulug mot-duruk kahep on ai meiyaloho embeseheg, henobam kota mundoho fak lehet omamneroho wirig on etma molulukdoho embeseheg, duhuk.

¹⁴An nahummu ahe lahalug het-bet isimu re ap homi enunggul unuk domog en An nele holoho duk fug angge siag neg duruk on etma re mun elehap debesehuk,” ulug ebag.