Read Ninia Yali MIKHA 6 Bible Online

MIKHA 6 - Ninia Yali bible

MIKHA 6

¹Hit ap homi Israel on suma, henakni TUHAN en wene henobam dopno henesauk ai anggere henesanggo holiyug. TUHAN nakni, ap homi Israel on en mun kwasikdoho neg duruk ai en Haren enobam dopno esamin ulug duruk kahen on ai din. Airoho debeserukmu re dom doron et lohon on et hele enesanggo holukwag.

²Hit dom nim kwenang hulia wareg on mel, TUHAN en wene dopno esauk kwit de, “Hit kwasikdoho neg duruk kahep,” ulug unggum enobam feikoho duruk ai en de henesanggo holiek. Allah en de it omaliki Israel on enobam unggum femin ulug duruk ai.

³TUHAN en airoho enobam foruk kwit, diroho uruk, “Nomaliki e, An den de hit henobam nangginoho henobaharihik men e? An den de wene indip ke fam siahap henepihik no? Wene onggo hweag-nemek!

⁴ An den de hit henombasi ap homi Mesir on en enamingming angge hag enusug lit wereg ma, del-enepihikdeg, Musa nim, Harun nim Miryam nim en og-heneplug wamag ulug enayonggo feserihik.

⁵ Nomaliki e. Hun raja Moab on en henombasi siahap enepmin ulug disimen de hun Peor amloho Bileam anyo en onggo hweag-itsi ale etano mel wenggeleg lamuk. Ne, o Sitim etma o sabo sum fam saloho welatswareg en o Gilgal etma wamul ulug bul etma waharuk kwit atfag ale etma henenda ebereg neg welamuk. Ne, airoho ebereg welamuhup halug de An den del-henebuhuk ulug duruk kahi ale ai furebehup,” ulug ebag.

⁶Niren nenelenggen dimirebelug nenakni TUHAN Allah boholma on anyo obahet dul ulug de nunggwangge on og-irik wahe halereg? Niren At obahet endama ahayeg howag ulug wam waroho yal-utuk kwit de wam sapi ket sauwe on waroho yal-erehe ha alereg a?

⁷Niren wam domba hum-hamdoho deng-dengon mel, zaitun ahalue hum-hamdoho mel, At obahet walug feik wahe ha man de At enda ahayeg ha alereg a? Nit siag duruk kahe on etma elehapdoho embesoukwag ulug, nit nenomaliki wandeba on waroho Allah obahet folug og-erehe ha alereg a?

⁸Eleg! Nenakni TUHAN en nit fano ale duruk kamag ulug enamoho hweag-nesasi on de, Ap homi amu on fam katukdoho neg debeseheg, ne enenda hundig duruk on ai indip omamnerebeheg, nenenda sebe ulug Allah nim hundig welaheg, duruk kamuhuk ai neg.

⁹TUHAN fam along bolug nenakol boruk ale aire ap mun wenggeleg neg duruk on duruk ale. Ne, Aren ap homi o kota fam wereg on hweag-esauk kwit, “Yaho hit ap homi o kota fam kabogdeg welahep on etma henesanggo holiek!

¹⁰Ap enolok enap enobam etma re enangge di angge su angge enele en seiale lal heheg, hwelauk on wereg. Iren de di angge su angge anggin ilit hauk kwit de ilit duruk angge ebe on wereg kweleg hwenaroho on fam, enobabut mundoho An nerim boruk kahi ale on fam duruk. Ne, ap airoho duruk on de An den unggum enobam fohuk.

¹¹Ap ilit angge hwenaroho on fam wal-duruk kweleg An den fano duruk ulug nape wong-debehi ha alereg a? Mun eleg.

¹²Ap o hit henobam kota etma fam en it enenggik wereg enap en de ap enenggik eleg on etmano sebe esauk. Ne, airoho durukmu re hit henebe abirangge mundoho henele seiale on welahep.

¹³Ma re, hiren henesiag duruk kahep on ai fam de An den hit henebe yeik henowaroho luluhun hesaroho lahi.

¹⁴Hit de henesiburu nauk kamuhup famen de henobam homo am fug angge siburu obok neg deg lamuhup. Ne, hiren henangge di on su on hwelalug waharuk kamuhup famen de balohoma il baloho foruk kamuhup fug. Hiren di on su on il baloho ulug duruk kamuhup famen de An den weim fam mun luluhun-lalahan esauk karuhuk.

¹⁵Hiren henangge gandum a folduk kamuhup famen de anggen bal-dauk kamuhup fug. Ne, henahan zaitun fam en ahalue hwenangguruk kamuhup famen de ahalue etma hiren eke nauk kamuhup fug. Hiren henahan anggur anggen ahaik berelduk kamuhup famen de ahaik ebe hit eke nauk kamuhup fug.

¹⁶ Abirangge airoho hauk neg kamuhup ale aire hiren hun Raja Omri mel, ne at amloho Raja Ahab mel en enobabut mun siag ale duruk katswa on etmano ilitdoho neg duruk kahep ai fam. Ne, eke iren duruk ale etmano hiren oho duruk kahep. Ai fam de An den hit henebe mundoho siahap henobahakukmu re, ap homi di enunggul unuk su enunggul unuk en oho bulip henepuk kwit maben deg henombaharuk kamuhup,” ulug hweag-esebag.