Read Ninia Yali HABAKUK 1 Bible Online

HABAKUK 1 - Ninia Yali bible

HABAKUK 1

¹Nabi Habakuk anyo fam TUHAN en diroho hweag-esakin ulug enamoho hweag-etfag on anyo su.

²TUHAN, yehei nakni! Nunggwenam haren nit let nenebukwag ulug hwi duruk kwit neg welatmin? Ap homi en anggin fanggin nenobam foruk on au fahet de ke salim nenele hole folug ninili og-nenebuhun?

³Di kwe su kwe ap homi en yeik haroho enobam bug uruk kwit, yeik yabeheg, minggit-manggat aheg, kwasikdoho deheg, enelok fam enomamne doho deheg, duruk kweleg de, etma fano duruk ulug kumu unusug lit welam ale hapuk a? Ap homi enobabut siagdoho neg dil waharuk kweleg at airoho hauk kamag ulug boruk kahen ai nunggwe ulug abi?

⁴Airoho duruk kweleg welahen ai fam de siag neg duruk kwit wene melaleg sahaloho mabene feseheg, bekitdoho duruk on fahet omamne debouk fug angge welaheg, ap homi dipdoho neg duruk on mabene feseruk kwit, it siag duruk on neg omamne aheg, duruk fam de bekitdoho duruk wene anyo iren aham-fahamdoho siahap deberuk. Ap homi dipdoho neg duruk on it siag duruk on en sebele feseheg, wene katukdoho balduk on en bekitdoho duk fug angge durukmu, wene melaleg wereg on anyo omamne eleg aik lauk. Ulug hein og-hebag.

⁵ Airoho heng og-hebag ma At TUHAN en At omaliki on fam hweag-esauk kwit, “Ap homi di ununggul unuk su ununggul unuk hit welahep kwe en maseroho wereg on etma hinil esakiyug. We dindildukmu oho hiren demdoho behep ha fug on eke, horog ketia hit welahep li eiya duhukmu hahupdeg, henenda hemeg ulug yeheyu uhup.

⁶ Fu debeiyug, An den ap homi ununggul unuk Babilonia on mun namel-mel deg lit folo-folo lauk on ai it enomamne fam sebel-inusug lamag ulug debesehukmu iren enebe eratlug wilibik waharuk kwit o kwenangma di o su o di ap homi su ap homi mundoho enalong elehapdoho fesehup.

⁷Airoho dil lauk kwit, di kwe su kwe laukmu ap homi amu on en it Babilonia on fam enekol enepuk kwit enowag elek duruk kamuhup. Iren wene melaleg wereg on anyo sebeloho folug, enawonog fam de it enenda boruk ale neg duruk kamuhup.

⁸It eneg kuda emberimmu lahalug dog yabik lauk angge aire fulung waroho lauk karuhu, ne olok de olomene nauk angge obok en duruk hag deg fug at de olok leye deg laruhu. Ne, it dog yapuk enap enebe kuda fam lahalug o yatma en dog yapil waharuk kwit, suwe ikwesahop en at nauk angge senggelikoho sebelik waharuk hagdoho waharuk kamuhup.

⁹It enautsi sehen foroho on enomamne hasimeg waharuk kwit, ap homi mundoho enalong elehapdoho feserukmu ap homi it waharuk on[1] fahet enakoldoho kumu esauk kamuhup. Airoho waharuk kwit ap homi enalong elehapdoho feselug hetdoho feleleng eneplug lauk kamuhup on etma re mun wenahauk fug alereg laruhu.

¹⁰Iren de ap inunuk bogdeg inim, enautsi yabuk leho on duruk on pegawai leho on inim bilipdoho unda yaho feselug, o elehet omamne on fam yatdoho oho on etmano seram deg boruk kwit, kwenang habuloho kabog-dil lahalug, elehet oho on anyo fene bin kuruk kamuhup.

¹¹Airoho dulug it enebe hol folo-folo firulug lauk hag, it enebe enonggwareg enomamne fam dipdeg enap anyo airoho lauk kamuhup,” ulug hweag-esebag.

¹²TUHAN, Hat de endam et[2] angge Allah hat neg deg lahenma hapne wauk kahi on. Hat hebe mundoho eneg wereg lit nit Haren hapma sebeloho fahat-nunusug lit, at Babilonia on ai en nit nenobam anggin folug nenowarik wamag ulug deberihin.

¹³Famen de, ap homi airoho siag neg dil waharuk kweleg oma, keroho hil kwelap-unusug lahen abi. Hat hebe mun eneg on hahun en siag on fam hil hehen fug halereg. Ap homi en dipdoho duruk eleg on fahet de Hat hahummu aldo duruk eleg ane. Aireg ma it ap homi hat hobam dipdeg eleg on en it ap homi hat hobam dipdoho duruk on anyo siahapdoho feseruk kweleg nunggwelug bik-bok welahen abi?

¹⁴Nunggwe ulug haren ap homi ikan ik laut fam wereg on inim, oluk-oluk angge inim ambi enowesi melal-enepuk on eleg anyo hagdoho debeserihin.

¹⁵It Babilonia on en ikan watuk angge aeg anyo fam hag, ap homi ikan hag debeselug hamboroho lit enepuk. It ap homi aire ikan watuk angge sum ahe fam yohwat eneplug lalug, it Babilonia on en de suma wehe angge ulug enahayeg en duruk.

¹⁶Airoho duruk kwit iren sum ahe anyo walug lalug, sum ahe ai fam en nenengge nauk angge inim og-neseheg nenenggik wereg apdoho welamag ulug sabut neseheg durukmu, di angge su angge mun wereg angge neg deg ma welamuhuk en de nenesum ahe fahet at onggonoho ulug waroho yal-utuk.

¹⁷Airoho duruk kwit enenda nesa fug angge hundig-hundig enenggarog fangdoho ap homi ununggul unuk mundoho enowatuk oma re nunggwelug no?