Read Ninia Yali MIKHA 7 Bible Online

MIKHA 7 - Ninia Yali bible

MIKHA 7

¹An den ap en e anggen yihiruk li mundoho eleg atuk mu anggen dahanik lauk on hag deg lit de alemat atuk kahi. E fam anggen yihig eke wereg fug. E anggur anggen mel, zaitun anggen mel mun fano on etmano mundoho dahan dausa.

²Ap homi enobabut mun bekitdoho neg duruk on de o kwenang suma famen mundoho eleg atswa. Ne, ap Allah fam dipdoho neg duruk on de eke wereg ma esauk kahi fug. Ap homi enebe domog en de it eke on enowatul ulug neg nangno esauk kwit wereg. Ne, airoho duruk kwit te it enebe domog en de it enori eke on yohwat amag ulug yep-enepuk.

³It enebe abirangge en de siag duruk ale fahet de mundoho hebel-febel deg. It ap yain-kain yabuk leho on wereg enap en mel, ne it hakim wene kong-duruk enap en mel ohore wene wut dukoho onggo og-nesakiek ulug heng-enepuk. Ne, it ap enowesi wereg enap en ohore it enenda boruk aleroho neg dukwag ulug mingming enepuk. Airoho neg duruk kwit it enebe seberoho en dil lauk ai.

⁴It fam en mun fano on hag mel ne bekitdoho duruk on hag mel famen ohore e alog angge mun siag on etma hag neg deg. Airoho durukmu At Allah en amingming angge nabi fene en ap homi enolugapdoho ulug hweag-esauk katswa on etmano higitdoho Allah en At omaliki enobam unggum foruk ale mundoho li horog aik waha. Ne, ketia re it enebe enesahali kwe mundoho nong-hong eheik.

⁵Hit de henori o sokole nikama wereg on uruk ale fahet demdoho bouk fug. Ne, henori fam henebe hembisig lit welam fug. Hit henele urukmu holeg on aire hat honggwareg hohwe deg kweleg famen henda wenggel-halug hele iyug.

⁶ O ketia eiya hag deg li re it misig on ahain elekwe on famen ohore il deg lit wereg. Airoho wereg lit de amloho en akni sebeleg hag deberuk men, ne ahaloho en isinga ele sahale folug duruk men, eyamal hwe en eyamal hwe nim yeik yapuk men duruk li deg ma anggere.

⁷Aireg famen de nit de nenakni TUHAN fam nenenda ebereg welahe. Airoho wereg lit de nenanda dik-demdoho bolug nenakni Allah nangno hauk kahe. Ne, Aren de nit nenele hole folug nit nenahap wendat-nenebuhu.

⁸Nit ketia mundoho yinggig welahe famen de nit nikangge inamuhuk. Ketiare nit o mum apma welahe famen de nenakni TUHAN en nit selehap nenebuhu. Mu re it nit neneselei on en nit deg lahe ale kumu nesalug enahayeg bouk ale eke wereg fug.

⁹Niren de TUHAN fam mundoho siag duruhuk anggere, ketia nit duruhuk onggo At olok nenobam foruk ale hauk kahe. Famen de we o il misig welatlug Aren nit ninibil atlug ninili weheg, nit nenobahet katukdoho deheg, Aren nit nenebe o seleg fam og-neneplug wilibik waheg, duhu. Mu re Aren nit nenahap wendat-nenebuhu ale aire nit nenemu domog en hahuk lit deg.

¹⁰Endam de it neneselei on en nit bulip nenepuk kwit de diroho uruk katswa, “Hit henakni TUHAN Allah aire ebe kema wereg?” Uruk katswa. Famen ketiare nit nenakni TUHAN en nit nenobahet nenepuk ale etma nenesalug de it enenggali amuhup. Ne, it neneselei on etma sabelep kobokwema wereg ma sobutuk hagdoho nit neneselei on etma airoho sobit esaukmu ninil-esahuk.

¹¹Yaho hit ap homi Yerusalem on! Ketiare hit henobam kota en fak lehet oho on anyo nikangge obale kwe wurukwag ulug aik waharuk. Ne, nukoho ai salim de o hit welamuhup kwe wilayah re mundoho heal aruhu.

¹²Ap homi hiron etmano re, o mo indip fil Asyur etman mel, il apma fil Mesir etman mel, Ik Efrat ikma kwe etman mel, ik laut foma fil wereg on mel, dom-dom kwe yatma wereg on mel etma hit henekit aik wamuhup.

¹³Famen de kwenang de ap homi en kwasikdoho neg duruk fam de unggul owag neg aruhu.

¹⁴TUHAN nakni. Hat homaliki Haren momal-enepihin on omano re, enebe enggela somun kwe dag-dag kwenang mun hesilig on fene etma wereg ma re Haren hwal-enepuk kamin. Nakni ite o atam welatswa hagdoho enangge nauk angge o Basan enggela wilibigmu en mel o Gilead en mel hwelalug nauk kamag.

¹⁵TUHAN nakni. Haren atam nit o Mesir en og-neneplug wilibik waharuk kwit along on duruk katihin hagdoho ketia nim along on duruk kamin.

¹⁶Airoho durukmu re ap homi enunggul unuk amu on etmano en inil healug de, it fam enomamne wereg boruk on etma re duk fug alereg ulug furebelug enenggali aheg, dukwag. Ne, it enebe wenggelduk on mundoho longgo il lauk em de enele uk fug angge ne enesanggo mel holuk fug angge welamag.

¹⁷Airoho deg lit de it enebe kisu hag atlug kwenang kwe bol duruk kamuhup. Ne, it enebe enakol en enowag elek duruk kwit de it enebe enalong baloho wereg ma etmano en wilibik watlug, nenakni TUHAN Allah Hat hakit waharuk kamuhup, nakni.

¹⁸Nenakni Allah. Homaliki momal-enepihin on enebe ando wereg en siag duruk on elehapdoho feseruk kahen on Allah we Hat hamu neg welahen. Amu on eke wereg fug. Hat hahummu holok atlug de hendama ebetuk kwit neg welahen fug. We Hat hambonoreg lahen alere henda hundig nenesug lit wereg ale ai neg, nenakni.

¹⁹Nenakni, fobik en oho nit henda hundig nenebeheg, nenesiag hapelehapdoho nenobahakeg, nenepuk karuhun. Airoho nenepuk kwit de niren nenesiag duruk kahe on etma re Haren heyog en sobit-sabat esalug de ik laut yenggeleg on il apma erahamu hwik-esa wambuhun.

²⁰Homaliki Abraham mel Yakub mel en ondohoma on etma, nenombasi atam welatfag li em honggwareg en hunuk hombuk baloho sali wat-esauihin ai hag, Hat hebe it enobam dipdoho neg wereg lit henda hundig nenusug lit neg welaruhun ai, nakni.