Read Ninia Yali NAHUM 2 Bible Online

NAHUM 2 - Ninia Yali bible

NAHUM 2

¹Yaho hit Niniwe henap henesanggo holiek! Hit siahap henebukoho on de mundoho aik wahesa! Hiren henalehet henalong baleg on ulug oho lahep on etma furoho kahaleg lamek! Kwema hinil kahaleg lit de weim yabuhup en fik-fouk debelug welamek. (

²Dik demdoho anggere At TUHAN en ap homi Israel on enalong wereg latswa ale anyoroho it enebe atam it eneselei on en sen-enebuk fug deg latswa aleroho deg lamag ulug hwaloho fesehu.)

³Hit heneselei on enandog bei anggere il mep deg, ne it enesum il misig on wan deg on de mep deg. Airoho deg lit de it heneselei on en enebe elehap enebik kul ulug, mundoho fik-fouk deg wereg. It enangge kereta bosie on etma re indok ambulbul hagdoho amulit dereng uruk. Ne, it enangge kuda [5] re hweik-solog duruk.

⁴Kobokwe fene re kereta si-seroho waharuk, kwenang healeg kwe re it enebe sik-mug angge duruk. Airoho durukmu re it enebe re indok ambulbul ulog duruk on hag laheg, oweal lepengdoho lauk hag mun oweal lepengdoho laheg, duruk.

⁵Ap sehen foroho enap etmano weim yabik manik ulug wol-enepukmu waharuk li em nim, iren ap enowatul ulug[6] kwik lauk li em nim de it eneyog dungdoho ying-atuk. Ite enebe hwaleg eleg angge o kota fak lehet ohoma etmano aik lalug de, iren o bin falik kuruk angge anyo folo-folo enenggik omamneroho domag esakoho fouk deberuk.

⁶Ik wirig atuk on kwik waharuk kwe mundoho hwaloho-hwaloho neg husi forukmu re, ap homi it enebe raja obam bumbuk fam wereg on etmano youk lalug enakol duruk!

⁷Airoho kwik lalug hwe enesinga Ratu anyo seneruhupmu, it hwelani at onggwareg fahet hwalduk wereg on etmano re nenek duruk kwit oba yatuk kamuhup. Iren de enenda hesilduk en de enenda bou-dauk kwit, suwe muluk nginog duruk hagdoho duruk kamuhup.

⁸Ap homi Niniwe on de ik helahe[7] dahan durukmu selelangdoho wilibik waharuk on hag, it enebe del-fol uhup. Airoho atuk mu ap en enele uruk kwit de, “Bok, Bok!” uruk, famen de it eke en sombandoho waharuk kamuhup fug.

⁹O kota ai fam en enengge di angge su angge wereg alere mun dindikdoho deg angge re, enengge etma emas mel perak mel mundoho huhul hwelakiyug!

¹⁰Niniwe re mundoho erapdoho eleg feleg eheikma re ap homi mel di angge su angge mundoho ele eleg neg deg lit unggul ahap neg deg. It enakol en enenda mun seram aha. Enowag mundoho kororong eheik deg enowag elek duruk. Ap homi mundoho enorohole re mun hesingnoroho deg.

¹¹O kota anyo re ketia ebe kema wereg? O kota no singa a wiroho owik elma nohorukmu hag deg ma anyo re kema wereg? Singa omalik nauk on og-esaukmu, ne singa hwe on mel yohombuk on mel enebe misig aik laukmu, ne etma re singa omalik en oho re enakol elegdoho wereg ma anyo re?

¹²Endam de o etman singa en senggelduk on senggel-dauk katsi, airoho senggele folug de bokum heg de singa hwe on mel omalik mel fahet foruk katsi mu. Aren de ena wirigmu etmano, senggelduk angge etmano ino bokum deg en hoporeberuk katsi.

¹³At TUHAN Mun Omamne humon wereg on anyo en uruk kwit, “An de hit heneselei on. An den de hit henangge kereta etma mundoho han yaleheg, ne hit henautsi sehen seneg on weim famen enowareheg, ne An den de hiren di angge su angge ap homi amu on famen hwelauhup angge etman mundoho weheg, duhuk. Ne, it ap hiren yonggo angge mon-enepuk kwit diroho heng ik lakiek ulug uruk kahep on etma eke holduk kamuhup fug,” ulug hweag-esebag.