Read Ninia Yali NAHUM 3 Bible Online

NAHUM 3 - Ninia Yali bible

NAHUM 3

¹O kota ap homi enowareheg, enele seiale neg eheg, ne ap homi en enengge huhul hwelauk on en neg hoporoho fahat dalug laheg deg ma aure mundoho.

²Ap homi yeik henowarukoho fetnangge aplohok fuk hauk on mel, eyog masereg birim duruk kwit aplohok kilit-samog il waharuk angge mel henesanggo hol hakiek. kuda buroho lauk kwit eyog aplohok nim ne kereta lauk kwit mil-mil lauk ale nim hol hakiek.

³It ap kuda fam lahalug weim yabik kuruk on de mun enahayegdoho lauk, It enenggarog de ombagbag duruk, ne enanggisim de helag-felag angge duruk. Airoho deg lit enowarik kurukmu re ap homi enowatuk on de wenahauk fug alereg, Ap homi wareg de balu-kabog laharukmu re ap wareg anyo fam dungdoho ying-atuk.

⁴Niniwe hambena neg duruk on anyo re unggum obam feheik ai. At orohole re mundoho il aluli buhundeg ma re ap homi enenda lisuruk. Airoho deg lit de aren ap enunggul unuk humdoho yohwat-enebeheg, ele buhun en enenda weheg[8] disi.

⁵TUHAN Mundoho Omamne wereg on anyo en uruk kwit de, “Hat Niniwe on su, An den hat mundoho anggin-fanggin hobam fohuk! An den ap homi di enunggul unuk su enunggul unuk inil hanim hasum hahap hwililip deg lahen on ai nonggol heahukmu re, ap en hat henggalimu angge inil hahup.

⁶Hat hebe re an den di angge su angge mundoho mun me nape angge hagdoho hobahakuk deg, siag angge mel hat hebe hwik heahuk. Airoho hobahalug de ap homi en yande hapuk kamag ulug hobahakuk,

⁷airoho debehukmu re ap homi hat inil heahup on en de ahayeroho lauk kwit de diroho uruk kamuhup, ‘Niniwe anyo re o meiyaleg neg kabog laharuk! Ap san at nim fong waruk alereg? Ap en eke at enda onggonoho ulug duk fug alereg,’ uruk kamuhup,” ulug ebag.

⁸Hit Niniwe on su, hiren de o Tebe it Mesir on enobam indip ibukota aire maben deg kweleg nit neg leho welahe ulug uruk kahep a? O Tebe ai ohore ik aegma wereg ma re ik aire it enalong baloho ulug fak lehet hagdoho wereg ai. Demdoho anggere Ik Nil aire it enenda hambuk angge wereg.

⁹It Tebe enap en de o Sudan mel, Mesir mel, sebel enusug wereg ma re it enalong wereg alere huli-huli wereg fug; Ne, it Libia enap mel Put enap mel de inim misig sebe ulug di ale su ale duruk on wereg.

¹⁰Airoho duruk famen de ap homi o Tebe wereg on de sabu het-eneplug hwik-enebik laukmu feseik lausa. Kwe elan kwe etmano en de it enomaliki abirangge yeik waroho binggi enowatswa. It enowesi kaindeg de sabu bosiemanggen on fam het eneplug de ap it sabu het enepuk on etmano enebe domog fam yohwan-esauk.

¹¹Hat Niniwe on su. Hat ohore hebe siomo duhundeg hape moruhun. Ne, hat ohore it haselei on famen lil atlug wilipmin ulug duhun.

¹²Haren fak lehet og-dalug lahen on etma re e ara anggen yiko mundoho wirik atuk on hag deg ma, e anggen yihig on anyo elel haukmu re ap anggen dahan daul ulug lauk on anyo enelma wambik waharuk karuhu.

¹³Hat hautsi sehen seneg on de homi enomamne eleg deg hagdoho deg, ne hat hanggwenang fam etman de weleroho it heneselei on kahal-enebehep fug ha alereg. Indok en de hit henobam sokole kwik laukmu e nunggulig yinggig on etma mundoho nasi.

¹⁴Airoho deg anggere hit henebe huk henebik wamuhup li em etma fahet ik hwenanggoho fahat dakiek. Ne, henobam en o owag lahabeg on etma omamne debeheg, ne heneyog en de sabelep sobitil lalug de kwenang on ayuhuk habunaroho wiri feiyug.

¹⁵Hiren airoho duhup famen de hit de henebe han nenggeg, weim famen waraheg, duhup anggere di ale su ale duhup on etma re we alemaroho neg duhup. Ne, hat hebe re di angge su angge yaho on bulue en mundoho nauk anyo hagdoho eleg aruhun. Ne, hat hebere bulue saha uruk hag saha irihin!

¹⁶Ap homi hiron di angge su angge onggo balduk on enebe deg ale re sohwalanggen bohol fam wereg on de maben hag famen de it neg de alongdoho deg. Famen de ketiare it enebe no bulue en ahwerabul wiriloho darulug longgo ik lauk hag it airoho amuhup.

¹⁷Ne, it henowesi kaindeg mel ap enunuk wereg on mel de bulue hol en fak lehet oho on fene herag atuk famen de mo yarik waharuk halug de it enebe daroho longgo il lauk em de, ap en oho dima lahesa ulug fureberuk fug ai hagdoho duruk.

¹⁸Hat raja Asyur on su! hat hautsi gubernur wereg on de mundoho waratswa, ne hautsi bupati re li mundoho-mundoho fahet nohweik lausa. Hat homaliki ap homi holduk on de dom kwe etma linggik-longgoreg ma re ap misig en oho eke og-eneplug sombandoho wam fug alereg.

¹⁹Ne, hat hebe fam yeik waroho welahen on etma re obat fouk fug alereg, ne yebil angge wereg on etma re hiling am fug alereg. Hat hebe fam airoho deg ma re hat deg lahen ale ap homi en hol halug de enahayeg en enenggik dag duruk. Ai indip de mun siag ale bale fouk fug angge ap homi enobam debeserukmu anggin-fanggin hauk katswa ai fam duruk.