Read Ninia Yali NAHUM 1 Bible Online

NAHUM 1 - Ninia Yali bible

NAHUM 1

¹ Allah en de ap homi Niniwe on fam wene diroho hweag-esakiyug ulug de Nabi Nahum obam indip Elkos on anyo fam a hauk hag fam enamoho hweag-etfag on de su.

²TUHAN Allah re ap homi en At inim ilit duruk ale erim deg, Ne, ap At inim wal hauk on de unggum hwelahup. Aren de olok mun hape on fam, it enobam olokap debeseruk.

³Demdoho TUHAN en folo-folo olok duruk fug; famen de At ebe along wereg on deg ma re, ap homi eke en siag duruk halug de Aren unggum enobam feseruk on eke lil am fug alereg. At TUHAN ebe lauk kwe etmano re, hol sielu enamoho wilipuk, ne At eyog sobit haukmu etma re ul ahe hena hag laharuk.

⁴Aren de ik laut elehap habuhuk ulug dulug de mun firitog deberuk, di ahaik su ahaik wirig atuk on etmano Aren mundoho elehap deberuk. Dom Karmel nim o Basan fam en lei-lei omano re mundoho lei birim uruk. Ne o Libanon fam owil angge wilibig on de mundoho sawet atuk.

⁵At alukweman de dom-dom mundoho elek duruk; ne duk-duk de mundoho nunum duruk. At TUHAN enam aik waharuk li em de, kwenang mundoho elek duruk, ne airoho durukmu re kwenangma wereg angge mel ap homi mel oho mundoho enowag elek duruk.

⁶Airoho duruk kwit At TUHAN en olok enobam foruk halug de ap sa hag angge en hambuk ha alereg? Ap homi re At olok apma en lil atlug la fug alereg. At olok mun hapereberuk on anyo ap homi enobam foruk li em de, helep de mundoho luluhun-lalahandoho At olohotman ul neg atuk.

⁷TUHAN aire mun fano on deg lit de, At omaliki enobam anggindoho deg ma along bal-enepuk. Ap homi At fam enalong baleg wereg on de Aren hwal-enepuk kwit wereg.

⁸Airoho wereg lit de At aselei on[1] etmano re, ik fu humon waharuk kwit di angge su angge mundoho elehap deberuk hagdoho mun luluhun esauk. It eke enambong seroho At ele sahale folug duruk on de, Aren de waratuk on fam mun binggi sike enowatuk mu waratuk.

⁹Haren TUHAN inim seleireg ale diroho duhuk ulug uruk kahen on etma re, ambiangma higitdoho aik lahu fug. At TUHAN en de ap homi At aselei on[2] fam, At ahummu enobam het foruk ale etma birenamdoho enobam fesehu[3] fug.

¹⁰Hat de enggelangge iringgig on mel, alog-alog angge sep hun-hun deg on[4] indok yalduk hag han yal-habuhu.

¹¹Hat Niniwe su, hat fam en neg de ap misig eke endaman mun siag ale duhuk ulug wenggelduk on enam atsi. Airoho enam atsireg de aren TUHAN ele sahaleg ale neg duruk.

¹²Airoho duruk ai fam de At TUHAN en omaliki Israel on fam uruk kwit de, “Yaho, hit ap homi An nunggul unuk on, An den de hit henobam anggin-fanggin henobaharihik famen de An den airoho eke duhuk fug. Ne, it ap homi Asyur on aire enebe hum-ham deg lit enomamne mel humdeg famen de it de mundoho luluhundoho eleg amuhup.

¹³Ne, ketia re it Asyur on ai hit henobahet enalong on wereg ale ai mundoho eleho fohuk, ne sabu bosiemanggen on en hit henobam het-henusug wereg on aire An den mundoho kong-debesehuk,” ulug hweag-esebag.

¹⁴Ne, At TUHAN en it ap homi Asyur on fam debesehuk ulug ebag ale re su, “It de ap homi it enunggul unuk on humdoho welamag ulug endag-enepuk on fahet iren ondohoma on eke welamuhup fug. Ne, it enoban kembu dewa apne wauk kwe ahut ilitdeg wereg on etma An den mundoho luluhun esahuk. It ap homi Asyur on aire enoluk ekenim wereg lam fug alereg en de, ap homi enunggul unuk Asyur on sal-enebuhukmu fahet obale fouk deberuk kahi!” Ulug hweag-esebag.

¹⁵ Fu hakiek, ap yonggo angge misig eke o dom kwe en waharuk kwit wene husumbi fano on, husumbi hit henalong amuhup ale fahet walug waharuk ai. Yaho, hit ap homi Yehuda on, hiren de nukoho leho on ai fahet ebetuk wereg lit de, hiren henakni Allah fam diroho duhuk ulug uruhup on etma fahet onggo foruk kamek. Ap enolok on de mundoho elehap ahesa anggere hit henobam henanggwenang fam etma ap homi en enomamne fam sebel-henusug lit neg welamuhup fug.