Read Ninia Yali HABAKUK 2 Bible Online

HABAKUK 2 - Ninia Yali bible

HABAKUK 2

¹An den TUHAN fam ngururuk kwit hweag-itihik on anyo keroho onggo hweag-nitmisi e, ne Aren keroho urukmu hamin e ulug e bela wirig on fam kahaleg wereg ma etmano lahamin deg welaikohon.

²Airoho uruk katfag ma, TUHAN en onggo anyo diroho hweag-etfag. “Kwenang dangge on fam an den hweag-hitmin ale ai enegdoho hauk ale fahet hwesesengge oho femihin.

³ Ketia hwesesengge wamihin ale aire ebe owan deg famen de fobik fotogdoho An den hat hobam debehuk ale anunu deg famen de, nangno hauk karuhun ale neg: Eta li em de demdoho waharuk mu hekipdoho feik lahup ale eke wereg fug.

⁴ Holukdoho welamin ap enebut siag on etma eke eneluk amuhup fug famen de, it ap Allah enda boruk ale higitdoho duruk enap etmano neg de, Allah en eneluk enahap wendaroho[3] fesehu aire, it Allah fam fik-furoho ebereg lit wereg ai en debesehu” ulug hweag-etfag.

⁵Enenggik wereg[4] on aire ap hundig lal enebuk ale. Ap an nangge lalep neg boruk on mel, leho fahat-dauk on mel, aire waratuk on nenek duruk hag duruk. Ai fam de homo debeseruk fug; famen unggul unuk eke famen eke famen kabog-dil lauk.

⁶Airoho duruk kwit, it aren sebeloho feseruk on etmano en de bilip deheg, kokog deheg duruk kamuhup. Airoho enele uruk kwit: Hat hangge fug famen kabog-dauk kahenma hururung deg lamuk! Ke huli folo-folo dung atmin ulug ap hat hobam baleg angge deg on omano nombaleg angge og-nemek ulug hele abiroho hweag-esauk karuhun?

⁷Ai famen de, hat furebouk fug angge en de, ap amu on sebele feseruk kahenma, it ai fam oho onggo dopno angge nim og-nomag ulug, hele omamne fam hweag-esauk karuhun. Ap haselei on omano watlug, hat hakol howag ulug duruk kamuhup.

⁸Haren oho it ap enenggul unuk amu on del dauihin famen, it oho enebe saha uhup deg hat deloho og-habuhup. Haren oho holok en o ilonggo humdoho mel, o sili humon[5] omano mel, holok en ap oho enowatil lauk katihin hag, hat oho airoho habuhup.

⁹Hat hobam anggin-fanggin on inim, hendama firig on inim, aik wam fugmen angge we hakol eleg angge welatmihin ulug, hat heyog indip kwe on neg fahet homamne hasimeg dungap-dauk kahen on ai, hat de mun hururung deg lamuk.

¹⁰Ai famen de wene melalduk katihin ale ai fam de heyog indip kwe enenggaliap atuk ai. Enenggul unuk humdoho del-dauk katihin famen de hat honggwareg alemat-dauk katihin ai.

¹¹Helep fak lehet oho on en inim o lang owag belabeg on en inim enele mil duruk aire hat hururung hapuk kwit duruk.

¹²Haren o kota humdoho witihin ai indip siag fam inim ap watuk fam inim witihin mu ketia hat de hururung deg welahen ai.

¹³Ap homi enunggul unuk domog etmano haren we alemaroho anggin-fanggin debeselug sebeloho feserihin deg di on su on iren wutswa on etmano TUHAN At mun omamne humon anyo enda boruk aleroho indok nasi.

¹⁴ Famen de ik en neg hopo deg hag, kwenang ohore Allah omamne wereg ale fahet inim At oluk mun humdeg ale fahet inim en hoporeg wereg.

¹⁵Haren hori sokole nikema on enenggaliap debeseheg, ap ik asig on nalug siomo duruk on hag debeseheg, dirihin.

¹⁶Haren it fam airoho debeserihin mu, ketire hat henggaliap hobahakup ale fahet horog aik waharuk aire leho habahakup en de fug. Ketia motdeg welahen on aire ahamdoho henggaliap hobahakup. TUHAN en omamne fam ik ahalue asig on unggum hwenanggeg omamne fam og-huruhumu nahun deg kup-kup angge duruk karuhun.

¹⁷Haren o Libanon ohweimu e murik lauk kahen famen de ketiare hat hebe at mug habuk kohoreg ai. Ne, haren di wam su wam mundoho warik lauk kahen famen de di wam su wam etman hat hakolap kwelap habuhup. Ai mundoho atuk aire haren ap homi[6] mel, o kota mel, di o su o mel, holok hasimeg enowatihin ai fam aruhu.

¹⁸Haren e kong baleg fam uruk kwit, “Holuk amin!” eheg, ite helep humon misig fam uruk kwit, “Inamin!” Eheg duruk kahen on ai hururung deg lamin. Kembu ilit angge on misig eke hat hobam ele hweag-hom alereg a? Ilit angge aire ap en emas inim perak inim fam aldapdoho wirig on ane, famen de at fam oluk wereg fug anyo. Kembu ilit angge aire nunggwangge fahet wereg? Aire ap en ilitdoho foruk angge. At famen de we seiale on neg hwelauk kahen ai. Kembu ilit angge ilit deberuk on ai ele uruk eleg kweleg, ap ilit duruk ahun anyo enda obam dip-deberuk aire we alemaroho.

²⁰TUHAN at obam eneg on ilonggoma wereg ma, ap homi mundoho kwenangma wereg on en halug at olohotma bok welamul fano.